លោក តាន់ ហ្សង់ហ្វ្រង់ស្វ័រ÷ ករណីយល់ច្រឡំគ្នារវាងសមាជិកសភាជប៉ុន ជាមួយទូតកម្ពុជា មិនអាចធ្វើឱ្យទំនាក់ទំនងកម្ពុជាជប៉ុនស្រុតចុះឡើយ

រដ្ឋមន្ត្រីប្រតិភូអមនាយករដ្ឋមន្ត្រី លោក តាន់ ហ្សង់ហ្វ្រង់ស័រ អះអាងថា បញ្ហាយល់ច្រឡំគ្នារវាងសមាជិកសភាជាន់ទាបរបស់ជប៉ុនជាមួយឯកអគ្គរាជទូតកម្ពុជាប្រចាំជប៉ុន មិនអាចធ្វើឱ្យប៉ះពាល់ទំនាក់ទំនងល្អរវាងកម្ពុជា និងជប៉ុនឡើយ។ នេះបើតាមការអះអាងរបស់លោកហ្សង់ ហ្វ្រង់ស្វ័រតាន់ រដ្ឋមន្ត្រីប្រតិភូអមនាយករដ្ឋមន្ត្រី នៅក្នុងសន្និសីទសារព័ត៌មានស្ដីពីលទ្ធផលនៃដំណើរទស្សនកិច្ចរបស់ សម្ដេចមហាបវរធិបតី ហ៊ុន ម៉ាណែត ចូលរួមកិច្ចប្រជុំកំពូលអាស៊ានលើកទី៤៦ និងបន្តដំណើរទស្សនកិច្ចការងារផ្លូវការនៅប្រទេសជប៉ុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមលោក តាន់ ហ្សង់ហ្វ្រង់ស័រ ឱ្យដឹងថា រាល់គ្រប់ជំនួបជាមួយថ្នាក់ដឹកនាំជប៉ុន ទាំងសម្ដេចធិបតី ហ៊ុ នម៉ាណែត និងទាំងថ្នាក់ដឹកនាំជប៉ុនមិនបានលេចយករឿងរ៉ាវនេះមកជជែកពិភាក្សាឡើយ។

នៅក្នុងជំនួបរវាងសម្ដេចមហាបវរធិបតីហ៊ុន ម៉ាណែតនាយករដ្ឋមន្ត្រីកម្ពុជា ជាមួយនាយករដ្ឋមន្ត្រីជប៉ុន មិនបានលើកយកករណីដែលសភាជាន់ទាបជប៉ុនអត្ថាធិប្បាយអំពីស្ថានភាពសិទ្ធិមនុស្សនិងនយោបាយនៅកម្ពុជា ទៅជជែកគ្នានៅក្នុងកិច្ចប្រជុំទ្វេភាគីឡើយ។

រដ្ឋមន្ត្រីប្រតិភូអមនាយករដ្ឋមន្ត្រី តាន់ ហ្សង់ហ្វ្រង់ស័រ ពន្យល់ដូច្នេះ÷ “វាមិនអាចប៉ះពាល់ដល់ទំនាក់ទំនងកម្ពុជា-ជប៉ុនទេ ផ្ទុយទៅវិញទស្សនកិច្ចរបស់សម្ដេចធិបតីនៅជប៉ុន ជាឱកាសសម្រាប់ឲ្យកម្ពុជានិងជប៉ុនប្ដេជ្ញាចិត្តរួចគ្នា ផ្ដល់សន្ទុះថ្មី ដល់កិច្ចសហការរវាងគ្នាតាមរយៈកញ្ចប់ដើម្បីសេដ្ឋកិច្ចកម្ពុជា-ជប៉ុន”។

គួរជ្រាបថា មុនដំណើរទស្សនកិច្ចទៅជប៉ុន សមាជិកសភាជាន់ទាបជប៉ុន បានអត្ថាធិប្បាយអំពីរឿងសិទ្ធិមនុស្សកម្ពុជា រឿងនយោបាយ។ ហើយភ្លាមៗឯកអគ្គទូតកម្ពុជាប្រចាំជប៉ុន លោក ទុយ រី ក៏បានផ្ញើលិខិតទៅពន្យល់អំពីទិដ្ឋភាពនៅកម្ពុជា។ លិខិតរបស់ឯកអគ្គរាជទូតកម្ពុជានោះ ត្រូវបានសមាជិកសភាជប៉ុន ថា មានខ្លឹមសារគំរាមកំហែង ប៉ុន្តែក្រសួងការបរទេសកម្ពុជា បំភ្លឺថា ខ្លឹមសារក្នុងលិខិតនោះ គ្មានការគំរាមកំហែងឡើយ។

ជប៉ុនគឺជាមិត្តចាស់របស់កម្ពុជា ដែលបានចូលរួមចំណែកយ៉ាងសកម្មនៅក្នុងការស្វែងរកសន្តិភាពនៅកម្ពុជា ក៏ដូចជាការជួយគាំទ្រដល់ការអភិវឌ្ឍន៍ប្រទេសកម្ពុជាក្រោយការបញ្ចប់សង្គ្រាម។ កម្ពុជាជប៉ុនបានភ្ជាប់ទំនាក់ទំនងការទូតជាផ្លូវការនៅក្នុងឆ្នាំ១៩៥៣។

ថ្នាក់ដឹកនាំកម្ពុជា និងជប៉ុន បានព្រមព្រៀងគ្នាដំឡើងភាពជាដៃគូទៅជា«ដៃគូយុទ្ធសាស្ត្រគ្រប់ជ្រុងជ្រោយ» នៅដើមឆ្នាំ២០២៣ ចំគ្រាដែលទំនាក់ទំនងប្រទេសទាំងពីរគ្រប់អាយុ៧០ឆ្នាំគត់៕