ក្នុងសប្ដាហ៍នេះ អគ្គសេនាធិការកងទ័ពវៀតណាម នឹងមកធ្វើទស្សនកិច្ចនៅកម្ពុជា

នៅក្នុងសប្ដាហ៍នេះ គណៈប្រតិភូអគ្គសេនាធិការកងទ័ពប្រជាជនវៀតណាមនឹងធ្វើដំណើរបំពេញទស្សនកិច្ចផ្លូវការ និងមិត្តភាពនៅកម្ពុជា ដើម្បីពង្រឹងពង្រីកចំណងសាមគ្គីភាព មិត្តភាព និងកិច្ចសហប្រតិបត្តិការរវាងកងទ័ពនៃប្រទេសទាំងពីរ។

យោងតាមសេចក្តីប្រកាសព័ត៌មានរបស់កងយោធពលខេមរភូមិន្ទ តបតាមការអញ្ជើញរបស់នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ លោកនាយឧត្តមសេនីយ៍ ង្វៀន តឹនសឿង អនុរដ្ឋមន្ត្រីក្រសួងការពារប្រទេស និងជាប្រធានអគ្គសេនាធិការកងទ័ពប្រជាជនវៀតណាម នឹងដឹកនាំគណៈប្រតិភូអញ្ជើញមកបំពេញទស្សនកិច្ចផ្លូវការនៅកម្ពុជា ចាប់ពីថ្ងៃទី៣ ដល់ថ្ងៃទី៦ ខែមិថុនា ឆ្នាំ២០២៥។

ក្នុងដំណើរទស្សនកិច្ចនេះ នាយឧត្តមសេនីយ៍ ង្វៀន គឺនគ្រឿង នឹងចូលជួបសម្តេចតេជោ ហ៊ុន សែន ប្រធានព្រឹទ្ធសភា សម្តេចធិបតី ហ៊ុន ម៉ាណែត នាយករដ្ឋមន្ត្រី និងលោកនាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ។ ដោយឡែក នាយឧត្តមសេនីយ៍ ង្វៀន តឹនគ្រឿង នឹងមានជំនួបពិភាក្សាទ្វេភាគីជាមួយនាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ ដោយក្នុងកិច្ចពិភាក្សានោះផ្តោតសំខាន់លើការពង្រឹង និងពង្រីកចំណងសាមគ្គីភាព មិត្តភាព កិច្ចសហប្រតិបត្តិការរវាង កងទ័ពនៃប្រទេសទាំងពីរ។

បន្ថែមពីនេះ នាយឧត្តមសេនីយ៍ប្រធានអគ្គសេនាធិការកងទ័ពវៀតណាម ក៏នឹងទៅដាក់កម្រងផ្កាគោរពវិញ្ញាណក្ខន្ធនៅស្តូបមិត្តភាពកម្ពុជា-វៀតណាម ទស្សនកិច្ចសាលាហ្វឹកហ្វឺន យោធភូមិភាគទី៤ និងទស្សនាប្រាសាទមួយចំនួនក្នុងខេត្តសៀមរាប៕