ថៃបិទច្រកទ្វារព្រំដែនអន្តរជាតិប៉ោយប៉ែត ឯកតោភាគី

នៅវេលាម៉ោង ៤ ល្ងាចថ្ងៃទី៧ ខែមិថុនា ឆ្នាំ២០២៥ ភាគីថៃបានបិទច្រកទ្វារអន្តរជាតិប៉ោយប៉ែត និងច្រកស្ទឹងបត់ ព្រមទាំងច្រកតំបន់ និងច្រករបៀងដទៃទៀត ខណៈពលរដ្ឋថៃបានម្រុកចេញពីកម្ពុជាទៅប្រទេសរបស់ខ្លួន។

យោងតាមប្រធានគណៈកម្មការច្រកទ្វារអន្តរជាតិ និងច្រកតំបន់ ដែលជាប់នឹងព្រំដែនថៃ នៃខេត្តបន្ទាយមានជ័យ បានឲ្យដឹងថា មុនម៉ោង៤ល្ងាច ប្រជាពលរដ្ឋថៃ ដែលធ្វើការនៅក្រុងប៉ោយប៉ែត បាននាំគ្នាសម្រុកចេញទៅប្រទេសថៃវិញ តាមច្រកទ្វារអន្តរជាតិប៉ោយប៉ែត និងប្រជាពលរដ្ឋខ្មែរដែលជាអាជីវករផ្សាររុងក្លឿ ក៏បានសម្រុកចេញ តាមច្រកទ្វារអន្តរជាតិប៉ោយប៉ែត មកកម្ពុជាវិញ តែការសម្រុកចេញនិងចូលនេះ មិនទាន់អស់នៅឡើយទេ ក៏ត្រូវបានភាគីថៃ ទាញរបងបិទច្រកទ្វារនេះនៅវេលាម៉ោង៤រសៀលថ្ងៃទី៧នេះតែម្ដង ធ្វើឱ្យពលរដ្ឋខ្មែរកកុញនៅក្នុងទឹកដីថៃ នៃមាត់ច្រកនេះ។

ក្រៅពីច្រកទ្វារអន្តរជាតិប៉ោយប៉ែត ច្រកទ្វាអន្តរជាតិស្ទឹងបត់ ក៏ត្រូវបានភាគីថៃទាញបន្លាលួសបិទ ដោយប្ដូរវេនបិទបើកច្រក ពីម៉ោង ៦ព្រឹក ដល់ម៉ោង ១០យប់ មកជាម៉ោង ៨ព្រឹក ដល់ម៉ោង ៤ល្ងាចវិញ ក្រៅពីនោះច្រកតំបន់ និងច្រករបៀងមួយចំនួនក៏ត្រូវបានបិទដែរ។

ការបិទដោយបង្ខំ និងឯកតោភាគីទាំងនេះ បង្កឲ្យមានការច្របូកច្របល់ នៅនឹងមាត់ច្រកអន្តរជាតិទាំងពីរ ដែលធ្វើឲ្យគណៈកម្មការច្រក និងសមត្ថកិច្ច ពិបាកគ្រប់គ្រងស្ថានភាព និងដោះស្រាយ។ មកដល់ម៉ោង៥ និង៣០នាទីនេះភាគីថៃនិងខ្មែរបានឯកភាពគ្នាឱ្យពលរដ្ឋសងខាងចេញ-ចូល៕

អត្ថបទ៖ អេម ពៅ