ទោះមានបញ្ហាតាមព្រំដែន តែសម្ដេចធិបតី ថា នឹងព្យាយាមរកដំណោះស្រាយសមស្របសម្រាប់អ្នកវិនិយោគ

សម្ដេចធិបតី ហ៊ុន ម៉ាណែត បាននិយាយថា រដ្ឋាភិបាលកម្ពុជា នឹងព្យាយាមរកដំណោះស្រាយសមស្របសម្រាប់អ្នកវិនិយោគ ក្នុងកាលៈទេសៈដែលកម្ពុជាកំពុងកើតមានបញ្ហាខ្លះៗនៅតាមតំបន់ព្រំដែនជាមួយនឹងប្រទេសថៃ។ សម្ដេច សន្យាថា នឹងធានារក្សាឱ្យបាននូវសន្តិភាព និងស្ថិរភាពរវាងប្រទេសទាំងពីរ។

ថ្លែងពីពិធីសំណេះសំណាលជាមួយសមាគមសម្ព័ន្ធអ្នកវិនិយោគកម្ពុជា នៅល្ងាចថ្ងៃទី២០ ខែមិថុនា ឆ្នាំ២០២៥ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអះអាងថា «បើទោះជាមានបញ្ហាខ្លះៗនៅព្រំដែនកំពុងតែកើតមាន រាជរដ្ឋាភិបាល ក៏នឹងប្ដេជ្ញាចិត្តក្នុងការធានានូវការរកដំណោះស្រាយឱ្យបាននៅក្នុងកិច្ចការងារពាក់ព័ន្ធនឹងព្រំដែននេះ ដើម្បីរក្សាសន្តិភាព និងស្ថិរភាពនៅក្នុងប្រទេសទាំងពីរ ក៏ដូចជាប្រទេសក្នុងតំបន់»។

សម្ដេចធិបតី សង្កត់ធ្ងន់ថា រាជរដ្ឋាភិបាលកម្ពុជា បានប្ដេជ្ញាចិត្តថែរក្សា និងការពារឱ្យបានពេញលេញនូវសុខសន្តិភាព ទោះក្នុងតម្លៃណាក៏ដោយ។ ទន្ទឹមនឹងការរក្សាបាននូវសុខសន្តិភាព និងស្ថិរភាព សម្ដេចនាយករដ្ឋមន្ត្រី ក៏បានបញ្ជាក់ទៅកាន់អ្នកវិនិយោគពីការបន្តគិតគូ និងយកចិត្តទុកដាក់របស់រាជរដ្ឋាភិបាលលើការអភិវឌ្ឍហេដ្ឋារចនាសម្ព័ន្ធ ជាមួយនឹងការអភិវឌ្ឍធនធានពលកម្មវ័យក្មេងប្រកបដោយភាពប្រកួតប្រជែងខ្ពស់ ក៏ដូចជាលក្ខខណ្ឌលើកទឹកចិត្តផ្សេងៗទៀតដល់អ្នកវិនិយោគ ដែលនឹងជួយគាំទ្រផលិតកម្មនានាកាន់តែប្រសិទ្ធភាព។

ក្នុងន័យនេះ សម្ដេចធិបតី នាយករដ្ឋមន្ត្រី រំពឹងថា អ្នកវិនិយោគនឹងបន្តការវិនិយោគនៅកម្ពុជា ហើយសម្រាប់អ្នកវិនិយោគថ្មីដែលទើបមកស្វែងរកឱកាសវិនិយោគ ក៏សង្ឃឹមថា នឹងអាចជ្រើសរើសកម្ពុជាជាទីតាំងវិនិយោគ និងតភ្ជាប់នូវខ្សែច្រវាក់ផលិតកម្មរវាងកម្ពុជា និងបណ្ដាប្រទេសនានាលើពិភពលោកបន្ថែមផងដែរ៕

ដោយ៖ ធឿន វ៉ាន់សុង