ព័ត៌មានជាតិ

អ្នកតាមដានយល់ថា ថៃកំពុងព្យាយាមបង្វែររឿងឈ្លានពានសម្លាប់ទាហានខ្មែរ

បានផុស

១២ ខែ មុន

នៅ

ថ្ងៃព្រហស្បតិ៍ ២៦ មិថុនា ២០២៥

ដោយ

ថៃនៅតែមិនទទួលស្គាល់ និងមិនមានចំណាត់ការលើអ្នកទទួលខុសត្រូវដែលលួចចូលដីខ្មែរបាញ់សម្លាប់ទាហានខ្មែរកាលពីថ្ងៃទី២៨ ខែឧសភាកន្លងទៅ បើទោះបីកម្ពុជាទាមទារឱ្យមានការស៊ើបអង្កេតលើករណីនេះក្ដី។ អ្នកតាមដានយល់ថាពេលនេះថៃកំពុងបង្វែរអំពើឧក្រិដ្ឋឈ្លានពាននេះទៅជារឿងថ្មីផ្សេងទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គលេខាធិការរាជបណ្ឌិត្យសភាកម្ពុជា លោកបណ្ឌិត យង់ ពៅ មានប្រសាសន៍ថា ជិត១ខែហើយដែលថៃគ្មានការបកស្រាយពីករណីដែលចូលមកបាញ់សម្លាប់ទាហានខ្មែរនៅព្រំដែនមុំបី ខេត្តព្រះវិហារ ទោះបីជាកម្ពុជាដាក់កំណត់ទូតឱ្យបកស្រាយ និងរកអ្នកទទួលខុសត្រូវក្ដី។ លោកយល់ថាការមិនបកស្រាយនិងទទួលខុសត្រូវនេះគឺបានបញ្ជាក់ថាថៃមិនទទួលស្គាល់ថាខ្លួនខុស និងរំលោភលើសន្និសញ្ញាអន្តរជាតិទេ ដូច្នេះហើយទើបប្រឹងបង្កើតរឿងថ្មីៗផ្សេងទៀតឱ្យកាន់តែច្រើន។

លោកបណ្ឌិត យង់ ពៅ៖ «ថៃដាច់ខាតមិនទទួលស្គាល់នូវទង្វើច្រឡោងខាម ឃោឃៅ រំលោភឈ្លានពានទៅលើដែនអធិបតេយ្យកម្ពុជាទេ! បើសិនបើភាគីថៃទទួលស្គាល់នោះថៃនឹងជាន់កែងខ្លួនឯងទៅលើការរំលោភសន្និសញ្ញាអន្តរជាតិ១៩០៤-១៩០៧ សន្និសញ្ញាបារាំង-សៀម។ អ៊ីចឹងថៃនឹងមិនទទួលស្គាល់ចំណុចនេះទេ! អ៊ីចឹងហើយនេះជាចំណុចដែលថៃចេះតែរុញបញ្ហាឱ្យកាន់តែជ្រៅបន្ថែមលើបញ្ហាដែលមានសម្រាប់»។

លោកជំរុញដល់រដ្ឋាភិបាលបន្តប្ដឹងថៃទៅកាន់តុលាការយុត្តិធម៌អន្តរជាតិ ពង្រឹងសមត្ថភាពការពារព្រំដែន និងជំរុញភាពសាមគ្គីរបស់ខ្មែរដើម្បីទប់ទល់នឹងនយោបាយឈ្លានពានរបស់ថៃ។

សម្រាប់អ្នកតាមដានភូមិសាស្ត្រនយោបាយ លោកបណ្ឌិត ជ័យ តិច យល់ថាកម្ពុជាគួរតែបង្កើនសម្ពោធអន្តរជាតិបន្ថែមទៀតលើថៃក្នុងករណីដែលឆ្មក់ចូលមកបាញ់សម្លាប់ទាហានខ្មែរនេះតាមរយៈអាស៊ាន និងអង្គការសហប្រជាជាតិជាដើម។ ដោយឡែកក្នុងពេលដែលរៀបចំបណ្ដឹងទៅ ICJ ការដាក់បញ្ជូលករណីចូលមកបាញ់សម្លាប់ទាហានខ្មែរនេះក៏ជាភស្ភុតាងសំខាន់មួយផងដែរ។

លោកថា៖ «កម្ពុជាត្រូវរៀបចំនូវចលនាជាតិដើម្បីតវ៉ានូវករណីនេះ ដូចជាការបង្កើតនូវយុទ្ធនាការសារព័ត៌មានឱ្យបានផុសផុលទាំងសារព័ត៌មានក្នុងស្រុក និងក្នុងតំបន់និងសារព័ត៌មានល្បីៗនៅក្នុងពិភពលោកដើម្បីបង្ហាញនូវចេនាដ៏អាក្រក់និងឃោឃៅរបស់ថៃដែលបាញ់សម្លាប់ទាហានខ្មែរដល់លេណដ្ឋាន ក៏ដូចជាចេនាផ្សេងៗដែលឈ្លានពានកម្ពុជា រួមទាំងការប្រើប្រាស់កម្ពុជាជាឧបករណ៍នយោបាយផ្ទៃក្នុងរបស់ថៃនេះ»។

គួរឱ្យដឹងផងដែរថា ទាហានថៃបានឆ្មក់ចូលដីខ្មែរបាញ់ទាហានខ្មែរនៅលេណដ្ឋានស្ថិតក្នុងភូមិតេជោមរកត ឃុំមរកត ស្រុកជាំក្សាន្ត ខេត្តព្រះវិហារ កាលពីថ្ងៃទី២៨ ខែឧសភា ឆ្នាំ២០២៥ ដែលបណ្ដាលឱ្យព្រឹន្ទបាលទោ សួន រ៉ោ បាត់បង់ជីវិត។

ក្រោយសកម្មភាពនេះក្រសួងការបរទេសកម្ពុជាបានធ្វើកំណត់ទូតទៅប្រទេសថៃបញ្ជាក់ថាសកម្មភាពនេះបានបំពានរំលោភលើដីខ្មែរ និងទាមទារឱ្យថៃស៊ើបអង្កេតរកអ្នកទទួលខុសត្រូវនៃអំពើនេះមកទទួលខុសត្រូវផងដែរ។ រហូតមកដល់ពេលនេះគ្មានការបញ្ជាក់ថាមូលហេតុអ្វីបានជាចូលដីខ្មែរបាញ់សម្លាប់ទាហានខ្មែរនោះទេ គ្រាន់តែនិយាយថាការបាញ់សម្លាប់ទាហានខ្មែរគឺពួកគេបាញ់ការពារខ្លួន៕