កម្ពុជា-អាមេរិក ពិភាក្សាជំហានបន្ទាប់ពង្រឹងទំនាក់ទំនងយោធាទ្វេភាគី ចំពេលមានភាពតានតឹងជម្លោះព្រំដែនកម្ពុជា-ថៃ

កម្ពុជា-សហរដ្ឋអាមេរិក បានពិភាក្សាជំហានបន្ទាប់ក្នុងការពង្រឹងទំនាក់ទំនងយោធាទ្វេភាគី ឱ្យកាន់តែរឹងមាំបន្ថែមទៀត ខណៈដែលរដ្ឋមន្រ្តីការពារជាតិអាមេរិក គ្រោងធ្វើទស្សនកិច្ចនៅកម្ពុជាឆាប់ៗខាងមុខនេះ គ្រាដែលកម្ពុជា-ថៃ កំពុងមានជម្លោះព្រំដែន។

កិច្ចពិភាក្សាពង្រឹងយោធានេះ ត្រូវបានលើកឡើងនាឱកាសលោក Andrew Byers ឧបការីរងរដ្ឋមន្រ្តីក្រសួងការពារ​ជាតិសហរដ្ឋអាមេរិក ទទួលបន្ទុកតំបន់អាស៊ីភាគខាងត្បូង និងអាស៊ីអាគ្នេយ៍ ធ្វើទស្សនកិច្ច នៅកម្ពុជារយៈពេល ២ថ្ងៃ ថ្ងៃទី២៤-២៥ ខែមិថុនា ឆ្នាំ ២០២៥ និងមានកិច្ចប្រជុំប្រកបដោយការស្ថាបនា ជាមួយមន្រ្តីយោធា និងមន្រ្តីរដ្ឋា​ភិ​បាល​កម្ពុជា។ នេះបើតាមសេចក្តីប្រកាសព័ត៌មានរបស់ស្ថានទូតអាមេរិកប្រចាំទីក្រុងភ្នំពេញ។

ក្នុងដំណើរទស្សនកិច្ចនេះ លោកឧបការីរងរដ្ឋមន្រ្តីក្រសួងការពារជាតិ Byers បានជួបពិភាក្សជាមួយឧត្តម​នាវីឯក ទៀ សុខា មេបញ្ជាការនៃកងទ័ពជើងទឹកកម្ពុជា ឧត្តមសេនីយ៍ឯក រ៉ាត់ ដារ៉ារ័ត្ន រដ្ឋលេខាធិការ ឧត្តមសេនីយ៍ឯក សួន សំណាង ប្រធានក្រុមសម្របសម្រួលសហប្រតិបត្តិការយោធា និង ឧត្តមសេនីយ៍ឯក ផាត វិបុលសុភ័ក្រ្ត នាយកនាយកដ្ឋានទាក់ទងអន្តរជាតិ នៃក្រសួងការពារជាតិ។ លោកថែមទាំងបានជួបជាមួយលោកជំទាវ អ៊ាត សោភា រដ្ឋលេខាធិការអចិន្ត្រៃយ៍ នៃក្រសួងការបរទេស និងសហប្រតិបត្តិការអន្តរជាតិ។

សេចក្តីប្រកាសព័ត៌មានអាមេរិកបញ្ជាក់ថា៖«នៅក្នុងកិច្ចប្រជុំទាំង​នោះ លោក Byers ឧបការីរងរដ្ឋមន្រ្តីក្រសួងការពារ​ជាតិ និងមន្រ្តីជាន់ខ្ពស់កម្ពុជា បានពិភាក្សាអំពីជំហានបន្ទាប់ក្នុងការពង្រឹងទំនាក់ទំនងយោធា រវាងសហរដ្ឋអាមេរិក និងប្រទេសកម្ពុជា បន្ទាប់ពីកិច្ចពិភាក្សារវាងមន្រ្តីនៃក្រសួងការពារជាតិអាមេរិក និងក្រសួងការពារជាតិកម្ពុជា នៅឯកិច្ច​ពិភាក្សា Shangri-La នាប្រទេសសិង្ហបូរី កាលពីខែមុន»។

ភាគីទាំងពីរក៏បានពិភាក្សាផងដែរ អំពីផែនការអនាគត សម្រាប់ទស្សនកិច្ចលោករដ្ឋមន្រ្តីក្រសួងការពារជាតិសហរដ្ឋ​អាមេរិក មកកាន់ប្រទេសកម្ពុជាដើម្បីមើលការចូលចតជាលើកដំបូង​ នៃនាវាកងទ័ពជើងទឹកសហរដ្ឋអាមេរិកនៅកងទ័ពជើងទឹក​មូលដ្ឋានសមុទ្ររាម ដែលត្រូវបានបើកឡើងវិញនៅឆ្នាំ​នេះ។ ស្ថានទូតអាមេរិកបញ្ជាក់ថា នេះគឺជាទស្សនកិច្ចប្រកបដោយផ្លែផ្កា ក្នុងការជំរុញទំនាក់ទំនងទ្វេភាគី ក្នុងវិស័យការពារជាតិ។

ឆ្លៀតក្នុងឱកាសនេះ លោកឧបការីរងរដ្ឋមន្រ្តីក្រសួងការពារជាតិ Byers បានជួបជាមួយអតីតនិសិ្សតយោធា ដែលធ្លាប់ចូលរួមក្នុងកម្មវិធីផ្លាស់ប្តូរផ្នែកជំនាញយោធានៅសហរដ្ឋអាមេរិក ហើយទស្សនាទីតាំងនានាក្នុងមូលដ្ឋានសមុទ្ររាម ដែលស្ថិត​នៅឆ្នេរភាគខាងត្បូង​នៃប្រទេសកម្ពុជា៕