នាយករដ្ឋមន្ត្រីសិង្ហបុរី ផ្ដើមទស្សនកិច្ចផ្លូវការនៅកម្ពុជា ចំខួប៦០ឆ្នាំនៃទំនាក់ទំនងប្រទេសទាំងពីរ

ដូចការគ្រោងទុក នៅព្រឹកថ្ងៃទី២ ខែកក្កដា ឆ្នាំ២០២៥ លោក ឡរ៉េន វ៉ុង នាយករដ្ឋមន្ត្រី និងជារដ្ឋមន្ត្រីហិរញ្ញវត្ថុសិង្ហបុរី បានអញ្ជើញ​ដល់ប្រទេសកម្ពុជា ដើម្បីបំពេញ​ទស្សន​កិច្ចជាផ្លូវការ រយៈពេលមួយថ្ងៃនេះ។ ទស្សនកិច្ចនេះ គឺធ្វើឡើងតបតាមការអញ្ជើញរបស់សម្តេច​ធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដើម្បីពង្រឹងពង្រីកបន្ថែមទៀតនូវទំនាក់ទំនង និងកិច្ចសហប្រតិបត្តិការរវាងកម្ពុជា និងសិង្ហបុរី ដែលស្របពេលខួប៦០ឆ្នាំនៃទំនាក់ទំនងការទូតរវាងប្រទេសទាំងពីរ។

ដំណើរមកដល់​របស់លោកនាយក​រដ្ឋ​មន្ត្រីសិង្ហបុរី និងគណៈប្រតិភូ នៅអាកាសយានដ្ឋានអន្តរជាតិភ្នំពេញ គឺមានវត្តមានទទួលស្វាគមន៍ពីមន្ត្រីជាន់ខ្ពស់របស់រាជរដ្ឋាភិបាល រួមមាន លោក ហែម វណ្ឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លោក ឈិត កេតនា អនុប្រធានអចិន្ត្រៃយ៍ និងជាអគ្គលេខាធិកាគណៈកម្មាធិការជាតិរៀបចំបុណ្យជាតិ និងអន្តរជាតិ លោក អ៊ឹង រចនា រដ្ឋលេខាធិការក្រសួងការបរទេស និងលោក សុខ ខឿន ជាឯកអគ្គរាជទូតកម្ពុជាប្រចាំប្រទេសសិង្ហបុរី។

យោងតាមក្រសួងការបរទេស ក្នុងដំណើរទស្សនកិច្ចនេះ លោក ឡរ៉េន វ៉ុង នឹងមានព្រះរាជសាវនាការជាមួយព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា នៅព្រះបរមរាជវាំង និងជំនួបសម្តែងការគួរសមជាមួយសម្តេច តេជោ ហ៊ុន សែន ប្រធានព្រឹទ្ធសភាកម្ពុជា។

បន្ទាប់មក នឹងមានជំនួបទ្វេភាគីជាមួយសម្តេចធិបតី ហ៊ុន ម៉ាណែត នាយករដ្ឋមន្ត្រី នៅវិមានសន្តិភាព ដែលនាយករដ្ឋមន្ត្រីទាំងពីរនឹងធ្វើការពិភាក្សាស៊ីជម្រៅបន្ថែមទៀត លើទំនាក់ទំនងដ៏យូរអង្វែង និងកិច្ចសហប្រតិបត្តិការ ដែលមានផលប្រយោជន៍ទៅវិញទៅមករវាងកម្ពុជា និងសិង្ហបុរី។

គួរបញ្ជាក់ថា កាលពីខែមិថុនា ឆ្នាំ២០២៤កន្លងទៅ សម្តេចធិបតី ហ៊ុន ម៉ាណែត ក៏បានអញ្ជើញបំពេញទស្សនកិច្ចផ្លូវការនៅប្រទេសសិង្ហបុរីផងដែរ។ សម្រាប់ទស្សនកិច្ច​របស់លោក ឡរ៉េន វ៉ុង ពេលនេះ គឺកើតឡើងចំ​ខួប៦០ឆ្នាំ នៃការបង្កើតទំនាក់ទំនងការទូតផ្លូវការរវាងកម្ពុជា និងសិង្ហបុរី៕