ព័ត៌មានជាតិ

អាជ្ញាធរ ចុះរៀបចំសណ្ដាប់ធ្នាប់ក្នុងផ្សារសែនមនោរម្យ ក្រោយមានការចតម៉ូតូ ឬ រថយន្ត និងលក់ដូរ គ្មានសណ្ដាប់ធ្នាប់

បានផុស

១ year មុន

នៅ

ថ្ងៃសុក្រ ៤ កក្កដា ២០២៥

ដោយ

អាជ្ញាធរក្រុងសែនមនោរម្យ សហការជាមួយកម្លាំងចម្រុះ បានចុះរៀបចំសណ្ដាប់ធ្នាប់នៅក្នុងផ្សារសែនមនោរម្យ ក្រោយមានការចតម៉ូតូ ឬ រថយន្ត និងលក់ដូរ គ្មានសណ្ដាប់ធ្នាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក មាស ចន្នី អភិបាលរងក្រុងសែនមនោរម្យ បានឲ្យដឹងថា តាមការណែនាំពីថ្នាក់ដឹកនាំក្រុង ដើម្បីឲ្យមានសណ្ដាប់ធ្នាប់ របៀបរៀបរយ ក្នុងបរិវេណផ្សារសែនមនោរម្យ នោះ នៅថ្ងៃទី ៤ ខែកក្កដា ឆ្នាំ ២០២៥ នេះ ក្នុងនាម គណៈបញ្ជាការឯកភាពក្រុង បានដឹកនាំក្រុមការងារ ចុះរុះរើដកហូតស្លាកយីហោគ្មានលិខិតអនុញ្ញាត និងស្លាកខុសពីការណែនាំ ចំនួន ៧ ទីតាំង ស្មើនឹង ៩ ស្លាក ព្រមទាំងបន្តចុះរៀបចំសណ្ដាប់ធ្នាប់ក្នុងផ្សារដែលអាជីវករលក់ដូរដាក់សម្ភារៈរំលោភផ្លូវសាធារណៈ និងការចតម៉ូតូ ឬ រថយន្ត កកស្ទះចរាចរណ៍ក្នុងការធ្វើដំណើររបស់ប្រជាពលរដ្ឋ។

លោកបានបញ្ជាក់ថា អាជ្ញាធរក្រុង និងកម្លាំងចម្រុះ តែងតែចុះរៀបចំសណ្ដាប់ធ្នាប់យ៉ាងហោចមួយសប្ដាហ៍ម្ដង ដោយឃើញថា អាជីវករនៅតែបន្តលក់ដូរដាក់សម្ភារៈគ្មានសណ្ដាប់ធ្នាប់ដដែល។ បន្ថែមនេះ អាជ្ញាធរ បានណែនាំដល់អាជីវករមួយចំនួននៅផ្សារសែនមនោរម្យដែលលក់ដូររំលោភលើចំណីផ្លូវ ធ្វើឲ្យប៉ះពាល់សណ្ដាប់ធ្នាប់ជាច្រើនដង។ លើសពីនោះ មានអាជីវករលក់ដូរជាច្រើន បានសហការជាមួយអាជ្ញាធរ រដ្ឋបាលក្រុង ដោយមិនធ្វើការលក់រំលោភលើចំណីផ្លូវប៉ះពាល់ដល់សណ្ដាប់ធ្នាប់ទៀតនោះទេ។ លោកថា ប៉ុន្តែបើតាមការអង្កេត មានអាជីវករមួយចំនួនតូច នៅតែឆ្លៀតឱកាសលក់រំលោភលើផ្លូវសាធារណៈ ក៏ដូចជា ចតម៉ូតូគ្មានរបៀបរៀបរយ ដែលធ្វើឲ្យកកស្ទះដល់ប្រជាពលរដ្ឋធ្វើដំណើរដដែល។

លោកអភិបាលរងក្រុងសែនមនោរម្យ ក៏បានអំពាវនាវដល់អាជីវករទាំងអស់ដែលលក់ដូរនៅក្រុងសែនមនោរម្យ សូមមេត្តាចូលរួមគោរពច្បាប់ ក៏ដូចជាថែរក្សាសណ្ដាប់ធ្នាប់របៀបរៀបរយក្នុងការលក់ដូរ ទាំងចតម៉ូតូ និងរថយន្ត។ លោកបន្ថែមថា ប្រសិនបើមានភ្ញៀវទេសចរមកកម្សាន្តនៅខេត្តមណ្ឌលគិរី ពេលឃើញសណ្ដាប់ធ្នាប់មិនរៀបរយ នឹងធ្វើឲ្យប៉ះពាល់ដល់មុខមាត់ខេត្តផងដែរ៕

អត្ថបទ ៖ រៀម សុខហេង