ពូជល្ពៅឃ្លោកកំពុងមានទីផ្សារខ្ពស់ តម្លៃសមរម្យ ប៉ុន្តែកសិករខ្លះមើលរំលងការដាំដុះ

ល្ពៅ​មិន​ត្រឹម​តែ​ល្អ​សម្រាប់​ទទួលទាន​មួយ​មុខ​ប៉ុណ្ណោះ​ទេ សូម្បីតែគ្រាប់​ល្ពៅ​ក៏​ល្អ​សម្រាប់សុខភាព​បំបាត់​ភាព​តានតឹងបានយ៉ាងល្អ ខណៈប្រេងគ្រាប់​ល្ពៅ​ក៏​ជួយ​បំប៉ន​សរសៃ​ប្រសាទ ឬ​សូម្បី​តែ​ការទទួលទាន​ផ្លែ​ល្ពៅ ​ក៏​អាច​ជួយគ្រប់គ្រងកម្រិតជាតិស្ករក្នុងឈាមឱ្យ​ស្ថិតក្នុងកម្រិតធម្មតាផងដែរ។ នៅកម្ពុជាយើងប្រជាកសិករ នៅតាមបណ្តាខេត្តនានា ក៏មានការដាំដំណាំល្ពៅជាច្រើនប្រភេទ ដើម្បីលក់នៅលើទីផ្សារ ប៉ុន្តែកសិករខ្លះមើលរំលងការដាំល្ពៅពូជឃ្លោក ដែលល្ពៅនេះកំពុងមានទីផ្សារខ្ពស់ ហើយលក់បានតម្លៃសមរម្យ។

លោក ភោគ សម្បត្តិ អាយុ៤៥ឆ្នាំ មានទីលំនៅបច្ចុប្បន្ន ភូមិចុងផាង​ ឃុំពូជ្រៃ​ស្រុកពេជ្រាដា ខេត្តមណ្ឌលគិរី ដែលមានបទពិសោធដាំល្ពៅច្រើនឆ្នាំមកនេះ ថ្លែងប្រាប់កម្ពុជាថ្មីថា គ្រាន់តែដាំល្ពៅលក់ ធ្វើឱ្យគ្រួសារគាត់មានជីវភាពសមរម្យ និងធូរធាជាងមុន។​  បច្ចុប្បន្ន លោកមានចម្ការដាំល្ពៅនៅលើផ្ទៃដីជាង ២ ហិកតា និងមានពូជចំនួនពីរប្រភេទ ទីមួយគឺពូជល្ពៅគីង្គក់ និងពូជមួយប្រភេទទៀត ដែលគេមិនសូវស្គាល់ប៉ុន្មានទេ គឺពូជល្ពៅឃ្លោក។

បើតាមកសិកររូបនេះ ពូជល្ពៅគីង្គក់ ប្រជាកសិករទូទៅហាក់ស្គាល់យ៉ាងទូលំទូលាយ ប៉ុន្តែពូជល្ពៅឃ្លោកប្រជាកសិករខ្លះ នៅមិនទាន់បានស្គាល់រសជាតិនៅឡើយទេ។ ហើយពូជល្ពៅឃ្លោកនេះទៀតសោត មានក្លិនឈ្ងុយ ស្អិតល្មួត ផ្អែម និងមានរាងតូចជាងល្ពៅផ្សេង។ លើសពីនេះ ពូជល្ពៅឃ្លោក ក៏លក់បានតម្លៃខ្ពស់សមរម្យ គឺសម្រាប់គាត់លក់រាយជូនអតិថិជនមួយគីឡូក្រាម បានរហូតទៅដល់២០០០រៀល ឯតម្លៃបោះដុំលក់បាន ១៥០០រៀលក្នុងគីឡូក្រាម។

លោកបានបញ្ជាក់ថា សម្រាប់ពូជល្ពៅឃ្លោកមួយប្រភេទនេះតាំងតែពីចាប់ផ្ដើមដាំមកហើយលក់ជូនអតិថិជនជាច្រើនឆ្នាំកន្លងមកគឺមិនដែលលក់នៅសេសសល់នោះទេ ពោលមានតែខ្វះជូនអតិថិជនថែមទៀតផង។ សម្រាប់ដំណាំពូជល្ពៅឃ្លោកមួយប្រភេទនេះ បើសម្រាប់កសិករផ្សេង អាចមានការលំបាកក្នុងការដាំដុះ ប៉ុន្តែសម្រាប់រូបលោក ដែលមានបទពិសោធច្រើនឆ្នាំ គឺការដាំនេះហាក់មិនមានភាពលំបាកក្នុងការមើលថែទាំប៉ុន្មាននោះទេ។ លោកថា៖« បើតាមការយល់ឃើញខ្ញុំផ្ទាល់ការដាំដំណាំមួយប្រភេទនេះ ហាក់មានការហុចផលលឿន និងចំណេញជាងដំណាំផ្សេងៗ ដូចជា ពោត សណ្ដែក និងដំណាំដំឡូងមីជាដើម នេះបើតាមលទ្ធផលប្រាក់ចំណូលរបស់ខ្ញុំជារៀងរាល់ឆ្នាំ»។

ល្ពៅឃ្លោកនេះ កំពុងទទួលបានការគាំទ្រពីអតិថិក្នុងស្រុក និងអ្នកដំណើរឆ្លងកាត់តាមផ្លូវជាតិលេខ ​៧៦ ពីក្រុងសែនមនោរម្យឆ្ពោះទៅខេត្តរតនគិរី។ លើសពីនេះ អតិថិជនតែងតែសរសើរ ថាល្ពៅនេះវាមានរស់ជាតិផ្អែម ស្អិត ឈ្ងុយឆ្ងាញ់ មិនថាយកទៅធ្វើម្ហូប ឬបង្អែមនោះទេ ថ្វីបើវាមានរាងតូចក៏ពិតមែន។

ទោះបីជាការមានការគាំទ្រច្រើនពីអតិថិជនយ៉ាងណាក៏ដោយ សម្រាប់ផ្លែល្ពៅស្រស់ក្នុងចម្ការរបស់គាត់គឺមិនបានផ្គត់ផ្គង់ទៅកាន់ទីផ្សារគ្រប់គ្រាន់ឡើយ ខណៈដែលកន្លងមកមានអតិថិជននៅឯរាជធានីភ្នំពេញធ្លាប់បញ្ជាទិញដែរ។ ចំណែកនៅតំបន់របស់គាត់វិញ កសិករភាគច្រើនហាក់មើលរំលងដំណាំមួយប្រភេទនេះ ដោយសារពូជល្ពៅឃ្លោកទាមទារឱ្យយើងថែទាំដិតដល់ជាងដំណាំពូជផ្សេង ។

ក្នុងនាមជាកសិករមានបទពិសោធដាំដំណាំល្ពៅប្រភេទពូជឃ្លោក ថ្លែងប្រាប់តាមរយៈកម្ពុជាថ្មី លោកស្ម័គ្រចិត្តរំលែកបទពិសោធពីការដាំដុះ បើសិនជាការសិកររូបណាមានចំណាប់អារម្មណ៍ដាំដុះប្រភេទល្ពៅនេះ ដោយបញ្ជាក់ថាការលក់នឹងទទួលបានតម្លៃខ្ពស់ជាងពូជល្ពៅផ្សេង៕

អត្ថបទ៖ រៀម សុខហេង