មន្ត្រីជាន់ខ្ពស់អំពាវនាវឲ្យសហគ្រាសក្នុងវិស័យសំណង់ រួសរ៉ាន់មកចុះបញ្ជីដើម្បីឲ្យកម្មករទទួលបានការគាំពារសង្គម

មន្ត្រីជានខ្ពស់នៃបេឡាជាតិសន្តិសុខសង្គម(ប.ស.ស.)បានធ្វើការអំពាវនាវដល់បណ្តាក្រុមហ៊ុនសហគ្រាសក្នុងវិស័យសំណង់ដែលនៅមិនទាន់ចុះបញ្ជី ត្រូវរួសរ៉ាន់មកចុះបញ្ជីជាមួយ ប.ស.ស.ដើម្បីឱ្យកម្មករសំណង់ទទួលបានការគាំពារសង្គម និងអត្ថប្រយោជន៍ផ្សេងៗពី ប.ស.ស.។

លោកបណ្ឌិត ហេង សុផាន់ណារឹទ្ធ អគ្គនាយករង ប.ស.ស. និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍នៅព្រឹកថ្ងៃទី១១កក្តដានេះថា ការអំពាវនាវនេះដោយសារបច្ចុប្បន្ននេះមានក្រុមហ៊ុនសហគ្រាសក្នុងវិស័យសំណង់ដែលបានចុះបញ្ជីជាមួយ ប.ស.ស.នៅមានចំនួនតិចនៅឡើយ ដែលធ្វើឱ្យកម្មករនៅក្នុងវិស័យនេះជាច្រើនមិនទទួលបានការគាំពារសង្គម។ ជាក់ស្តែងគិតត្រឹមខែមិថុនា ឆ្នាំ២០២៥នេះ មានកម្មករនិយោជិតចំនួន ១៨ ៥១១នាក់ ស្រី ៣ ៩១៦នាក់ បម្រើការងារនៅតាមសហគ្រាសវិស័យសំណង់ចំនួន ៦៣៤សហគ្រាស​ បានចុះឈ្មោះចូលជាសមាជិក ប.ស.ស. ។

លោកបណ្ឌិត ហេង សុផាន់ណារឹទ្ធ បានបន្តថា ការចុះឈ្មោះចូលជាសមាជិក ប.ស.ស.នេះ នឹងជួយលើកកម្ពស់សុខភាព និងជីវភាពរស់នៅរបស់កម្មករសំណង់កាន់តែប្រសើរឡើងបន្ថែមទៀត ដោយសារពួកគាត់ទទួលបានអត្ថប្រយោជន៍ជាច្រើនពី ប.ស.ស.ដូចជាការមើលថែទាំសុខភាពដោយមិនអស់ប្រាក់នៅតាមមន្ទីរពេទ្យរដ្ឋ និងឯកជនដែលជាដៃគូរបស់ ប.ស.ស.និងពេលជួបគ្រោះថ្នាក់ការងារជាដើម។

លោកបណ្ឌិតបានបន្តទៀតថា «ការមានប័ណ្ណ ប.ស.ស.នឹងជួយធ្វើឱ្យកម្មករយើងលែងសូវខ្វល់ខ្វាយទាក់ទិនទៅនឹងការចំណាយផ្សេងៗទៅលើការពិនិត្យ និងព្យាបាលជំងឺនៅតាមមន្ទីរពេទ្យនៅពេលដែលឈឺ ព្រោះថា រាល់ការចំណាយជាបន្ទុករបស់ ប.ស.ស.»។

លោកបណ្ឌិតបានបន្ថែមទៀតថា បច្ចុប្បន្ន ប.ស.ស បានក្លាយជានិមិត្តរូបនៃសុខភាពក្នុងចិត្តរបស់ប្រជាជន ដោយអាចជួយកាត់បន្ថយបន្ទុកចំណាយពង្រឹងស្ថិរភាព និងការព្យាករណ៍បាន នៃចំណូលព្រមទាំងធ្វើឱ្យប្រសើរឡើងនូវសុខភាពរបស់ខ្លួន។ លោកបណ្ឌិតបានគួសបញ្ជាក់ថា គិតត្រឹមខែមិថុនាឆ្នាំ២០២៥នេះ ប.ស.ស. មានសមាជិកកើនឡើងដល់៣លាន២សែននាក់ ស្រី ១,៨លាននាក់ ក្នុងនោះបុគ្គលនៃវិស័យសាធារណៈ ៥១ម៉ឺន ៨ពាន់នាក់ បុគ្គលនៃវិស័យឯកជន ១លាន ៩៥ម៉ឺននាក់បុគ្គលស្វ័យនិយោជន៍ ៥២ម៉ឺននាក់ និងអ្នកក្នុងបន្ទុកសមាជិក ប.ស.ស. ២០ម៉ឺន៣ពាន់នាក់៕

អត្ថបទ៖ សំអឿន