ក្រសួងអប់រំ ជ្រើសរើសគ្រូបង្រៀនចូលរួមវគ្គបណ្ដុះបណ្ដាល ពីបច្ចេកវិទ្យាឌីជីថល ដើម្បីជំនួយដល់ការបង្រៀន

នាថ្ងៃទី១៤ ខែកក្កដា ឆ្នាំ២០២៥ ក្រសួងអប់រំ យុវជន និងកីឡា បានប្រកាសជ្រើសរើសសិក្ខាកាមដែលជាគ្រូបង្រៀន ចូលរួមវគ្គបណ្ដុះបណ្ដាល ស្ដីពី នវានុវត្តន៍បច្ចេកវិទ្យាអប់រំឌីជីថល ជំនួយលើវិធីសាស្រ្តបង្រៀន និងរៀនក្នុងបរិបទថ្មី រៀបចំដោយនាយកដ្ឋានបរិវត្តកម្មឌីជីថល នៃក្រសួងអប់រំ យុវជន និងកីឡា សិក្សាជាមួយគ្រូឧទ្ទេសដែលជា គ្រូឆ្នើម (LEAD CAMBODIA) ដែលទទួលបានការបណ្ដុះបណ្តាលពីសាធារណរដ្ឋកូរ៉េ ធ្វើបទបង្ហាញតាមរយៈអនឡាញ។

សម្រាប់លក្ខខណ្ឌចូលរួម ក្រសួងបញ្ជាក់ថា គ្រូបង្រៀនគ្រឹះស្ថានសាធារណៈ, មានពេលវេលាគ្រប់គ្រាន់សម្រាប់សិក្សា, មានចំណេះដឹងផ្នែកការប្រើប្រាស់អ៊ិនធឺណិត អ៊ីម៉ែល និងកុំព្យូទ័រ និងមានឧបករណ៍ សិក្សាដូចជា កុំព្យូទ័រ កុំព្យូទ័របន្ទះ ទូរសព្ទដៃឆ្លាតវៃ និងអ៊ិនធឺណិត។

សម្រាប់គ្រូបង្រៀនដែលមានចំណាប់អារម្មណ៍ អាចចុះឈ្មោះចូលរៀន ចាប់ពីថ្ងៃជូនដំណឹងរហូតដល់ថ្ងៃទី១៦ ខែកក្កដា ឆ្នាំ២០២៥ វេលាម៉ោង ១៧:០០ នាទី។ កាលបរិច្ឆេទរៀន នៅថ្ងៃទីថ្ងៃទី១៧ ខែកក្កដា ឆ្នាំ២០២៥ ចាប់ពីវេលាម៉ោង ៨:០០ ព្រឹក។ បន្ទាប់ពីបញ្ចប់ វគ្គបណ្ដុះបណ្ដាលដោយជោគជ័យសិក្ខាកាម នឹងទទួលបានវិញ្ញាបនបត្របញ្ជាក់ការសិក្សា ចេញដោយនាយកដ្ឋានបរិវត្តកម្មឌីជីថល នៃក្រសួងអប់រំ យុវជន និងកីឡា។

ហេតុនេះអ្នកដែលមានចំណាប់អារម្មណ៍ អាចចុះឈ្មោះតាមរយៈ (https://link.moeys.gov.kh/onlinecourse )។ សម្រាប់ព័ត៌មានបន្ថែម អាចទាក់ទងតាមតេឡេក្រាម  066 901 800 ឬ អ៊ីមែល៖ [email protected] ។

សូមជម្រាបថា វគ្គបណ្តុះបណ្តាលនេះ នឹងផ្តល់ប្រយោជន៍ដល់សិក្ខាកាមដូចជា ណែនាំវិធីសាស្ត្រនៃការប្រើប្រាស់ថ្នាលអប់រំឌីជីថលផ្លូវការរបស់ក្រសួង សម្រាប់ជំនួយស្វ័យអភិវឌ្ឍន៍សមត្ថភាពគ្រូបង្រៀន, ពង្រឹងសមត្ថភាពលោកគ្រូ អ្នកគ្រូ ក្នុងការលើកកម្ពស់វិធីសាស្ត្របង្រៀនដោយផ្សារភ្ជាប់ជាមួយបច្ចេកវិទ្យាឌីជីថល, រៀន និងបង្រៀនជាមួយកម្មវិធីថ្មីៗដើម្បីទទួលបានប្រសិទ្ធភាពកាន់តែប្រសើរ និងមានភាពងាយស្រួល៕