បេក្ខជនប្រឡងបាក់ឌុបឆ្នាំនេះ មានពិន្ទុខ្ពស់ជាងគេទូទាំងប្រទេសនឹងទទួលបានរថយន្តអគ្គិសនីមួយគ្រឿង

ក្រសួងអប់រំ យុវជន និងកីឡា សហការជាមួយក្រុមហ៊ុន TF MOTORS (CAMBODIA) Co.,LTD នឹងផ្តល់រថយន្តអគ្គិសនីមួយគ្រឿងប្រភេទ Leapmotor TO3 ដែលមានតម្លៃ ១៥ ៩៩០ ដុល្លារ ជូនដល់បេក្ខជនប្រឡងសញ្ញា​បត្រមធ្យមសិក្សាទុតិយភូមិ ដែលមានពិន្ទុខ្ពស់ជាងគេប្រចាំប្រទេស។

ការផ្តល់ជូននេះ បន្ទាប់ពីមានជំនួបសម្ដែងការគួរសម និងពិភាក្សាការងាររវាង ក្រុមហ៊ុន TF MOTORS (CAMBODIA) Co.,LTD ជាមួយលោកស្រី គឹម សេដ្ឋានី រដ្ឋលេខាធិការប្រចាំការ ក្រសួងអប់រំ យុវជន និងកីឡា កាលពីថ្ងៃទី ២១ ខែកក្កដា ឆ្នាំ ២០២៥។ ជំនួបនេះផ្ដោតទៅលើការផ្តល់ជូនរថយន្តអគ្គិសនី Leapmotor TO3 ជូនដល់សិស្សានុសិស្សដែលទទួលបានកម្រិតពិន្ទុខ្ពស់ជាងគេទូទាំងប្រទេស(តែម្នាក់គត់) នៃការប្រឡងសញ្ញា​បត្រមធ្យមសិក្សាទុតិយភូមិ (បាក់ឌុប) សម្រាប់សម័យប្រឡង ថ្ងៃទី១៨ ខែសីហា ឆ្នាំ២០២៥ ខាងមុននេះ។

តាមខ្លឹមសារនៃជំនួប គោលបំណងនៃការផ្ដល់ជូនរថយន្តអគ្គិសនី Leapmotor TO3 នេះគឺដើម្បី ចូលរួមជាមួយក្រសួងអប់រំ យុវជន និងកីឡាក្នុងការលើកស្ទួយវិស័យអប់រំឱ្យកាន់តែរីកចម្រើន និងស្របតាមការលើកទឹកចិត្តពីរាជរដ្ឋាភិបាលក្នុងការគាំទ្រឱ្យប្រជាពលរដ្ឋខ្មែរងាកមកប្រើប្រាស់រថយន្តអគ្គិសនីដើម្បីចូលរួមថែទាំដល់បរិស្ថាន និងកាត់បន្ថយនៅឧស្ម័នពុលដែលប៉ះពាល់ដល់បរិយាកាស។ លើសពិនេះ ជាការលើកទឹកចិត្តដល់សិស្សានុសិស្សឱ្យខិតខំប្រឹងប្រែង រៀនសូត្រដើម្បីទទួលបាននូវលទ្ធផលល្អក្នុងការប្រឡងសញ្ញាបត្រមធ្យមសិក្សាទុតិយភូមិខាងមុខនេះ។

ជាមួយនឹងការផ្តល់រង្វាន់លើកទឹកចិត្តនេះ លោកស្រី គឹម សេដ្ឋានី បានសម្តែងការកោតសរសើរ និងថ្លែងអំណរយ៉ាងជ្រាលជ្រៅចំពោះរបស់ក្រុមហ៊ុន ដែលបានចូលរួមចំណែកក្នុងការលើកទឹកចិត្តដល់សិស្សានុសិស្សឱ្យខិតខំប្រឹងប្រែងសិក្សារៀនសូត្រ និងជំរុញឱ្យប្រជាពលរដ្ឋខ្មែរប្រើប្រាស់រថយន្ដអគ្គិសនីដើម្បីចូលរួមថែទាំដល់បរិស្ថាន និងកាត់បន្ថយនៅឧស្ម័នពុលដែលប៉ះពាល់ដល់បរិយាកាសស្របតាមការលើកទឹកចិត្តរបស់រដ្ឋាភិបាលនីតិកាលទី៧នេះ។

គួរបញ្ជាក់ផងដែរថា រថយន្ត Leapmotor T03 គឺជាប្រភេទរថយន្ត city car ទ្វារ-5 អគ្គិសនីសុទ្ធ ១០០ ភាគរយ ដែលអាចបើកបរបាន ៣១០ គីឡូម៉ែត្រ សម្រាប់ការសាកថាមពលមួយពេញ និងមានលក្ខណៈពិសេសទំនើបដ៏សំបូរបែបជាច្រើន៕