យោធាថៃបន្តបាញ់ផ្លោងលើកម្ពុជា ទោះថ្នាក់ដឹកនាំប្រទេសទាំងពីរ នឹងមានជំនួបចរចានៅម៉ាឡេស៊ី ថ្ងៃនេះក៏ដោយ

ថ្លែងក្នុងសន្និសីទសារព័ត៌មាន នៅព្រឹកថ្ងៃទី២៨ ខែកក្កដា ឆ្នាំ២០២៥នេះ ឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ បានលើកឡើងថា យោធាថៃនៅតែបន្តបាញ់ផ្លោងអាវុធធុនធ្ងន់ស្រោចដូចទឹកភ្លៀងមកលើកម្ពុជា បើទោះបីជានាយករដ្ឋមន្ត្រីស្ដីទីខ្លួនបានឯកភាពជួបប្រជុំចរចាជាមួយនាយករដ្ឋមន្ត្រីកម្ពុជា នៅថ្ងៃនេះ នៅប្រទេសម៉ាឡេស៊ីក៏ដោយ។

កិច្ចប្រជុំពិសេសនៅទីក្រុងកូឡាឡាំពួរ ដែលមានម៉ាឡេស៊ី ធ្វើជាម្ចាស់ផ្ទះ ហើយសហរដ្ឋអាមេរិកជាអ្នកសម្របសម្រួលនិងមានការចូលរួមពីតំណាងរបស់ប្រទេសចិនផងនោះនឹងធ្វើឡើងក្នុងគោលបំណងដើម្បីសម្រេចឱ្យមានបទឈប់បាញ់គ្នាបន្ទាន់ ដែលនាយករដ្ឋមន្ត្រីប្រទេសទាំងពីរ កម្ពុជា និងថៃ បានឯកភាពគ្នាតាមគំនិតផ្ដួចផ្ដើមរបស់លោកប្រធានាធិបតីសហរដ្ឋអាមេរិក Donald Trump។

បើទោះបីជាមានការកំណត់កិច្ចប្រជុំពិសេសកម្រិតថ្នាក់ប្រមុខរាជរដ្ឋាភិបាលនៃប្រទេសទាំងពីរនៅទីក្រុងគូឡាឡាំពួរ ក្នុងគោលដៅសម្រេចឱ្យមានបទឈប់បាញ់នៅថ្ងៃនេះក៏ដោយ ប៉ុន្តែអ្នកនាំពាក្យក្រសួងការពារជាតិកម្ពុជា ឧត្តមសេនីយ៍ឯក ម៉ាលី សុជាតា អះអាងថា នៅវេលាម៉ោង៣:១០នាទី រំលងអាធ្រាត ភាគីថៃនៅតែបន្តបើកការវាយប្រហារមុនលើកម្ពុជានៅតំបន់ប្រាសាទតាមាន់ធំ ប្រាសាទតាក្របី ដោយបាញ់ស្រោចរហូតដល់ម៉ោង៥:០៧នាទី។

បើតាមអ្នកនាំពាក្យក្រសួងការពារជាតិ «គិតចាប់ពីម៉ោង២:០០នាទី យប់ថ្ងៃទី២៧ ខែកក្កដា ដល់ម៉ោង ១៣:០០នាទី ថៃបានចាប់ផ្ដើមវាយជញ្ជ្រំនៅតំបន់៥មករា ចម្ការចេក និងប្រាសាទព្រះវិហារ។ ម៉ោង ១៥:០៧នាទី យន្តហោះថៃបានបាញ់ផ្សែងពុលនៅអានសេះ។ នៅវេលាម៉ោង ១៦:១២នាទី សភាពការណ៍នៅជប់គគី ថ្មដូន ភាគីថៃបានបាញ់ផ្លោងរង្វើលៗចូលតាមបណ្ដាទីតាំងរបស់កម្ពុជា។ ចំណែកឯប្រាសាទតាមាន់ធំ និងប្រាសាទតាក្របី ថៃបានបាញ់ផ្លោងចូលដូចភ្លៀងរលឹម»។

លោកស្រី បានបន្ថែមថា នៅវេលាម៉ោង១៣:១០នាទី រហូតដល់ម៉ោង១៦:០០នាទី ថៃបានប្រើយន្តហោះចម្បាំងបាញ់គ្រាប់រ៉ុក្កែតជាច្រើនគ្រាប់នៅតំបន់ប្រាសាទតាមាន់ធំ ប្រាសាទតាក្របី ព្រមទាំងតាមទីតាំងមួយចំនួនទៀតនៅក្នុងដែនអធិបតេយ្យភាពកម្ពុជា។ នៅវេលាម៉ោង ១៦:៤៨នាទី ភាគីថៃបានចាប់ផ្ដើមវាយនៅតំបន់មុំបី។

តាមការអះអាងរបស់លោកស្រី ម៉ាលី សុជាតា ចាប់ពីវេលាម៉ោង១៧:០៦នាទី ភាគីថៃបានប្រើយន្តហោះ ដ្រូនអត្តឃាត គ្រាប់បែកចង្កោម និងថែមទាំងផ្សែងពុលនៅតំបន់ភ្នំខ្មោច រហូតចូលមកដល់ថ្ងៃទី២៨ ខែកក្កដា ឆ្នាំ២០២៥នេះ៕

ដោយ៖ ធឿន វ៉ាន់សុង