ព័ត៌មានជាតិ

គ្រឿងឧបភោគបរិភោគ និងសម្ភារៈប្រើប្រាស់ ជាង១០០មុខ ប្រគល់ជូនរដ្ឋបាលខេត្តព្រះវិហារ និង វីរកងទ័ពជួរមុខទិសព្រះវិហារ

បានផុស

១២ ខែ មុន

នៅ

ថ្ងៃពុធ ៣០ កក្កដា ២០២៥

ដោយ

ព្រះវិហារ ៖ លោកសុខ ពេញវុធ អភិបាលរងរាជធានីភ្នំពេញ និងលោកជំទាវ តំណាងឱ្យលោក ឃួង សេង អភិបាលនៃគណៈអភិបាលរាជធានីភ្នំពេញ នៅថ្ងៃទី៣០ខែកក្កដា ឆ្នាំ២០២៥នេះ បាននាំយកអំណោយជាគ្រឿង ឧបភោគបរិភោគ និងសម្ភារៈប្រើប្រាស់ចាំបាច់ ជាង១០០មុខរបស់រដ្ឋបាលរាជធានីភ្នំពេញ មកប្រគល់ជូនរដ្ឋបាលខេត្តព្រះវិហារនិងវីរកងទ័ពជួរមុខទិសព្រះវិហារ ដែលកំពុងឈរជើងដ៏អង់អាចក្លាហានការពារបូរណភាពទឹកដី ពីការឈ្លានពានរបស់ខ្មាំងសត្រូវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គ្រឿងឧបភោគ បរិភោគ និងសម្ភារៈប្រើប្រាស់ជាង ១០០មុខ ដែល នាំយកមកប្រគល់ជូននាថ្ងៃនេះ រួមមានជូនរដ្ឋបាលខេត្តព្រះវិហារ តាមរយៈលោកឃី សុខា អភិបាលរងខេត្ត តំណាងលោក គីម រិទ្ធី អភិបាលខេត្តព្រះវិហារ សម្រាប់ចែកជូនបន្តដល់ប្រជាពលរដ្ឋ ដែលបានជម្លៀសចេញពីផ្ទះសម្បែងមករស់នៅកន្លែងសុវត្ថិភាព។ ដោយឡែកចំពោះ វីរ:កងទ័ពជួរមុខទិសព្រះវិហារ ដែលកំពុងឈរជើងដ៏អង់អាចក្លាហានការពារអធិបតេយ្យភាពជាតិខ្មែរ ពីការឈ្លានពានរបស់សត្រូវ រួមមាន ជូនបញ្ជាការដ្ឋានអង្គរក្ស តាមរយៈលោកឧត្តមសេនីយ៍ឯក សួន ពិរុណ មេបញ្ជាការរង បញ្ជាការដ្ឋាន អង្គរក្ស តំណាងនាយឧត្តមសេនីយ ហ៊ីង ប៊ុនហៀង អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការ បញ្ជាការដ្ឋានអង្គរក្ស , ជូន កងពលតូចអន្តរាគមន៍លេខ ៩ តាមរយៈលោកវរសេនីយ៍ឯក អួង សុវណ្ណា មេបញ្ជាការរង កងពលតូចអន្តរាគមន័លេខ៩ ,ជូន កងពលតូចអន្តរាគមន៍លេខ៨ តាមរយៈលោកឧត្តមសេនីយ៍ត្រី ចាន់ សុខុន មេបញ្ជាការកងពលតូចអន្តរាគមន៍លេខ៨ , ព្រមទាំងប្រគល់ជូនកងពលតូចអន្តរាគមន៍លេខ៧ ផងដែរ។

ក្នុងឱកាសនោះលោកសុខ ពេញវុធ មានប្រសាសន៍ថា ក្នុងនាមលោក ឃួង ស្រេង អភិបាលនៃគណៈអភិបាលរាជធានីភ្នំពេញ សូមសម្តែងនូវសមាណចិត្តអាណិតអាសូរ ជាពន់ពេកចំពោះទុក្ខវេទនារបស់បងប្អូនប្រជាពលរដ្ឋ ដែលបានចាកចោលផ្ទះសម្បែង ស្រែចំការ រត់ភៀសខ្លួន គេចចេញពីតំបន់សមរភូមិប្រយុទ្ធ មករស់នៅលើតំបន់សុវត្ថិភាពនាពេលនេះ។ ក្នុងនោះដែរចំពោះវីរកងទ័ពនៅជួរមុខ លោក សុខ ពេញវុធ ក៏បានពាំនាំនូវការផ្ដាំផ្ញើសាកសួរសុខទុក្ខដោយក្តីនឹករលឹកពីសំណាក់លោក ឃួង ស្រេង ជូនដល់វរកងទ័ពយើងទាំងអស់ ព្រមទាំងបានថ្លែងអំណរគុណយ៉ាងជ្រាលជ្រៅបំផុត ចំពោះទឹកចិត្តដ៏អង់អាចក្លាហានរបស់បងប្អូនវរកងទ័ព ដែលបានពុះពារលះបង់សាច់ស្រស់ឈាមស្រស់ ដើម្បីបុព្វហេតុការពារជាតិ មាតុភូមិពីការឈ្លានពានរបស់ខ្មាំងសត្រូវ។

លោកអភិបាលរងរាជធានីភ្នំពេញ ក៏បានជូនពរដល់បងប្អូនវរកងទ័ពដែលកំពុងឈរជើងនៅជួរមុខទាំងអស់ សូមសុខសប្បាយ សុខភាពល្អ និងទទួលបានជ័យជម្នះលើខ្មាំងសត្រូវ។

លោកឃី សុខា អភិបាលរងខេត្តព្រះវិហារ បានថ្លែងនូវការអរគុណយ៉ាងជ្រាលជ្រៅបំផុតជូនចំពោះលោកឃួង ស្រេង អភិបាលរាជធានីភ្នំពេញ ដែលតែងបានចាត់តំណាងនាំយកអំណោយពីរាជធានីភ្នំពេញ មកផ្តល់ជូនប្រជាពលរដ្ឋភៀសសឹក និងជូនដល់បងប្អូនវរកងទ័ពដែលកំពុងឈរជើងការពារបូរណភាពទឹកដីដែលនេះបញ្ជាក់ឱ្យឃើញថា សមរភូមិក្រោយនិងសមរភូមិមុខ គឺរួមចិត្តតែមួយ ហើយបងប្អូនវរកងទ័ពទាំងអស់ ប្តេជ្ញាការពារអធិបតេយ្យភាពជាតិរបស់យើង មិនឱ្យខ្មាំងចូលឈ្លានពានជាដាច់ខាត៕

ដោយ ៖ ស្រីរ័ត្ន