ទាហានខ្មែរទាំង១៨រូបដែលថៃចាប់ទៅ គឺមានសុវត្ថិភាព តែកម្ពុជាទទូចឱ្យឆាប់បញ្ជូនមកវិញ

តាមការអះអាងរបស់កាកបាទក្រហមអន្តរជាតិ ដែលបានជួបសួរសុខទុក្ខទាហានកម្ពុជាទាំង១៨នាក់ ដែលត្រូវបានឃុំខ្លួនដោយភាគីថៃនោះ គឺកំពុងមានសុវត្ថិភាព និងសុខភាពល្អទាំងអស់គ្នា។ ប៉ុន្តែ កម្ពុជានៅតែទទូចឱ្យភាគីថៃប្រញាប់បញ្ជូនអ្នកទាំងនោះត្រឡប់មកវិញ។

អ្នកនាំពាក្យក្រសួងការពារជាតិ លោកស្រីឧត្តមសេនីយ៍ឯក ម៉ាលី សុជាតា បានថ្លែងឱ្យដឹងនៅក្នុងស​ន្និសីទសារព័ត៌មាន នាព្រឹកថ្ងៃទី៩ ខែសីហា ឆ្នាំ២០២៥នេះថា លោក Lloyd Gillett ប្រតិភូកងទ័ពថ្នាក់តំបន់នៃគណៈកម្មាធិការកាកបាទក្រហមអន្តរជាតិ បានចែករំលែកព័ត៌មានដល់លោកឧត្តមសេនីយ៍ឯក រ៉ាត់ ដារ៉ារ័ត្ន រដ្ឋលេខាធិការនៃក្រសួងការពារជាតិកម្ពុជា អំពីការចុះសួរសុខទុក្ខទាហានទាំង ១៨រូប ដែលត្រូវបានភាគីថៃចាប់ខ្លួនដោយខុសច្បាប់ ក្រោយបទឈប់បាញ់ចូលជាធរមាន។

ក្នុងជំនួបកាលពីរសៀលថ្ងៃទី៨ ខែសីហា បើតាមអ្នកនាំពាក្យក្រសួងការពារជាតិកម្ពុជា គឺលោក Lloyd Gillett បានប្រាប់ថា «យោធិននៃកងយោធពលខេមរភូមិន្ទ ដែលស្ថិតនៅក្រោមការឃុំខ្លួនរបស់ភាគីថៃនោះ គឺមានសុវត្ថិភាព និងសុខភាពល្អទាំងអស់គ្នា»។

បើទោះជាមានការបញ្ជាក់ពីសុវត្ថិភាពអ្នកទាំងនោះយ៉ាងណាក្ដី តែកម្ពុជានៅតែស្នើយ៉ាងទទូចឱ្យភាគីថៃឆាប់បញ្ជូនកងកម្លាំងទាំង១៨រូបត្រឡប់មកវិញ ហើយលោកស្រី ម៉ាលី សុជាតា សង្ឃឹមថា ថៃនឹងដោះលែងយោធិនកម្ពុជាឱ្យបានឆាប់ ស្របតាមច្បាប់មនុស្សធម៌អន្តរជាតិ៕

ដោយ៖ ធឿន វ៉ាន់សុង