កម្ពុជាឱ្យថៃរួមអនុវត្តឱ្យបានជាក់ស្ដែងតាមកិច្ចព្រមព្រៀងលើបទឈប់បាញ់

អ្នកនាំពាក្យក្រសួងការពារជាតិ លោកស្រី ម៉ាលី សុជាតា បានប្រាប់ទៅភាគីថៃឱ្យបង្ហាញឆន្ទៈជាមួយកម្ពុជាក្នុងការគោរពអនុវត្តតាមស្មារតីនៃកិច្ចព្រមព្រៀងឈប់បាញ់ ដែលបានឯកភាពក្នុងកិច្ចប្រជុំពិសេសថ្ងៃទី២៨ ខែកក្កដា និងតាមខ្លឹមសារនៃកិច្ចប្រជុំ GBC កាលពីថ្ងៃទី៧ ខែសីហា ឆ្នាំ២០២៥ នៅប្រទេសម៉ាឡេស៊ី។

លោកស្រី ម៉ាលី សុជាតា បានគូសបញ្ជាក់នៅរសៀលថ្ងៃទី១១ ខែសីហានេះ ថា លទ្ធផលជាវិជ្ជមាននៃកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC) កាលពីថ្ងៃទី៧ ខែសីហា នៅប្រទេសម៉ាឡេស៊ី បានឆ្លុះបញ្ចាំងពីការតាំងចិត្តរួមរបស់ភាគីទាំងពីរ ក្នុងការសហការគ្នាដើម្បីជំរុញឱ្យមានសន្តិភាពយូរអង្វែង ស្ថិរភាព កិច្ចសហប្រតិបត្តិការ និងការអភិវឌ្ឃ ដើម្បីជាឧត្តមផលប្រយោជន៍រួមរវាងប្រទេសទាំងពីរ។

ប៉ុន្តែយ៉ាងនេះក្ដី ជាជំហានបន្ទាប់ដែលសំខាន់បំផុតនោះ អ្នកនាំពាក្យក្រសួងការពារជាតិកម្ពុជា ថា ទាមទារឱ្យភាគីកម្ពុជា និងថៃ ត្រូវតែបង្ហាញឆន្ទៈ និងការប្ដេជ្ញាចិត្ត គោរព និងអនុវត្តដោយស្មោះត្រង់ ពិតប្រាកដ និងជាក់ស្ដែងស្របជាមួយនឹងអ្វីដែលបានឯកភាពគ្នាកន្លងមកនេះ។

ការលើកឡើងដូច្នេះរបស់អ្នកនាំពាក្យក្រសួងការពារជាតិកម្ពុជា បានធ្វើឡើងក្រោយការប្រកាសរបស់មេបញ្ជាការយោធភូមិភាគទី២ថៃ លោក ប៊ុនស៊ីន ផាត់ក្លាង ដែលចង់វាយដណ្តើមយកប្រាសាទតាក្របី និងបិទប្រាសាទតាមាន់ធំ ដែលស្ថិតក្នុងដែនអធិបតេយ្យរបស់កម្ពុជា។ ការប្រកាសនេះត្រូវបាន លោកស្រី ម៉ាលី សុជាតា ថ្លែងចាត់ទុកថា ជាភស្តុតាង មិនអាចប្រកែកបានបញ្ជាក់ពីការបង្កហេតុ និងជាការប៉ុនប៉ងឈ្លានពានទឹកដីកម្ពុជាដោយចេតនា និងគិតទុកជាមុន រួមទាំងការបំពានលើកិច្ចព្រមព្រៀងបទឈប់បាញ់ដែលបានព្រមព្រៀងដោយភាគីទាំងពីរក្នុងកិច្ចប្រជុំ GBC ថ្មីៗនេះ។

ថ្លែងក្នុងសន្និសីទសារព័ត៌មាន នៅម៉ោង៤រសៀលថ្ងៃនេះ លោកស្រីឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ បានរំលឹកឡើងវិញពីខ្លឹមសារមួយចំនួន ដែលមានចែងនៅក្នុងសេចក្តីប្រកាសព័ត៌មានរួមនៃកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC) នៅប្រទេសម៉ាឡេស៊ី ពាក់ព័ន្ធទៅនឹងការប្រើប្រាស់កម្លាំងយោធាផងដែរ ដោយភាគីទាំងពីរ បានព្រមព្រៀងគ្នាលើបទឈប់បាញ់ រាប់បញ្ចូលទាំងការប្រើប្រាស់អាវុធគ្រប់ប្រភេទ រួមទាំងការវាយប្រហារទៅលើប្រជាជនស៊ីវិល ទ្រព្យសម្បត្តិស៊ីវិល និងគោលដៅយោធារបស់ភាគីម្ខាងៗនៅគ្រប់ករណីនិងគ្រប់តំបន់ទាំងអស់។ ពិសេសនោះ គឺភាគីទាំងពីរត្រូវតែជៀសវាងដាច់ខាតនូវរាល់ការបាញ់គ្នាដោយគ្មានមូលហេតុច្បាស់លាស់ទៅលើទីតាំង ឬកងទ័ពរបស់ភាគីម្ខាងទៀត ហើយម្យ៉ាងទៀត មិនត្រូវរំលោភបំពានលើកិច្ចព្រមព្រៀងនេះឡើយ ទោះក្នុងស្ថានការណ៍ណាក៏ដោយ។

ស្មារតីនៃកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC) ភាគីទាំងពីរ ក៏បានព្រមព្រៀងគ្នារក្សាកម្លាំងយោធារបស់ខ្លួននៅក្នុងទីតាំងបច្ចុប្បន្ន ដោយមិនអនុញ្ញាតឱ្យផ្លាស់ទីហួសពីទីតាំងដែលខ្លួនបានឈរជើង ក្នុងពេលកិច្ចព្រមព្រៀងបទឈប់បាញ់បានចូលជាធរមាននៅវេលាម៉ោង១២យប់ថ្ងៃទី២៨ ខែកក្កដា ឆ្នាំ២០២៥កន្លងទៅ ដោយមិនត្រូវចល័តកងទ័ពរបស់ខ្លួន រាប់បញ្ចូលទាំងការចល័តទ័ពទៅលើទីតាំងរបស់ភាគីម្ខាងទៀតឡើយ។

ភាគីទាំងពីរ បានព្រមព្រៀងមិនអនុញ្ញាតឱ្យមានសកម្មភាពរំខានណាមួយដែលអាចបង្កភាពតានតឹងឡើងវិញផងដែរ។ អ្នកនាំពាក្យក្រសួងការពារជាតិ លោកស្រី ម៉ាលី សុជាតា បន្ថែមយ៉ាងដូច្នេះ៕

ដោយ៖ ធឿន វ៉ាន់សុង