ព័ត៌មានជាតិ

មន្ទីរសម្រាកព្យាបាលមួយនៅខេត្តតាកែវ ត្រូវ ប.ស.ស បញ្ចប់កិច្ចព្រមព្រៀង លែងឱ្យផ្ដល់សេវា

បានផុស

១១ ខែ មុន

នៅ

ថ្ងៃសុក្រ ២២ សីហា ២០២៥

ដោយ

មន្ទីរសម្រាកព្យាបាល មិត្តភាពអង្គធ្លក ដែលមានទីតាំងនៅផ្ទះគ្មានលេខ ផ្លូវជាតិលេខ ២ ឃុំលំចង់ ស្រុកសំរោង ខេត្តតាកែវ ត្រូវបានបេឡាជាតិសន្តិសុខសង្គម (ប.ស.ស.) នៃក្រសួងការងារ និងបណ្តុះបណ្តាលវិជ្ជាជីវៈ បញ្ចប់កិច្ចព្រមព្រៀងលែងឱ្យផ្តល់សេវាសុខាភិបាលជូនសមាជិក ប.ស.ស ជាបន្តទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាម ប.ស.ស ការបញ្ចប់កិច្ចព្រមព្រៀងស្ដីពីការប្រើប្រាស់ និងការផ្តល់សេវាសុខាភិបាលជាមួយមន្ទីរសម្រាកព្យាបាល មិត្តភាពអង្គធ្លក នេះ ដោយសារមន្ទីរសម្រាកព្យាបាលនេះមិនបានអនុវត្តតាមគោលការណ៍ណែនាំរបស់ ប.ស.ស ក្នុងការផ្តល់សេវាជូនសមាជិក ប.ស.ស ប្រកបដោយគុណភាព និងប្រសិទ្ធភាព។

ប.ស.ស បានណែនាំដល់ សាធារណជន ម្ចាស់រោងចក្រ សហគ្រាស គ្រឹះស្ថាន និងសមាជិក ប.ស.ស អាចអញ្ជើញទៅប្រើប្រាស់សេវានៅមូលដ្ឋានសុខាភិបាលផ្សេងៗ ទៀត ដែលជាដៃគូ ប.ស.ស មានទីតាំងស្ថិតនៅក្បែរមន្ទីរសម្រាកព្យាបាលខាងលើ ករណីចូលប្រើប្រាស់សេវានៅមូលដ្ឋានសុខាភិបាលដែលបានបញ្ចប់កិច្ចព្រមព្រៀងជាបន្ទុកចំណាយផ្ទាល់របស់អ្នកជំងឺ។

គួរបញ្ជាក់ថា បច្ចុប្បន្ននេះ ប.ស.ស មានមូលដ្ឋានសុខាភិបាលទាំងរដ្ឋ និងឯកជន ប្រមាណជាង ១ ៦០០ កន្លែង នៅទូទាំងប្រទេស ក្នុងការផ្តល់សេវាជូនដល់សមាជិក ប.ស.ស ខណៈគិតត្រឹមខែកក្កដា ឆ្នាំ ២០២៥ នេះ ប.ស.ស មានសមាជិកសរុបចំនួន ៣ ២៣៨ ៦៣៩ នាក់។ ប៉ុន្តែបើគិតរយៈពេល ៧ ខែ ដើមឆ្នាំ ២០២៥ មានសមាជិក ៣៨៧ ៨៤៩ នាក់ថ្មី បានចុះបញ្ជីជាសមាជិក ប.ស.ស ទាំងវិស័យឯកជន វិស័យសាធារណៈ និងរបបភាគទានដោយស្ម័គ្រចិត្តសម្រាប់បុគ្គលស្វ័យនិយោជន៍ និងអ្នកបន្ទុកសមាជិក ប.ស.ស៕

អត្ថបទ ៖ សំអឿន