អាជ្ញាធរចាប់​ខ្លួន​ជន​សង្ស័យ​ឆបោកតាមអ៊ីនធើណិតជាង​៣ពាន់នាក់ក្នុងរយៈពេលជិត២ខែនៃយុទ្ធនាការ

អាជ្ញាធរកម្ពុជាបានចាប់ខ្លួនជនសង្ស័យចំនួន ៣ ១៧០នាក់ មក​ពី​១៩​សញ្ញាតិ ក្នុងអំឡុងពេលនៃការបង្រ្កាបទូទាំងប្រទេសរយៈពេល ៥៣ថ្ងៃនៃប្រតិបត្តិការឆបោកតាមអ៊ីនធឺណិតក្រោយមាន​បទ​បញ្ជាពីនាយករដ្ឋមន្ត្រី។

លេខាធិការដ្ឋាននៃគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា(CCOS) បានឱ្យ​ដឹង​ថាក្នុង​ប្រតិបត្តិការ​ចាប់ពីថ្ងៃទី២៧ ខែមិថុនាដល់ថ្ងៃទី១៨ ខែសីហា អាជ្ញាធរ​បាន​អនុវត្តច្បាប់បានរុះរើមជ្ឈមណ្ឌលឆបោកចំនួន៧២នៅទូទាំង ១៨ខេត្ត និងរាជធានីភ្នំពេញដោយបានឃាត់ខ្លួនជនសង្ស័យសរុបចំនួនប្រមាណ ៣ ១៧០ នាក់ មាន១៩សញ្ជាតិ។

ក្នុងយុទ្ធនាការបង្ក្រាបសកម្មភាពឆបោកអនឡាញក្នុងនោះដែរ សមត្ថកិច្ចបានចាត់វិធានការបញ្ជូនមុខសញ្ញាសង្ស័យជាមេខ្លោងចំនួន៦៦នាក់ និងបក្ខពួករបស់ពួកគេទៅតុលាការដើម្បីចាត់វិធានការតាមនីតិវិធីច្បាប់ជាធរមាន ខណៈជនបរទេសពាក់ព័ន្ធការឆបោកអនឡាញចំនួនសរុបប្រមាណជាង ២ ៤៥០ នាក់ និរទេសចេញពីកម្ពុជា។

កាលពី ខែកក្កដា នាយករដ្ឋមន្ត្រីកម្ពុជាសម្ដេចធិបតី ហ៊ុន ម៉ាណែត បានប្រកាសបើក​យុទ្ធនាការបោសសម្អាតបទឧក្រិដ្ឋឆបោកតាមប្រព័ន្ធបច្ចេកវិទ្យានៅទូទាំងប្រទេស ដោយបញ្ជាឱ្យអាជ្ញាធរមានសមត្ថកិច្ច និងស្ថាប័នពាក់ព័ន្ធទាំងអស់ត្រូវចុះប្រតិបត្តិការបង្ក្រាបនៅគ្រប់ទីតាំងដោយភាពម្ចាស់ការទទួលខុសត្រូវក្នុងភូមិសាស្ត្ររបស់ខ្លួន។ សម្ដេច​ក៏​ព្រមាន​ផងដែរថា មន្ត្រីណាមិនអនុវត្តតាមបទបញ្ជានេះត្រូវប្រឈមនឹងទណ្ឌកម្ម តាមរយៈការបញ្ចប់មុខតំណែង។

គួរ​ឱ្យ​ដឹង​ផងដែរ​ថាក្នុងរយៈពេលបីឆ្នាំចុងក្រោយនេះ យុទ្ធនាការបង្រ្កាបរបស់រាជរដ្ឋាភិបាលកម្ពុជាបានបង្រ្កាបក្រុមឧក្រិដ្ឋជនឆបោកអនឡាញ និងអំពើល្មើសពាក់ព័ន្ធ សរុបប្រមាណជាង ២៤ ០០០ (ជាងពីរម៉ឺន ៤ពាន់) ក្នុងនោះជនបរទេសចំនួន២៣,៩៩០ នាក់ត្រូវបាននិរទេសចេញពីកម្ពុជា។

ជាមួយគ្នានេះ សមត្ថកិច្ចបានជួយសង្រ្គោះជនរងគ្រោះពីអំពើជួញដូរ និងអំពើឆបោកអនឡាញ សរុបចំនួនប្រមាណជាង ៤,៨០០នាក់ មាន ២៧សញ្ជាតិ៕ 

អត្ថបទដោយ ហ៊ុន សិរីវឌ្ឍន៍