ព័ត៌មានជាតិ

អនុប្រធានវិទ្យុអាស៊ីសេរី សង្ស័យកើតជំងឺកាចសាហាវ

បានផុស

៥ years មុន

នៅ

ថ្ងៃពុធ ៧ មេសា ២០២១

ដោយ

អនុប្រធានគ្រប់គ្រងវិទ្យុអាស៊ីសេរីផ្នែកភាសាខ្មែរ លោក ជុន ច័ន្ទបុត្រ ដែលពេលនេះ កំពុងរស់នៅទីក្រុង វ៉ាស៊ីនតោន សហរដ្ឋអាមេរិកនោះ ត្រូវបានសង្ស័យថា កើតជំងឺកាចសាហាវ តែមិនដឹងជំងឺអ្វីឡើយ។ នេះបើតាមការបញ្ជាក់នៅលើហ្វេសប៊ុករបស់ខ្លួន។

លោក ជុន ច័ន្ទបុត្រ បានបញ្ជាក់នៅលើបណ្តាញសង្គមហ្វេសប៊ុករបស់ខ្លួននាព្រឹកថ្ងៃទី០៧ ខែមេសា នេះថា “ខ្ញុំមិនលាក់បាំងទេ ក្នុងការប្រយុទ្ធតតាំងនឹងជំងឺកាចសាហាវ ខ្ញុំអនុញ្ញាតឲ្យខ្លួនឯងកំសត់ស្រក់ទឹកភ្នែកម្តងម្កាលដែរ តែខ្ញុំមិនដែលអនុញ្ញាតឲ្យខ្លួនឯងបាក់ទឹកចិត្ត បាត់បង់សេចក្តីសង្ឃឹមម្តងណាឡើយ”។

តាមរយៈសារខាងលើមានការសន្និដ្ឋានថា លោកកំពុងកើតជំងឺ ខណៈអ្នកប្រើប្រាស់បណ្តាញសង្គមមួយផ្ញើសារឱ្យឆាប់ជា។ កន្លងមកលោកធ្លាប់ប្រកាសថា លោកកើតជំងឺមហារីកបំពង់ក។

សូមបញ្ជាក់ថា លោក ជុន ច័ន្ទបុត្រ ដែលបច្ចុប្បន្ន ជាអ្នកអត្ថាធិប្បាយរបស់វិទ្យុអាស៊ីសេរី ប្រចាំនៅរដ្ឋធានី Washington នោះ តែងតែវាយប្រហារលើការដឹកនាំរបស់រាជរដ្ឋាភិបាលកម្ពុជាបច្ចុប្បន្ន ជាពិសេសការដឹកនាំរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។

នៅក្នុងយុទ្ធនាការប្រយុទ្ធប្រឆាំងជាមួយជំងឺកូវីដ១៩នេះ លោកជុន ច័ន្ទបុត្រ តែងតែវាយប្រហារមិនសំចៃមាត់លើរដ្ឋាភិបាល ខណៈនៅសហរដ្ឋអាមេរិក មានអ្នកស្លាប់ដោយសារជំងឺកូវីដ១៩មកពេលនេះមានជិត ៦០ ម៉ឺននាក់ និងអ្នកឆ្លងដល់ទៅ ៣១ លាននាក់៕

អត្ថបទ៖ កោះកែវ