ព័ត៌មានអន្ដរជាតិ

អាមេរិកបើកឲ្យវិទ្យុអាស៊ីសេរីផ្សាយគ្រប់ទម្រង់ភាសាចិន ក្រោយផ្តាច់ជំនួយ១ឆ្នាំ

បានផុស

២ ខែ មុន

នៅ

ថ្ងៃពុធ ១៨ កុម្ភៈ ២០២៦

ដោយ

នាយកប្រតិបត្តិរបស់វិទ្យុអាស៊ីសេរី (rfa) បាននិយាយកាលពីថ្ងៃអង្គារថា វិទ្យុអាស៊ីសេរី ចាប់ផ្តើមការផ្សាយឡើងវិញ ទៅកាន់ពលរដ្ឋក្នុងប្រទេសចិន បន្ទាប់ពីការកាត់ជំនួយរបស់រដ្ឋបាលប្រធានាធិបតី ដូណាល់ ត្រាំ ជាពិសេសបង្ខំឱ្យស្ថាប័នមួយនេះដែលផ្តល់មូលនិធិដោយសហរដ្ឋអាមេរិក បញ្ឈប់ប្រតិបត្តិការកាលពីឆ្នាំមុន។

យោងតាមការចុះផ្សាយរបស់រ៉យទ័រកាលពីថ្ងៃទី១៨ ខែកុម្ភៈឱ្យដឹងថា វិទ្យុអាស៊ីសេរី (RFA) និងស្ថាប័នវិទ្យុសំឡេងសហរដ្ឋអាមេរិក (VOA) ត្រូវបានផ្តល់ហិរញ្ញប្បទានដោយមូលនិធិអាមេរិកជាច្រើនឆ្នាំ និងអនុម័តដោយសភាសហរដ្ឋអាមេរិក ជាពិសេសនឹងត្រួតពិនិត្យដោយទីភ្នាក់ងារសារព័ត៌មានសកលសហរដ្ឋអាមេរិក (USAGM) ។

កាលពីឆ្នាំមុន លោកស្រី Kari Lake អតីតពិធីការិនីព័ត៌មានដែលតែងតាំងដោយប្រធានាធិបតី លោក ដូណាល់ ត្រាំ ជានាយកប្រតិបត្តិស្តីទីរបស់ USAGM បានបញ្ចប់ជំនួយឥតសំណងរបស់វិទ្យុអាស៊ីសេរី ដោយចោទប្រកាន់ពីការខ្ជះខ្ជាយលុយអ្នកជាប់ពន្ធ និងលម្អៀងប្រឆាំងនឹងរដ្ឋបាល លោក ដូណាល់ ត្រាំ ។

យ៉ាងណា ក្រុមសិទ្ធិមនុស្សបានរិះគន់ទង្វើនេះយ៉ាងខ្លាំង លើសពីនេះនាំឱ្យបាត់បង់ការងារដល់បុគ្គលិកជាច្រើននាក់ ពេលសហរដ្ឋអាមេរិកកាត់បន្ថយថវិកា ហើយវិទ្យុអាស៊ីសេរីត្រូវបិទកម្មវិធីរបស់ខ្លួន។ ចំណែកសហរដ្ឋអាមេរិកខ្លួនឯង កំពុងដកថយពីសមរភូមិព័ត៌មាន ដែលបានធ្វើឱ្យប្រព័ន្ធផ្សព្វផ្សាយដែលគ្រប់គ្រងដោយរដ្ឋរបស់ប្រទេសចិន មានការប្រកួតប្រជែងតិចជាងមុន។

លោកស្រី Bay Fang ប្រធាននិងជានាយកប្រតិបត្តិរបស់ RFA បានសរសេរក្នុងបណ្តាញសង្គម LinkedIn របស់ខ្លួនថា៖ «យើងរីករាយណាស់ដែលបានបន្តការផ្សាយទៅកាន់ទស្សនិកជននៅក្នុងប្រទេសចិនជាភាសាចិនកុកងឺ ទីបេ និងអ៊ុយហ្គួរ (គ្រប់ទម្រង់នៃភាសាចិន) ដោយផ្តល់នូវការរាយការណ៍ឯករាជ្យតែមួយគត់របស់ពិភពលោកក្នុងតំបន់ទាំងនេះជាភាសាក្នុងស្រុក»។

លោកស្រីបានបន្តថា៖ «យើងមានសមត្ថភាពក្នុងការចាប់ផ្តើមការផ្សាយឡើងវិញគឺដោយសារតែកិច្ចសន្យាជាមួយក្រុមហ៊ុនឯកជនដែលបញ្ជូនព័ត៌មានតាមរលកធាតុអាកាសមួយ»។

យ៉ាងណា លោកស្រីមិនបានផ្តល់ព័ត៌មានលម្អិតនៅឡើយទេ។

លោកស្រីបន្ថែមថា ការកសាងបណ្តាញឡើងវិញគឺតម្រូវទទួលបានមូលនិធិពីសភាដែលទើបត្រូវបានអនុម័តថ្មីៗ មានភាពច្បាស់លាស់។

មិនតែប៉ុណ្ណោះ សេចក្តីព្រាងច្បាប់លើការចំណាយទ្វេភាគីដែលលោក ដូណាល់ ត្រាំ បានចុះហត្ថលេខាកាលពីដើមខែកុម្ភៈ រួមមានទឹកប្រាក់ ៦៥៣ លានដុល្លារ សម្រាប់ស្ថាប័ន USAGM គ្រប់គ្រងលើវិទ្យុ RFA, VOA និងស្ថាប័នផ្សព្វផ្សាយមួយចំនួនទៀត។

លើសពីនេះ អ្នកនាំពាក្យវិទ្យុអាស៊ីសេរី លោក Rohit Mahajan មានប្រសាសន៍កាលពីថ្ងៃសុក្រថា ក្រុមហ៊ុនបានចុះកិច្ចសន្យាជាមួយក្រុមហ៊ុនឯកជនមួយ ដើម្បីចាក់ផ្សាយវិទ្យុរបស់ខ្លួនឡើងវិញរួមមានទីបេ ចិន កូរ៉េខាងជើង និងមីយ៉ាន់ម៉ា៕

ប្រែសម្រួល៖ ណឺ មិនា