ព័ត៌មានជាតិ

ទូតកម្ពុជាចង់បង្កើត«មជ្ឈមណ្ឌលសៀវភៅកម្ពុជា»នៅបណ្ណាល័យជាតិប៊ុលហ្គារី

បានផុស

៦ នាទី មុន

នៅ

ថ្ងៃពុធ ៨ កក្កដា ២០២៦

ដោយ

ឯកអគ្គរាជទូតកម្ពុជាប្រចាំសាធារណរដ្ឋប៊ុលហ្គារីលោក ជា ច័ន្ទបរិបូរណ៍ បានជួបពិភាក្សាការងារជាមួយអគ្គនាយកបណ្ណាល័យជាតិសាធារណរដ្ឋប៊ុលហ្គារីកាលពីថ្ងៃទី៦ ខែកក្កដា ក្នុងគោលបំណងនាំយក«មជ្ឈមណ្ឌលសៀវភៅកម្ពុជា»ដាក់ទៅក្នុងបណ្ណាល័យជាតិប្រទេសនេះ ដែលជាកិច្ចខិតខំពង្រឹងការទូតវប្បធម៌ និងការលើកម្ពស់កិច្ចសហប្រតិបត្តិការលើវិស័យអប់រំ វប្បធម៌ និងវិទ្យសាស្ត្ររវាងប្រទេសទាំងពីរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ជា ច័ន្ទបរិបួណ៍ បានលើកឡើងថាគោលបំណងនៃគម្រោងបង្កើតមជ្ឈមណ្ឌលសៀវភៅ កម្ពុជានៅបណ្ណាល័យជាតិប៊ុលហ្គារីនេះ គឺដើម្បីដាក់តាំងសៀវភៅ ឯកសារ និងសម្ភារៈវប្បធម៌របស់កម្ពុជាឱ្យក្លាយជាប្រភពចំណេះដឹងសម្រាប់អ្នកសិក្សា អ្នកស្រាវជ្រាវ និស្សិត និងសាធារណជននៅប៊ុលហ្គារី និងអឺរ៉ុប។

លោកថា៖ «បច្ចុប្បន្ន បណ្ណាល័យជាតិមានមជ្ឈមណ្ឌលសៀវភៅរបស់ប្រទេសជាច្រើន ប៉ុន្តែមិនទាន់មានរបស់ព្រះរាជាណាចក្រកម្ពុជានៅឡើយ។ ដូច្នេះ វត្តមានរបស់ «មជ្ឈមណ្ឌលសៀវភៅកម្ពុជា» នឹងធ្វើឱ្យ កម្ពុជា មានកន្លែងសមរម្យមួយក្នុងចំណោមបណ្ដាប្រទេសនានា ដើម្បីបង្ហាញអំពីប្រវត្តិសាស្ត្រ អរិយធម៌ វប្បធម៌ អក្សរសាស្ត្រ សិល្បៈ សាសនា ទេសចរណ៍ និងការអភិវឌ្ឍរបស់ជាតិខ្មែរ»។

អគ្គនាយកបណ្ណាល័យជាតិសាធារណរដ្ឋប៊ុលហ្គារី លោកស្រី Kalina Ivanova បានស្វាគមន៍ចំពោះគំនិតផ្ដួចផ្ដើមនេះ ដោយបានផ្ដល់នូវឯកសារពាក់ព័ន្ធសម្រាប់ការបង្កើតមជ្ឈមណ្ឌលសៀវភៅនេះដល់ទូតកម្ពុជាក្នុងការរៀបចំផងដែរ។

លោក ជា ច័ន្ទបរិបូណ៍ បានបញ្ជាក់ថាការបង្កើតមជ្ឈមណ្ឌលសៀវភៅកម្ពុជានៅបណ្ណាល័យជាតិប៊ុលហ្គារីមិនត្រឹមតែជាការដាក់តាំងសៀវភៅប៉ុណ្ណោះទេ ប៉ុន្ដែជាការបង្កើតស្ពានចំណេះដឹងរវាងអរិយធម៌ប្រទេសទាំងពីរផងដែរ។

លោកបានបញ្ជាក់បន្ថែមថា៖ «សៀវភៅនីមួយៗដែលត្រូវដាក់លើធ្នើបណ្ណាល័យ នឹងក្លាយជាទូតវប្បធម៌ដ៏ស្ងៀមស្ងាត់ ដែលប្រាប់ពិភពលោកអំពីប្រវត្តិសាស្ត្រ អរិយធម៌ និងអត្តសញ្ញាណរបស់ប្រជាជាតិខ្មែរ»។

បណ្ណាល័យជាតិ «St. St. Cyril and Methodius» របស់ប្រទេសប៊ុលហ្គារី ត្រូវបានបង្កើតឡើងនៅឆ្នាំ ១៨៧៨ បន្ទាប់ពីការរំដោះប្រទេសប៊ុលហ្គារី។ អស់រយៈពេលជិតមួយសតវត្សកន្លះមកនេះ បណ្ណាល័យបានក្លាយជាស្ថាប័នចំណេះដឹងដ៏សំខាន់បំផុតរបស់ប្រទេស និងជាមជ្ឈមណ្ឌលជាតិសម្រាប់ការអភិរក្សបេតិកភណ្ឌអក្សរសាស្ត្រ ប្រវត្តិសាស្ត្រ និងឯកសារសំខាន់ៗ។ បណ្ណាល័យនេះ រក្សាទុកសៀវភៅ សាត្រាស្លឹករឹត ឯកសារបុរាណ ផែនទី កាសែត រូបថត និងឯកសារកម្ររាប់លានមុខ ដែលបម្រើដល់អ្នកសិក្សា អ្នកស្រាវជ្រាវ និងអ្នកអានមកពីជុំវិញពិភពលោក។

ឈ្មោះ «St. St. Cyril and Methodius» ត្រូវបានដាក់ដើម្បីគោរពដល់បងប្អូនបរិសុទ្ធទាំងពីរ ដែលបានដាក់គ្រឹះអក្សរសាស្ត្រស្លាវ និងរួមចំណែកយ៉ាងធំធេងដល់ការអភិវឌ្ឍវិស័យអប់រំ និងវប្បធម៌នៅអឺរ៉ុបខាងកើត។ បណ្ណាល័យនេះត្រូវបានចាត់ទុកថាជានិមិត្តរូបនៃចំណេះដឹង និងអត្តសញ្ញាណវប្បធម៌របស់ប្រទេសប៊ុលហ្គារី៕