តួលេខចរចាប្រាក់ឈ្នួលបឋម៖ ភាគីកម្មករស្នើថែម១០ដុល្លារ ខណៈថៅកែសុំមិនឡើង

កិច្ចប្រជុំចរចាកំណត់ប្រាក់ឈ្នួលកម្មករនិយោជិតក្នុងឧស្សាហកម្មវាយនភ័ណ្ឌកាត់ដេរ សម្រាប់ឆ្នាំ២០២៦ នាថ្ងៃទី៣ ខែកញ្ញា ឆ្នាំ២០២៥នេះ ភាគីកម្មករនិយោជិត ស្នើថែម១០ដុល្លារ ខណៈភាគីនិយោជក ស្នើសុំរក្សាតួលេខចាស់។  

ក្រោយបញ្ចប់កិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមា ជុំទី២ ថ្ងៃនេះ លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ​ បានថ្លែងប្រាប់អ្នកសារព័ត៌មាន ថា តំណាងភាគីកម្មករនិយោជិត បានស្នើតួលេខកំណើនចំនួន ១០ដុល្លាអាមេរិកលើតួលេខបច្ចុប្បន្ន២០៨ដុល្លារអាមេរិក និងតំណាងភាគីនិយោជកបានស្នើរក្សាតួលេខបច្ចុប្បន្នចំនួន ២០៨ដុល្លារអាមេរិកដដែល។

ជាការរំលឹក ឆ្នាំ២០២៥នេះ ​ប្រាក់​ឈ្នួល​ទាបបំផុតរបស់កម្មករនិយោជិត មានចំនួន២០៨ដុល្លារក្នុងមួយខែ បើធៀបនឹងឆ្នាំ២០២៤ មានត្រឹម២០៤ដុល្លារ ពោលគឺកើនឡើង៤ដុល្លារ ក្រោយមានការបោះឆ្នោតដោយកិច្ចប្រជុំត្រីភាគី ដោយបានឯកភាពដំឡើង២ដុល្លារ និងការបន្ថែម២ដុល្លារទៀតពីសម្ដេចធិបតីនាយករដ្ឋមន្ត្រី ហ៊ុន ម៉ាណែត។

ប៉ុន្តែសម្រាប់តួលេខចរចាពេលនេះ គ្រាន់តែជាតួលេខបឋមប៉ុណ្ណោះ ដោយអង្គប្រជុំបានឯកភាពគ្នាកំណត់កិច្ចពិភាក្សាជាលក្ខណៈត្រីភាគីជាបន្តនៅថ្ងៃទី១០ ខែកញ្ញា ឆ្នាំ២០២៥។ លោក ហេង សួរ លើកឡើងថា ភាគីកម្មករនិយោជិត និងភាគីនិយោជក​ នឹងជួបប្រជុំទ្វេភាគីបន្ថែមទៀតផងដែរ ដើម្បីស្វែងរកចំណុចរួម ធ្វើយ៉ាងណាគឺមានជំនឿទុកចិត្តទៅវិញទៅមក និងទទួលយកបាននូវជំហររួមមួយ ដើម្បីជាប្រយោជន៍ទាំងសម្រាប់កម្មករនិយោជិត ទាំងនិយោជក។

ការស្នើរក្សាតួលេខ២០៨ដុល្លារដដែលរបស់ភាគីនិយោជក គឺដោយការជះឥទ្ធិពលពីអត្រាពន្ធខ្ពស់របស់សហរដ្ឋអាមេរិក បើទោះជាការយកពន្ធរបស់អាមេរិកលើទំនិញកម្ពុជា បានទម្លាក់ក្នុង​អត្រា១៩ភាគរយក៏ដោយ។ លោករដ្ឋមន្ត្រី ហេង សួរ ថ្លែងបញ្ជាក់បែបនេះ ហើយលោក បន្ថែមថា ដោយឡែក លំហូរប្រជាពលករខ្មែរត្រឡប់មកពីប្រទេសថៃ ភាគីនិយោជក បានកត់សំគាល់ពីភាពវិជ្ជមាន ដែលនឹងជួយបំពេញបន្ថែមដល់តម្រូវការកម្លាំងពលកម្មក្នុងស្រុក។

គួរជម្រាបថា នាព្រឹកថ្ងៃទី៣ ខែកញ្ញា ឆ្នាំ២០២៥នេះ ក្រុមប្រឹក្សាជាតិប្រាក់ឈ្នួលអប្បបរមា បានបន្តកិច្ចប្រជុំរបស់ខ្លួន សម្រាប់ជុំទី២ ដើម្បីបន្តពិភាក្សាកំណត់ប្រាក់ឈ្នួលកម្មករនិយោជិតផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ សម្រាប់ឆ្នាំ២០២៦ បន្ទាប់ពីបានបើកកិច្ចប្រជុំជុំទី១ កាលពីរសៀលថ្ងៃទី២០​ ខែសីហា ឆ្នាំ២០២៥។

មុនដំណើរការកិច្ចប្រជុំត្រីភាគីដែលមានតំណាងរាជរដ្ឋាភិបាល ភាគីតំណាងកម្មករនិយោជិត (សហជីព) និងតំណាងភាគីនិយោជក ថ្ងៃនេះ តំណាងភាគីកម្មករនិយោជិត និងតំណាងភាគីនិយោជក ក៏បានជួបប្រជុំផ្ទៃក្នុងសម្ងាត់រៀងៗខ្លួនផងដែរ​ ដើម្បីសម្រេចនូវកិច្ចការផ្ទៃក្នុងមួយចំនួនរបស់ខ្លួន៕

ដោយ៖ ធឿន វ៉ាន់សុង