ព័ត៌មានជាតិ

កម្ពុជានាំអង្ករចេញទៅទីផ្សារបរទេសបានជិត៧០ម៉ឺនតោននៅឆ្នាំ២០២០

បានផុស

៥ years មុន

នៅ

ថ្ងៃព្រហស្បតិ៍ ៨ មេសា ២០២១

ដោយ

so pon

សម្ដេចអគ្គមហាសេនាបតីតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជាបានបញ្ជាក់ថា កាលពីឆ្នាំ២០២០ កន្លងទៅនេះ ប្រទេសកម្ពុជាបាននាំអង្ករចេញទៅកាន់ទីផ្សារបរទេសបានចំនួនជាង៦៩ ម៉ឺនតោនទៅកាន់ប្រទេសចំនួន៦០ នៅលើពិភពលោកលោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមសម្ដេចតេជោ ហ៊ុន សែន ដោយសារតែអាកាសធាតុមានលក្ខណៈអំណោយផលល្អសម្រាប់ ការបង្កបង្កើនផលដំណាំស្រូវនៅទូទាំងប្រទេសកម្ពុជា បានធ្វើឱ្យបរិមាណផលិតផលស្រូវរដូវវស្សានិងស្រូវរដូវប្រាំងសម្រេចបានប្រមាណជាង១០,៩៣ លានតោន ប្រហាក់ប្រហែលនឹងឆ្នាំ២០១៩ ដែលតាមការប៉ាន់ស្មានកម្ពុជាមានអតិរេកស្រូវជាង៥,៩២ លានតោន គិតជាអង្ករស្មើនឹង៣,៧៩ លានតោន សម្រាប់បម្រើឲ្យការនាំចេញ។

ការបញ្ជាក់របស់សម្ដេចអគ្គមហាសេនាបតីតេជោ ហ៊ុន សែន បានធ្វើឡើងនៅក្នុងសារលិខិតផ្ញើជូនជនរួមជាតិក្នុង ឱកាសពិធីបុណ្យចូលឆ្នាំថ្មីប្រពៃណីជាតិ ដែលនឹងចូលមកដល់នាពេលឆាប់ៗខាងមុខ ហើយដែលទើបទទួលបាននៅព្រឹកថ្ងៃទី០៨ ខែមេសា ឆ្នាំ២០២១នេះ ។ សម្ដេចតេជោ ហ៊ុន សែន បានបញ្ជាក់ដែរថា រហូតដល់ពេលនេះទោះបីជាប្រទេសកម្ពុជាបាននិងកំពុងរងផលប៉ះពាល់ធ្ងន់ធ្ងរពីជំងឺឆ្លងពីជំងឺកូវីដ-១៩ក្តី ក៏វិស័យឧស្សាហកម្ម និងសិប្បកម្មបានរីកលូតលាស់ជាបន្តបន្ទាប់។

ជាមួយគ្នានោះសម្ដេចតេជោបានបញ្ជាក់ជាថ្មីនូវការប្ដេជ្ញាចិត្តរបស់រាជរដ្ឋាភិបាលកម្ពុជាសម្រាប់ឆ្នាំ២០២១នេះ ក្នុងការរក្សាភាពជាម្ចាស់លើការងារអទិភាពចំបងចំនួន២ គឺទី១. ការថែរក្សាសន្តិភាព និងស្ថេរភាពនយោបាយ និងទី២. ការរក្សាស្ថិរភាពម៉ាក្រូសេដ្ឋកិច្ច ឲ្យបានល្អប្រសើរ និងបន្តជំរុញអនុវត្តយ៉ាងម៉ឺងម៉ាត់រាល់ភារកិច្ច ដែលបានដាក់ចេញ ដើម្បីអភិវឌ្ឍជាតិ និងសុខសាន្តរបស់ប្រជាជនកម្ពុជាដើម្បីជៀសផុតពីជំងឺឆ្លងកាចសាហាវកូវីដ-១៩ ដែលបាននិងកំពុងយាយីដល់សុខមាលភាពរបស់ប្រជាជនកម្ពុជា៕

អត្ថបទ៖ កោះកែវ

Related Topics: