ព័ត៌មានអន្ដរជាតិ

អ៊ីស្រាអែល វាយបកអភិបាលក្រុងញ៉ូវយ៉ក ដែលគំរាមចាប់ នាយករដ្ឋមន្ត្រី ណេតាន់យ៉ាហ៊ូ តាមដីកា ICC

បានផុស

៣៧ នាទី មុន

នៅ

ថ្ងៃចន្ទ ២០ កក្កដា ២០២៦

ដោយ

ក្រោយ អភិបាលទីក្រុងញូវយ៉ក លោក Zohran Mamdani ដែលជាអ្នកគោរពសាសនាឥស្លាម បានថ្លែងថា ខ្លួនកំពុងស្វែងរកលទ្ធភាពតាមផ្លូវច្បាប់ ដើម្បីចាប់ខ្លួន នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ ស្របតាមដីការបស់តុលាការឧក្រិដ្ឋកម្មអន្តរជាតិ (ICC) ពេលមេដឹកនាំរូបនេះធ្វើដំណើរមកកាន់ទីក្រុងញូយ៉កនាពេលខាងមុខ ស្រាប់តែ ការិយាល័យរបស់នាយករដ្ឋមន្ត្រីអ៊ីស្រាអែល នៅថ្ងៃទី១៩ ខែកក្កដាបានចេញសារថ្កោលទោសចំពោះអភិបាលក្រុងញូវយ៉ក លោក Mamdani យ៉ាងចាស់ដៃ។ នេះបើយោងតាមការចុះផ្សាយរបស់ទីភ្នាក់ងារសារព័ត៌មាន AFP នៅថ្ងៃទី២០ ខែកក្កដា ឆ្នាំ២០២៦ ។

អភិបាលទីក្រុងញូវយ៉ក លោក Zohran Mamdani និងមេដឹកនាំអ៊ីស្រាអែល។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការិយាល័យរបស់ លោក ណេតាន់យ៉ាហ៊ូ បានលើកឡើងនៅលើបណ្តាញសង្គម X ថា៖ « លោក Mamdani គួរតែផ្តោតលើការជួសជុល ផ្នែកខូចខាតដែលគោលនយោបាយរបស់លោកបានបង្កឡើង នៅទីក្រុងញូវយ៉ក។ ដូចអតីតអគ្គព្រះរដ្ឋអាជ្ញានៃតុលាការ ICC លោក Karim Khan ដែរ លោក Mamdani ហាក់ដូចជាឈឺឆ្អាលក្នុងការបង្វែរការចាប់អារម្មណ៍របស់សាធារណជនពីភាពល្ងង់ខ្លៅរបស់ខ្លួន វាយប្រហារមេដឹកនាំនៃរដ្ឋជ្វីហ្វ និងលទ្ធិប្រជាធិបតេយ្យតែមួយគត់ នៅមជ្ឈិមបូព៌ា»។

ក្នុងបទសម្ភាសន៍មួយ បានចេញផ្សាយនៅថ្ងៃទី១៨ ខែកក្កដា លោក Mamdani បាននិយាយថា លោកកំពុងពិគ្រោះជាមួយក្រុមអ្នកច្បាប់របស់ទីក្រុងញូវយ៉កអំពីវិសាលភាពនៃអំណាចរបស់អភិបាលក្រុង ក្នុងការដឹកនាំប៉ូលិសឱ្យឃុំខ្លួនមេដឹកនាំបរទេសម្នាក់ ដោយសំដៅលើ លោក ណេតាន់យ៉ាហ៊ូ ។

លោក Mamdani ប្រាប់កាសែត The New York Times ថា៖ « ខ្ញុំជឿថា លោក ណេតាន់យ៉ាហ៊ូ ជាកម្មសិទ្ធិរបស់ទីក្រុងឡាអេ។ គាត់ជាឧក្រិដ្ឋជនសង្គ្រាម ដែលត្រូវបានចោទប្រកាន់ដោយតុលាការ ICC ។ អ្វីក៏ដោយដែលច្បាប់អនុញ្ញាតឱ្យខ្ញុំធ្វើនៅក្នុងទីក្រុងញូវយ៉ក នោះហើយជាអ្វីដែលយើងនឹងធ្វើ»។

យ៉ាងណា ការិយាល័យរបស់ លោក ណេតាន់យ៉ាហ៊ូ បានវាយបកវិញនៅថ្ងៃទី១៩ ខែកក្កដា ប្រឆាំងនឹង លោក Mamdani និងតុលាការ ICC ផងដែរ ។

ការិយាល័យអ៊ីស្រាអែលបន្តថា៖ « តុលាការ ICC ប្រៀបដូចជាសត្វ kangaroo ដែលគ្មានអំណាចផ្លូវច្បាប់លើជនជាតិអាមេរិក ឬអ៊ីស្រាអែល។ ដីកាចាប់ខ្លួនក្លែងក្លាយរបស់ខ្លួនប្រឆាំងនឹងនាយករដ្ឋមន្ត្រី ណេតាន់យ៉ាហ៊ូ ត្រូវបានដាក់ចេញដោយអតីតព្រះរាជអាជ្ញា ICC ដ៏អាម៉ាស់ម្នាក់ គឺ លោក Karim Khan ។ ដីកាចាប់ខ្លួននេះត្រូវបានចេញត្រឹមតែប៉ុន្មានថ្ងៃ មុនពេលការចោទប្រកាន់ពីបទប្រព្រឹត្តខុសផ្លូវភេទត្រូវបានធ្វើឡើងប្រឆាំងនឹង លោក Khan ។ វាជាការប៉ុនប៉ងច្បាស់លាស់របស់ លោក Khan ដើម្បីបង្វែរការចាប់អារម្មណ៍របស់សាធារណជន»។

មិនតែប៉ុណ្ណោះ កន្លងមក លោក Mamdani បានសន្យាថានឹងបញ្ជូនប៉ូលិសញូវយ៉កទៅអនុវត្ត ដីកាចាប់ខ្លួនប្រឆាំងនឹងមេដឹកនាំ ដែលតុលាការ ICC ចង់បាន រួមទាំង លោក ណេតាន់យ៉ាហ៊ូ និង ប្រធានាធិបតីរុស្ស៊ី លោក វ៉្លាឌីមៀរ ពូទីន ផងដែរ៕

សម្រួល៖ ណឺ មិនា