ប្រធានាធិបតីហ្វីលីពីន ចាប់ផ្ដើមជួបជាមួយថ្នាក់ដឹកនាំកម្ពុជា នៅថ្ងៃនេះ

បន្ទាប់ពីអញ្ជើញដាក់កម្រងផ្កាគោរពវិញ្ញាណក្ខន្ធនៅវិមានឯករាជ្យ និង​នៅមណ្ឌលព្រះបរមរូបព្រះបរម​រតនកោដ្ឋ នៅព្រឹកថ្ងៃទី៨ ខែកញ្ញា ឆ្នាំ២០២៥នេះ លោកប្រធានាធិបតី ម៉ាកូស បានចូលជួបសម្ដេចតេជោ ហ៊ុន សែន ប្រមុខរដ្ឋស្ដីទីកម្ពុជា នៅឯវិមានសន្តិភាព។

ក្នុងនាមជាប្រមុខរដ្ឋស្ដីទី សម្ដេចតេជោ ហ៊ុន សែន បានរៀបចំពិធីបដិសណ្ឋារកិច្ចផ្លូវរដ្ឋស្វាគមន៍លោកប្រធានាធិបតី ហ្វឺឌីណាន់ រ៉ូម៉ូលដេស ម៉ាកូស ជូញៀ (Ferdinand Romualdez Marcos Jr.) និងភរិយា មុនជំនួបពិភាក្សាការងារចាប់ផ្ដើម។  

ជំនួបសម្ដេចតេជោ និងលោកប្រធានាធិបតីហ្វីលីពីន នឹងផ្ដោតការពិភាក្សាស៊ីជម្រៅលើ​ការ​ពង្រឹងទំនាក់ទំនងដ៏កក់ក្តៅ និងពង្រីកកិច្ចសហប្រតិបត្តិការដែលផ្តល់ផល​ប្រ​យោជន៍​ទៅវិញទៅមក ព្រមទាំងការផ្លាស់ប្តូរទស្សនៈគ្នាលើបញ្ហាតំបន់ និងអន្ត​រ​ជាតិនានាដែលជាចំណាប់អារម្មណ៍រួម។

ក្រៅពីជួបជាមួយសម្ដេចតេជោប្រមុខរដ្ឋស្ដីទី លោកប្រធានាធិបតីហ្វីលីពីន ក៏នឹងមានជំនួបពិភាក្សាទ្វេភាគីជាមួយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលបន្ទាប់ពីជំនួបប្រមុខរដ្ឋាភិបាលទាំងពីរ ឯកសារកិច្ចសហប្រតិបត្តិការទ្វេភាគី​មួយ​ចំនួន ក៏នឹងត្រូវបានចុះហត្ថលេខាផងដែរ។

លោកប្រធានាធិបតី ម៉ាកូស បានដឹក​នាំគណៈប្រតិភូអញ្ជើញមកដល់កម្ពុជា កាលពីរសៀលថ្ងៃទី៧ ខែ​កញ្ញា ឆ្នាំ២០២៥ ដើម្បីបំពេញទស្សនកិច្ចផ្លូវរដ្ឋ​នៅ​កម្ពុជារយៈពេល៣ថ្ងៃ ចាប់ពីថ្ងៃទី៧ ដល់ថ្ងៃទី៩ ខែកញ្ញា។ ទស្សនកិច្ចផ្លូវរដ្ឋរបស់លោកប្រធានាធិបតី និងភរិយា ធ្វើឡើងតបតាមការ​អញ្ជើញ​របស់ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា។

កម្ពុជា និងហ្វីលីពីន បានភ្ជាប់ទំនាក់ទំនងផ្លូវការនៅថ្ងៃទី២០ ខែសីហា ឆ្នាំ១៩៥៧ ប៉ុន្តែត្រូវបានកាត់ផ្តាច់ នៅឆ្នាំ១៩៧៥ ក្នុងរបបខ្មែរក្រហម។ លុះខែកុម្ភៈ ឆ្នាំ១៩៩២ បន្ទាប់ពីកម្ពុជា មានកិច្ចព្រមព្រៀងសន្តិភាពទីក្រុងប៉ារីស ប្រទេសហ្វីលីពីន ក៏បានភ្ជាប់ទំនាក់ទំនងឡើងវិញ។ ចាប់ពីឆ្នាំ១៩៩២មក ទំនាក់ទំនងរវាងកម្ពុជា និងហ្វីលីពីន ត្រូវបានលើកកម្ពស់ និងពង្រីកជាបន្តបន្ទាប់។

គួរបញ្ជាក់ថា កាលពីខែកុម្ភៈ ឆ្នាំ២០២៥កន្លងទៅ សម្តេចធិបតី ហ៊ុន ម៉ាណែត បានដឹកនាំគណៈប្រតិភូអញ្ជើញបំពេញទស្សនកិច្ច​ផ្លូវ​ការនៅ​ប្រទេសហ្វីលីពីនផងដែរ។ ដំណើរទស្សនកិច្ចនាពេលនោះ បានមេដឹកនាំ​កម្ពុជា និងហ្វីលីពីន បានប្រកាសលើកកម្ពស់ទំនាក់ទំនិង និងកិច្ចសហប្រតិបត្តិការ​លើ​វិស័យនានាឱ្យកាន់តែល្អប្រសើរថែមទៀត៕

ដោយ៖ ធឿន វ៉ាន់សុង