ព័ត៌មានជាតិ

ឃាត់ខ្លួនជនសង្ស័យ២នាក់ លួចសម្ភារៈ មានតម្លៃជិត១លានដុល្លារ

បានផុស

៤ years មុន

នៅ

ថ្ងៃព្រហស្បតិ៍ ៨ មេសា ២០២១

ដោយ

ភ្នំពេញ ៖ ជនសង្ស័យចំនួន២នាក់ លួចសម្ភារៈ មានតម្លៃជិត១លានដុល្លារ កាលពីថ្ងៃទី០៩ ខែកុម្ភៈ ឆ្នាំ២០២១ រួចរត់គេចខ្លួនបានមួយរយៈ ហើយក៏ត្រូវសមត្ថកិច្ចវែកមុខឃាត់ខ្លួន បាននៅចំណុចអាផិតមិន លេខ២១ ផ្លូវលេខ៥៧ ក្រុម៤២ ភូមិ៦ សង្កាត់បឹងកង១ ខណ្ឌបឹងកេងកង រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនសង្ស័យទាំង០២នាក់ ទី១ ឈ្មោះ នៅ សុផានី ភេទ ប្រុស អាយុ៣០ឆ្នាំ ជនជាតិខ្មែរ និងទី២ ឈ្មោះ លី សុខលាភ ភេទប្រុស អាយុ៣០ឆ្នាំ ជនជាតិខ្មែរ។ ដោយឃាត់ខ្លួនជនសង្ស័យទាំង០២នាក់នេះធ្វើឡើង រសៀលថ្ងៃទី០៨ ខែមេសា ឆ្នាំ២០២១ នៅចំណុចផ្ទះជួល ផ្លូវ៧៩ ភូមិ ចម្រើនផល សង្កាត់បឹងទំពុន១ ខណ្ឌមានជ័យ រាជធានីភ្នំពេញ។

ជនសង្ស័យទាំង០២នាក់ បានសារភាពថា កាលពី នៅថ្ងៃទី០៩ ខែកុម្ភៈ ឆ្នាំ២០២១ ម៉ោងប្រហែល ០១ទៀបភ្លឺ ឈានចូលថ្ងៃទី១០ ខែកុម្ភៈ ឆ្នាំ២០២១ ពួកខ្លួនពិតជាបានចូលធ្វើសកម្មភាពចូលលួចសម្ភារៈនៅក្នុងអាផិតមិនលេខ២១ ផ្លូវលេខ៥៧ ក្រុម៤២ ភូមិ៦ សង្កាត់បឹងកង១ ខណ្ឌបឹងកេងកង រាជធានីភ្នំពេញ ពិតប្រាកដមែន ដោយយកបានសម្ភារៈរួមមាន Computer, នាទ្បិកាដៃ(តម្លៃ ជាង៦០ម៉ឺន), ទូរសព្ទដៃ , ដង្កាបបត់ និងខ្សែក្រវាត់ ហើយសម្ភារៈមួយចំនួនទុកប្រើ និងមួយចំនួនយកទៅលក់នៅផ្សារឃ្លាំងរំសេវ។

បច្ចុប្បន្នសង្ស័យទាំង០២នាក់ ត្រូវបានកម្លាំងជំនាញនៃនាយកដ្ឋាននគរបាលព្រហ្មទណ្ឌឃាត់ខ្លួនបណ្ដោះអាសន្ន ដើម្បីសាកសួរ និងកសាងសំណុំរឿងបញ្ជូនទៅអយ្យការអមសាលាដំបូងរាជធានីភ្នំពេញ ចាត់ការបន្តតាមនីតិវិធី៕

កែសម្រួលដោយ ៖ នាគព័ន្ធ