ដើម្បីសម្រួលការស្ទះចរាចរណ៍ ស្នងការរាជធានី បន្ថែមចំនួនសមត្ថកិច្ចជំនាញតាមផ្លូវទៅព្រលានយន្តហោះថ្មី

ដើម្បីសម្រួលការស្ទះចរាចរណ៍ណែនណាន់តាន់តាប់   ស្នងការនគរបាលរាជធានីភ្នំពេញ  លោក ជួន ណារិន្ទ សម្រេចបង្កើនចំនួននគរបាលជំនាញនៅតាមផ្លូវទៅអាកាសយានដ្ឋានអន្តរជាតិតេជោបន្ថែមទៀត   និងសុំចិត្តអ្នកធ្វើដំណើរទាំងឡាយ កុំបើកបរជែងគ្នា។  

លោក ជួន ណារិន្ទ ប្រកាសពីវិធានការដោះស្រាយបញ្ហាស្ទះចរាចរណ៍លើដងផ្លូវឆ្ពោះទៅព្រលានយន្តហោះថ្មីតម្លៃជិត២ពាន់លានដុល្លារ ដែលទើបបើកដំណើរដូច្នេះ៖« ខ្ញុំបាទបានបង្កើនកំលាំងជំនាញបន្ថែមសហការណ៌ជាមួយ កំលាំងជំនាញខណ្ឌ ពាក់ព័ន្ឋ ដើម្បីជួយសម្រួលជូនដល់បងប្អូនប្រជាពលរដ្ឋ ភ្ញៀវជាតិ និងភ្ញៀវអន្តជាតិ ឆ្ពោះទៅព្រលានអន្តរជាតិតេជោ។ ដូច្នេះខ្ញុំបាទគោរពស្នើសុំចិត្តដល់បងប្អូនក្នុង ការប្រើប្រាស់ផ្លូវសូមចូលរួមគោរពសិទ្ឋិ កុំជែងគ្នាណាបាទ។»។

អាកាសយានដ្ឋានអន្តរជាតិតេជោ លំដាប់4F សាងសង់នៅលើផ្ទៃដីជាង២ពាន់ហិកតា ចម្ងាយជាង២០គីឡូម៉ែត្រពីរាជធានីភ្នំពេញ  ស្ថិតនៅភូមិសាស្ត្រខេត្តកណ្ដាល និងខេត្តតាកែវ បានបើកដំណើរការកាលពីថ្ងៃទី០៩ ខែកញ្ញា ឆ្នាំ២០២៥ ជាមួយនឹងក្ដីសង្ឃឹមថា អាកាសយានដ្ឋានថ្មីនៅភាគខាងត្បូងរាជធានីភ្នំពេញនេះ នឹងក្លាយជាច្រកដ៏សំខាន់ក្នុងការតភ្ជាប់កម្ពុជា ទៅកាន់ពិភពលោក។ ក្រោយពីបើកដំណើរការ អាកាសយានដ្ឋានដ៏ទំនើបនឹងប្រណិតនេះ​ បានទាក់ចិត្តពលរដ្ឋកម្ពុជា ជាច្រើននាក់ ទៅទស្សនាអំពីសមិទ្ធិផលដ៏ថ្មីសន្លាងមួយនេះ។

ទន្ទឹមនឹងចំនួនអ្នកទៅទស្សនាដ៏ច្រើនសន្ធឹកសណ្ឋាប់ អភិបាលខេត្តកណ្ដាល លោក គួច ចំរើន ប្រកាសតាមទំព័រហ្វេសប៊ុកផ្លូវការថា នៅថ្ងៃអាទិត្យ ទី១៤ ខែកញ្ញា ចំនួនពលរដ្ឋទៅលេងកំសាន្តក្នុងអាកាសយានដ្ឋានអន្តរជាតិតេជោ ណែនណាន់តាន់តាប់ហេីយ បណ្ដាលឱ្យកកស្ទះចរចរាចរណ៍៕

ដោយ៖ ង៉ិល ណារ៉ាត់