ប្រាក់ឈ្នួលរបស់កម្មករក្នុងវិស័យកាត់ដេរ ត្រូវបានដំឡើងដល់ ២១០ដុល្លារ សម្រាប់ឆ្នាំ២០២៦

ប្រាក់ឈ្នួលអប្បបរមារបស់កម្មករនិយោជិតផ្នែកវាយនភណ្ឌ កាត់ដេរ ផលិតស្បែកជើង ផលិតផលិតផលធ្វើដំណើរ និងកាបូប សម្រាប់ឆ្នាំ២០២៦ ត្រូវបានដំឡើងពី ២០៨ដុល្លារ ដល់ ២១០ដុល្លារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការដំឡើងប្រាក់ឈ្នួលកម្មកររោងចក្រដល់២១០ដុល្លារ ជាការសម្រេចរបស់ប្រមុខរាជរដ្ឋាភិបាល ក្រោយភាគីនិយោជក និងភាគីសហជីព បានឯកភាពគ្នាមិនលើកតួលេខណាមួយទេ ដោយទុកការសម្រេចឱ្យរាជរដ្ឋាភិបាល ក្នុងការកំណត់តួលេខប្រាក់ឈ្នួលនេះ។

បន្ទាប់ពីការរាយការណ៍របស់លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ប្រមុខរាជរដ្ឋាភិបាល សម្ដេចធិបតី ហ៊ុន ម៉ាណែត បានសម្រេចកំណត់តួលេខ២១០ដុល្លារអាមេរិកក្នុងមួយខែ ជាប្រាក់ឈ្នួលអប្បបរមារបស់កម្មករក្នុងវិស័យកាត់ដេរសម្រាប់ឆ្នាំ២០២៦ ពោលគឺឡើង២ដុល្លារ បើធៀបនឹងឆ្នាំ២០២៥នេះ មានត្រឹម២០៨ដុល្លារ។

ការសម្រេចរបស់សម្តេចធិបតី ហ៊ុន ម៉ាណែត បានធ្វើឡើងនៅព្រឹកថ្ងៃទី១៧ ខែកញ្ញា ឆ្នាំ២០២៥ ស្របពេលដែលក្រុមប្រឹក្សាជាតិប្រាក់ឈ្នួលអប្បបរមា បានដំណើរការកិច្ចប្រជុំលើកចុងក្រោយរបស់ខ្លួន នៅព្រឹកថ្ងៃនេះដូចគ្នា។

តាមលោករដ្ឋមន្ត្រី ហេង សួរ ប្រាក់ឈ្នួលថ្មីនេះនឹងត្រូវអនុវត្តចាប់ពីថ្ងៃទី១ ខែមករា ឆ្នាំ២០២៦ តទៅ។ បើបូកទាំងអត្ថប្រយោជន៍ផ្សេងទៀត កម្មករនិយោជិតនឹងទទួលបានប្រាក់ឈ្នួលយ៉ាងតិចចន្លោះពី ២២៧ដុល្លារ ដល់ ២៣៨ដុល្លារអាមេរិកក្នុងមួយខែ។

ជាការកត់សម្គាល់ បើទោះបីជាស្ថានភាពសេដ្ឋកិច្ចមានភាពមិនប្រាកដប្រជា ហើយប្រទេសជាច្រើននៅក្នុងតំបន់មិនមានការដំឡើងប្រាក់ឈ្នួលអប្បបរមា ក៏រាជរដ្ឋាភិបាលកម្ពុជាបានដំឡើងប្រាក់ឈ្នួលអប្បបរមាជូនកម្មករនិយោជិត ទោះតិចក្តីច្រើនក្តី សំដៅធ្វើយ៉ាងណាជួយសម្រួលបន្ទុកចំណាយរបស់កម្មករនិយោជិត៕

ដោយ៖ ធឿន វ៉ាន់សុង