​លក្ខណ​វិនិច្ឆ័យ​ចំនួន២នៅបន្តធ្វើជាមូលដ្ឋានក្នុងការចរចាប្រាក់ឈ្នួលកម្មករសម្រាប់ឆ្នាំ២០២៦

គោលការណ៍​លក្ខណ​វិនិច្ឆ័យ​ចំនួន២ នៅតែត្រូវបានកិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមា យកធ្វើជាមូលដ្ឋានក្នុងការពិភាក្សាប្រាក់ឈ្នួលសម្រាប់កម្មករ-និយោជិតក្នុងវិស័យវាយនភ័ណ្ឌ និងកាត់ដេរនៅកម្ពុជា ក្នុងឆ្នាំ២០២៦។

ថ្លែងឱ្យដឹងក្រោយចប់កិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមា អាណត្តិទី៤ លើកទី១ នារសៀលថ្ងៃទី២០ ខែសីហា ឆ្នាំ២០២៥ រដ្ឋមន្ត្រីក្រសួងការងារ លោក ហេង សួរ បានបញ្ជាក់ថា លក្ខណ​វិនិច្ឆ័យ​ទាំង២នេះ គឺទី១លក្ខណវិនិច្ឆ័យបែបសង្គម និងទី២លក្ខណវិនិច្ឆ័យបែបសេដ្ឋកិច្ច។  

តាមការលើកឡើងរបស់លោក ហេង សួរ លក្ខណវិនិច្ឆ័យបែបសង្គម គឺផ្ដោតលើកត្តាស្ថានភាពគ្រួសារ អត្រាអតិផរណា និងការចំណាយក្នុងការរស់នៅ ខណៈលក្ខណវិនិច្ឆ័យបែបសេដ្ឋកិច្ច លើកត្តាផលិតភាព ភាពប្រកួតប្រជែងរបស់ប្រទេស ស្ថានភាពទីផ្សារការងារ និងកម្រិតចំណេញរបស់វិស័យ ដែលការវិនិច្ឆ័យទាំងនេះ គឺជាមូលដ្ឋានគ្រឹះមុនឈានដល់ការកំណត់តួលេខដំឡើងក្នុងកម្រិតណាមួយនោះ។

លោករដ្ឋមន្ត្រីការងារ ថា ស្ថិតិសំខាន់ៗនៃលក្ខណវិនិច្ឆ័យបែបសង្គម និងសេដ្ឋកិច្ច ទាំង៧នេះ សម្រាប់ឱ្យភាគីពាក់ព័ន្ធធ្វើជាមូលដ្ឋានប្រើប្រាស់ក្នុងការចរចាប្រាក់ឈ្នួលអប្បបរមាសម្រាប់ឆ្នាំ២០២៦។ ខណៈភាគីនីមួយៗ បានឯកភាពប្រើប្រាស់ស្ថិតិ និងព័ត៌មាន ដែលមាននៅក្នុងបទបង្ហាញនេះយកទៅពិភាក្សាជាលក្ខណៈផ្ទៃក្នុងរបស់ខ្លួន ដើម្បីបាននូវគោលជំហររួមនៅពេលកិច្ចប្រជុំបន្ទាប់។

ចំពោះកិច្ចប្រជុំបន្ទាប់ គឺភាគីទាំង៣ រួមមានតំណាងរាជរដ្ឋាភិបាល តំណាងភាគីកម្មករ-និយោជិត និងតំណាងនិយោជក បានឯកភាពគ្នារៀបចំកិច្ចប្រជុំប្រាក់ឈ្នួលនេះចំនួន៤លើកទៀត គឺនៅថ្ងៃទី៣ ថ្ងៃទី១០ ថ្ងៃទី១៥ និងលើកចុងក្រោយនៅថ្ងៃទី១៩ ខែកញ្ញា ឆ្នាំ២០២៥ ដោយធ្វើយ៉ាងណាឱ្យសម្រេចចេញនូវលទ្ធផលមុនពិធីបុណ្យភ្ជុំបិណ្ឌមកមុន។

គួរជម្រាបថា នារសៀលថ្ងៃទី២០ ខែសីហា ឆ្នាំ២០២៥ ក្រុមប្រឹក្សាជាតិប្រាក់ឈ្នួលអប្បបរមា បានបើកកិច្ចប្រជុំ ដើម្បីពិភាក្សាកំណត់ប្រាក់ឈ្នួលអប្បបរមារបស់កម្មករ-និយោជិត ដែលធ្វើការក្នុងឧស្សាហកម្មវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរនិងកាបូប សម្រាប់ឆ្នាំ២០២៦៕

ដោយ៖ ធឿន​ វ៉ាន់សុង