ឆ្នាំនេះមានបេក្ខជនប្រឡងជាប់បាក់ឌុបជាង​៨៤% ខ្ពស់ជាងឆ្នាំមុនមានត្រឹមជិត៨០%ប៉ុណ្ណោះ

ក្រសួងអប់រំ យុវជន និងកីឡា បានប្រកាសថា ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ២៨សីហា ២០២៥ មានបេក្ខជនប្រឡងជាប់សរុប ១២២ ៤៧៣ នាក់ ត្រូវជា ៨៤.៥៦ ភាគរយ នៃចំនួនបេក្ខជនមកប្រឡង មានការកើនឡើងខ្ពស់បើធៀបទៅនឹងឆ្នាំមុន ដែលមានបេក្ខជនប្រឡបជាប់ត្រឹមជិត៨០%ប៉ុណ្ណោះ។

ក្រសួងអប់រំបានបន្តថា ក្នុងចំណោមបេក្ខជនប្រឡងជាប់សរុប ១២២ ៤៧៣ នាក់ ក្នុងនោះបេក្ខជនជាប់និទ្ទេស A ចំនួន ៣ ០០៣ នាក់, និទ្ទេស B ចំនួន ៩ ៩០១ នាក់, និទ្ទេស C ចំនួន ២៨ ៨០១ នាក់, និទ្ទេស D ចំនួន ៤៥ ៨៥៩ នាក់, និងនិទ្ទេស E ចំនួន ៣៤ ៩០៩ នាក់។

តួលេខនេះ បើធៀបទៅនឹងឆ្នាំមុនឃើញថា មានការកើនឡើង ខណៈឆ្នាំមុនមានបេក្ខជនប្រឡងជាប់ចំនួន ១០៦ ៣៥១ នាក់ ត្រូវជា ៧៩.០០ % នៃចំនួនបេក្ខជនមកប្រឡងចំនួន ១៣៤ ៦៣៤ នាក់។ ក្នុងនោះមានបេក្ខជនជាប់និទ្ទេស A ចំនួន ២ ២១៦ នាក់, និទ្ទេស B ចំនួន ៩ ៧០១ នាក់, និទ្ទេស C ចំនួន ២២ ៦៧៥ នាក់, និទ្ទេស D ចំនួន ៣៦ ៦៨៣ នាក់, និងនិទ្ទេស E ចំនួន ៣៥ ០៧៦ នាក់។

គួរបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ២៨ សីហា ២០២៥មានបេក្ខជនចុះឈ្មោះប្រឡងចំនួន១៤៦៧២០នាក់ ស្រី៨១៤៤២នាក់ ចែកជា២៤១មណ្ឌល ត្រូវជា៥៩២៤បន្ទប់ ក្នុងនោះបេក្ខជនមកប្រឡងចំនួន១៤៤៨៤៨នាក់ស្រី៨០៦៩១នាក់៕

អត្ថបទ៖ សំអឿន