ពីរថ្ងៃក្នុងឱកាសបុណ្យភ្ជុំបិណ្ឌ ភ្ញៀវទេសចរជាង ១២ម៉ឺននាក់ ដើរកម្សាន្តក្នុងខេត្តបាត់ដំបង

ក្នុងរយៈពេល ២ថ្ងៃនាឱកាសបុណ្យភ្ជុំបិណ្ឌប្រពៃណីជាតិ ចាប់ពីថ្ងៃទី២១ ដល់ថ្ងៃទី២២ ខែកញ្ញា ឆ្នាំ២០២៥ ភ្ញៀវទេសចរជាតិ និងអន្តរជាតិបានមកកម្សាន្តតាមរមណីយដ្ឋាននានាក្នុងខេត្តបាត់ដំបងមានចំនួនជាង ១២មុឺននាក់។

លោក អ៊ុច អ៊ុភីនីហ្សារ៉ា ប្រធានមន្ទីរទេសចរណ៍ខេត្តបាត់ដំបង បានបញ្ជាក់ឲ្យដឹងថា ចំនួនភ្ញៀវទេសចរជាតិ និងអន្តរជាតិដែលចូលមកទស្សនាកម្សាន្តនាឱកាសបុណ្យភ្ជុំបិណ្ឌថ្ងៃទី១ ត្រូវនឹងថ្ងៃទី២១ ខែកញ្ញា ឆ្នាំ២០២៥ ក្នុងខេត្តបាត់ដំបង មានចំនួនទេសចរសរុប ៣៦,១៨៧ នាក់ ថយចុះ ១៩.៧១% បើប្រៀបធៀបនឹងរយៈពេលដូចគ្នាឆ្នាំ២០២៤ មានចំនួន ៤៥,០៧៣ នាក់ ក្នុងនោះភ្ញៀវទេសចរជាតិ មានចំនួន ៣៥,៩៩៣ នាក់ ថយចុះ ១៩.៦៨% បើប្រៀបធៀបនឹងរយៈពេលដូចគ្នាឆ្នាំ ២០២៤ មានចំនួន ៤៤,៨១២ នាក់។ ភ្ញៀវទេសចរអន្តរជាតិ មានចំនួន ១៩៤ នាក់ ថយចុះ ២៥.៦៧% បើប្រៀបធៀបនឹងរយៈពេលដូចគ្នាឆ្នាំ២០២៤ មានចំនួន ២៦១នាក់។

ដោយឡែកនាឱកាសបុណ្យភ្ជុំបិណ្ឌថ្ងៃទី២ ត្រូវនឹងថ្ងៃទី២២ ខែកញ្ញា ឆ្នាំ២០២៥ ក្នុងខេត្តបាត់ដំបង មានចំនួនសរុប មានចំនួន ៩១,១៨៥ នាក់ កើនឡើង ៦.០៨% បើប្រៀបធៀបនឹងរយៈពេលដូចគ្នាឆ្នាំ២០២៤ មានចំនួន ៨៥,៩៥៩ នាក់ ក្នុងនោះភ្ញៀវទេសចរជាតិ មានចំនួន ៩០,៩៧៥ នាក់ កើនឡើង ៦.០៨% បើប្រៀបធៀបនឹងរយៈពេលដូចគ្នាឆ្នាំ ២០២៤ មានចំនួន ៨៥,៧៥៨ នាក់។ ភ្ញៀវទេសចរអន្តរជាតិ មានចំនួន ២១០ នាក់ កើនឡើង ៤.៤៨% បើប្រៀបធៀបនឹងរយៈពេលដូចគ្នាឆ្នាំ ២០២៤ មានចំនួន ២០១ នាក់។

លោកប្រធានមន្ទីរក៏បានលើកឡើងដែរថា បច្ចុប្បន្ននៅក្នុងខេត្តបាត់ដំបង មានរមណីយដ្ឋាន និងកន្លែងកម្សាន្តជាច្រើន ដែលតំបន់ទាំងនោះហើយដែលអាចអូសទាញភ្ញៀវទេសចរជាតិ និងអន្តរជាតិឲ្យចូលមកកម្សាន្តរាល់ពេលដែលមានពិធីបុណ្យម្ដងៗ៕

អត្ថបទ៖ សោ និយមរ័ត្ន