មាតុភូមិនិវត្តន៍ពលករខ្មែរ​ រួមចំណែកដល់ការធ្លាក់ថ្លៃសាច់ជ្រូកថៃ ប៉ះពាល់កសិករ

នាយកដ្ឋានពាណិជ្ជកម្មផ្ទៃក្នុង (DIT) នៃក្រសួងពាណិជ្ជកម្ម​ថៃ បាន​ឱ្យដឹងថា ការធ្វើមាតុភូមិនិវត្តន៍របស់ពលករខ្មែរជុំវិញភាពតានតឹងព្រំដែនកម្ពុជា-ថៃ បាន​រួមចំណែកដល់ការធ្លាក់ចុះនៃតម្លៃសាច់ជ្រូក ដែល​ដាក់សម្ពាធសេដ្ឋកិច្ចលើ​កសិករចិញ្ចឹមជ្រូកថៃ។ នេះបើតាមការចុះផ្សាយរបស់កាសែតបាងកកប៉ុស្តិ៍កាលពីថ្ងៃចន្ទ។

ការឱ្យដឹងយ៉ាងដូច្នេះ ធ្វើឡើងចំពេលដែល DIT បានសហការ​ជាមួយសមាគមអ្នកចិញ្ចឹមជ្រូកថៃ (SRA) ដើម្បី​រៀបចំយុទ្ធនាការលក់សាច់ជ្រូក «គុណភាពល្អ» ១០០ បាត/២ គីឡូក្រាម ទូទាំងប្រទេសថៃ ពេញមួយខែតុលា ក្រោម​គោលដៅធ្វើឱ្យមានតុល្យភាពឡើងវិញនូវតម្រូវការ និងការផ្គត់ផ្គង់សាច់ជ្រូកនៅលើទីផ្សារ ​ក្រោយ​តម្លៃជ្រូកនៅកន្លែងចិញ្ចឹមធ្លាក់ចុះ​។

អគ្គនាយករងរបស់ DIT លោក Yanee Srimanee បាននិយាយថា តម្លៃសាច់ជ្រូក​បានរងសម្ពាធដោយការធ្លាក់ចុះសេដ្ឋកិច្ច ការកាត់បន្ថយអំណាចទិញរបស់អ្នកប្រើប្រាស់ ការធ្លាក់ចុះនៃអាជីវកម្មភោជនីយដ្ឋាន និង​ការធ្វើមាតុភូមិនិវត្តន៍របស់​ពលករកម្ពុជា​ជាដើម។ ក្រសួងការងារកម្ពុជា​បាន​ឱ្យដឹងថា ពលករខ្មែរជិត ៩០០ ០០០ នាក់ បាន​វិលចូលស្រុកវិញ​ គិតត្រឹមថ្ងៃ ៨ សីហា។​

កត្តាទាំងអស់នេះ បានកាត់បន្ថយ​ការប្រើប្រាស់សាច់ជ្រូកក្នុងស្រុកថៃ ដែលបណ្តាលឱ្យការផ្គត់ផ្គង់កើនឡើងលើសតម្រូវការ ហើយធ្វើឱ្យតម្លៃធ្លាក់ចុះក្រោមតម្លៃផលិតកម្មរបស់កសិករចិញ្ចឹមជ្រូក៕