នយោបាយ

សម្ដេចធិបតីប្រាប់ FOX News ថាកម្ពុជាត្រូវការរក្សាតុល្យភាពជាមួយវ៉ាស៊ីនតោន និងប៉េកាំង

បានផុស

៣ ខែ មុន

នៅ

ថ្ងៃសុក្រ ២០ កុម្ភៈ ២០២៦

ដោយ

នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានបញ្ជាក់ទៅសារព័ត៌មាន Fox News ថាទោះបីកម្ពុជាកំពុងស្វែងរកឱ្យមានដំណោះស្រាយព្រំដែនជាថៃ តែកម្ពុជាក៏ត្រូវការតុល្យភាពទំនាក់ទំនងរវាងកម្ពុជា ជាមួយអាមេរិក និងចិនផងដែរ។ សម្ដេចថា ការស្វែងរកទំនាក់ទំនងមហាអំណាចមិនអាចលេងល្បែងឈ្នះចាញ់ទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងបទសម្ភាសន៍ជាមួយ Fox News នឹងត្រូវបានផ្សព្វផ្សាយនៅថ្ងៃសុក្រនេះ សម្ដេចធិបតី ហ៊ុន ម៉ាណែត ថាប្រទេសកម្ពុជាជាប្រទេសតូចមួយដែលមិនអាចមានលទ្ធភាពទៅជ្រើសរើសប្រទេសណាមួយប្រឆាំងនិងប្រទេសផ្សេងទេ។

Fox News បានស្រង់ប្រសាសន៍សម្ដេចថា៖ «ការស្វែងរកទំនាក់ទំនងជាមួយមហាអំណាចពិភពលោកដែលប្រកួតប្រជែងគ្នាយើងមិនអាចលេងល្បែងចាញ់ឈ្នះទេ»។

អស់រយៈពេលជាច្រើនឆ្នាំហើយដែលកំពង់ផែសមុទ្ទរាមក្លាយជាចំណុចដែលប្រទាំងប្រទើសគ្នារវាងកម្ពុជានិងអាមេរិក ក្រោយកម្ពុជាបានរៀបចំសាងសង់និងធ្វើទំនើបកម្មមូលដ្ឋានកងទ័ពជើងទឹកមួយនេះ។ ដោយអាមេរិកបានចោទប្រកាន់ថាកម្ពុជាបានឱ្យចិនដាក់មូលដ្ឋានទ័ពនៅទីនោះ។ យ៉ាងណាក្ដីក្រោយសាងសង់រួចកម្ពុជាបានបើកចំហដល់នាវាចម្បាំងប្រទេសជាមិត្តទាំងអស់បានចូលចត រួមទាំងនាវាចម្បាំងអាមេរិក USS Cincinanati ដែលទើបចូលចតកាលពីខែមករា។

សម្ដេចធិបតី ហ៊ុន ម៉ាណែត បានបញ្ជាក់ទៅ Fox News ថាតាមរយៈទស្សនកិច្ចនេះបានបង្ហាញយ៉ាងច្បាស់ថាមូលដ្ឋានសមុទ្ទរាមមិនត្រូវបានប្រើសម្រាប់កិច្ចសហការជាមួយចិនទេ។

សម្ដេចបានបញ្ជាក់ទៀតថា៖ «រដ្ឋធម្មនុញ្ញរបស់យើងបានចែងថាមិនអនុញ្ញាតឱ្យមានមូលដ្ឋានកងទ័ពបរទេសដាក់លើដីកម្ពុជាទេ»។

ក្នុងជម្លោះព្រំដែនរវាងកម្ពុជា និងថៃ ចាប់តាំងពីខែកក្កដា ឆ្នាំ២០២៥ អាមេរិក និងចិន គឺជាប្រទេសដែលរួមចំណែកធំមួយដល់ការរក្សាបានបទឈប់បាញ់។ នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានលើកឡើងថាទោះបីជាមានការដឹងឮពីមហាអំណាចក្ដីក៏ថៃនៅតែឈ្លានពានលើដីកម្ពុជារំលោភលើបទបាញ់ដែលសម្រេចបានដដែលដោយបានរាយបន្លាលួស ដាក់កុងតឺន័រ ហាមពលរដ្ឋខ្មែរជាង៨ម៉ឺនមិនឱ្យទៅកាន់ភូមិឋានរបស់ពួកគេវិញ៕