ព័ត៌មានជាតិ

គ.ជ.ប រាជធានីថា តំណាងគណបក្ស LDP បានធ្វើឲ្យប៉ះពាល់សេចក្តីថ្លៃថ្នូរដល់ឯកជនភាព និងស្ថាប័នមានសមត្ថកិច្ច

បានផុស

៤ years មុន

នៅ

ថ្ងៃសុក្រ ៤ ធ្នូ ២០២០

ដោយ

លេខាធិការដ្ឋានរៀបចំការបោះឆ្នោត រាជធានីភ្នំពេញ បានអះអាងថា សកម្មភាពរបស់តំណាងគណបក្សសម្ព័ន្ធដើម្បីប្រជាធិបតេយ្យ (LDP) មិនត្រឹមត្រូវ ដោយបានថតបង្ហោះលើបណ្តាញសង្គម ធ្វើឲ្យប៉ះពាល់ដល់កិត្តិយស និងសេចក្តីថ្លៃថ្នូរដល់ឯកជនភាព និងស្ថាប័នមានសមត្ថកិច្ច ប៉ុន្តែស្ថាប័ននេះ មិនបានបញ្ជាក់ថា ត្រូវប្តឹង ឬយ៉ាងណានោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងរបស់លេខាធិការដ្ឋានរៀបចំការបោះឆ្នោត រាជធានីភ្នំពេញ បានធ្វើឡើងបន្ទាប់ពីតំណាងគណបក្សសម្ព័ន្ធដើម្បីប្រជាធិបតេយ្យ បានចោទតំណាង គ.ជ.ប និងអាជ្ញាធរ សង្កាត់និរោធថា បានឃុបឃិតគ្នាគំរាមកំហែងតំណាងគណបក្សសម្ព័ន្ធដើម្បីប្រជាធិបតេយ្យ នៅក្នុងកិច្ចប្រជុំសម្រេចបណ្តឹងជំទាស់លេខ០០១ ចុះថ្ងៃទី៣០ ខែវិច្ឆិកា ឆ្នាំ២០២០ ដែលប្តឹងដោយលោក ស៊ុន ហ៊ី ឲ្យលុបឈ្មោះប្រជាពលរដ្ឋចំនួន៩០នាក់ ចេញពីបញ្ជីបោះឆ្នោតដំបូង។

លេខាធិការដ្ឋានរៀបចំការបោះឆ្នោត រាជធានីភ្នំពេញ បញ្ជាក់ថា នៅក្នុងកិច្ចប្រជុំសម្រេចរបស់ក្រុមប្រឹក្សាសង្កាត់និរោធ ពុំមានតំណាង គ.ជ.ប ឬមន្ត្រីលេខាធិការដ្ឋានរៀបចំការបោះឆ្នោតរាជធានីភ្នំពេញ ចូលរួមក្នុងកិច្ចប្រជុំនោះទេ ហើយនៅក្នុងកិច្ចប្រជុំនោះ តំណាងគណបក្សសម្ព័ន្ធដើម្បីប្រជាធិបតេយ្យ មិនបានស្វែងរកភស្តុតាងមកបង្ហាញដល់អង្គប្រជុំទេ តែបែរជាសុំថតរាល់ឯកសាររបស់អ្នកចុះឈ្មោះបោះឆ្នោតទាំងអស់ ពីក្រុមប្រឹក្សាប្រជុំសម្រេចវិញ។

បើតាមលេខាធិការដ្ឋានរៀបចំការបោះឆ្នោត រាជធានីភ្នំពេញ នៅក្នុងកិច្ចប្រជុំនោះ តំណាងគណបក្សសម្ព័ន្ធដើម្បីប្រជាធិបតេយ្យ មិនបានអនុវត្តតាមបទបញ្ជាផ្ទៃក្នុង នៃអង្គប្រជុំ ដូចជាការហាមថត ឬអាត់សំឡេង ការប្រើប្រាស់ទូរសព្ទដៃជាដើមនោះទេ ហើយការចោទប្រកាន់លោក ឈុន ឃាង ថាជាតំណាង គ.ជ .ប មិនពិតនោះទេ។

សូមបញ្ជាក់ថា លោក ឈុន ឃាង ត្រូវបានបញ្ចប់កិច្ចសន្យាបម្រើការងារ នៅលេខាធិការដ្ឋានរៀបចំការបោះឆ្នោតរាជធានីភ្នំពេញ ចាប់ពីថ្ងៃទី៣១ ខែតុលា ឆ្នាំ២០២០ មកម្ល៉េះ ប៉ុន្តែលោក ឈុន ឃាង ត្រូវបានអញ្ជើញឲ្យចូលរួម នៅក្នុងកិច្ចប្រជុំសម្រេចនោះ ហើយលោក ឈុន ឃាង មិនបានចូលរួមយោបល់ ឬបញ្ចេញមតិនៅក្នុងកិច្ចប្រជុំសម្រេចទេ ប៉ុន្តែលោក ឈុន ឃាង បានលើកឡើងអំពីបទបញ្ជាផ្ទៃក្នុង នៅក្រៅអង្គប្រជុំ ហើយក៏គ្មានសិទ្ធបញ្ជាសមត្ថកិច្ចដែរ ដូចនេះលេខាធិការដ្ឋានរៀបចំការបោះឆ្នោតរាជធានីភ្នំពេញយល់ឃើញថា ការចោទប្រកាន់របស់តំណាងគណបក្សសម្ព័ន្ធដើម្បីប្រជាធិបតេយ្យនេះ គឺពុំត្រឹមត្រូវទេ ព្រោះថា ក្រុមប្រឹក្សាសង្កាត់បានអនុវត្តតាមគោលការណ៍ បទបញ្ជា និងនីតិវិធីរបស់ គ.ជ .ប ។

បើតាមលេខាធិការដ្ឋានរៀបចំការបោះឆ្នោត រាជធានីភ្នំពេញ ការថតបង្ហោះ លើបណ្ដាញសង្គមរបស់តំណាងគណបក្សសម្ព័ន្ធដើម្បីប្រជាធិបតេយ្យ គឺជាការធ្វើឲ្យប៉ះពាល់កិត្តិយស និងសេចក្តីថ្លៃថ្នូរដល់ឯកជនភាព និងស្ថាប័នមានសមត្ថកិច្ច៕

អត្ថបទ៖ កោះកែវ

សូមចុចអាន៖ លោក គង់ គាំ ផ្ញើសារអបអរសាទរសម្ព័ន្ធភាពរបស់គណបក្សនយោបាយ៣ ដែលនឹងប្រកាសជាផ្លូវការនៅពេលឆាប់ៗខាងមុខ

Related Topics:គណបក្សសម្ព័ន្ធដើម្បីប្រជាធិបតេយ្យ