សន្តិសុខសង្គម

សកម្មជន LDP ជាង១០០០នាក់ នៅក្រាញននៀលស្ម័គ្រចិត្តរស់នៅក្នុងចំការម្រេចលោកខឹម វាសនា

បានផុស

៤ years មុន

នៅ

ថ្ងៃអង្គារ ៦ កញ្ញា ២០២២

ដោយ

សៀមរាប ៖ គិតត្រឹមល្ងាចថ្ងៃទី៦ខែកញ្ញានេះ ពលរដ្ឋជាង១០០០នាក់ កំពុងបន្តក្រាញននៀលស្ម័គ្រចិត្តរស់នៅក្នុងចម្ការម្រេចលោកខឹម វាសនា ដោយមិនព្រមចាកចេញទៅណានោះទេ។ ប៉ុន្តែពេលនេះសមត្ថកិច្ចបានធ្វើស្ថិតិពលរដ្ឋរួចរាល់ហើយផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមត្ថកិច្ចខេត្តសៀមរាប បានឲ្យដឹងថា គិតត្រឹមថ្ងៃទី០៦ខែកញ្ញាឆ្នាំ២០២២នេះ ពលរដ្ឋដែលសមត្ថកិច្ចស្ថិតិរួចរាល់គឺមានចំនួន៣៣៥ គ្រួសារស្មើនឹង១,៧៣៧ នាក់ ស្រី៧៩៥ នាក់,អនីតិជនចំនួន៤០០នាក់,នីតិជនចំនួន១៣៣៧ នាក់។

សមត្ថកិច្ចបន្ថែមថា ពលរដ្ឋចំនួន១១៥នាក់ បានសំណូមពរឲ្យជួយស្វែងរក ចំនួន២៤០នាក់,នីតិជនចំនួន១៤៨ នាក់ និងអនីតិជនចំនួន៩២ នាក់។

សមត្ថកិច្ចបញ្ជាក់ថា ពលរដ្ឋដែលកំពុងស្នាក់នៅចំការលោកខឹម វាសនាចំនួនជាង១០០០នាក់នេះគឺពួកគាត់ព្រមស្នាក់នៅហើយដោយគ្មានការបង្ខិតបង្ខំពី បុគ្គលណានោះទេ។ គឺពួកគាត់ស្ម័គ្រចិត្តនៅដោយខ្លួនឯង។ សមត្ថកិច្ចបញ្ជាក់ថា ចំណាត់ការបន្តគឺរង់ចាំបញ្ជាពីថ្នាក់លើសិនថា ត្រូវធ្វើយ៉ាងណាបន្តទៀត។

ទោះបីជាយ៉ាងណា សមត្ថកិច្ចនៅតែបន្តការពារពលរដ្ឋដែលកំពុងស្នាក់នៅក្នុងចំការលោកខឹម វាសនា ដដែល ហើយចំពោះការដែលត្រូវដកកម្លាំងនៅពេលណានោះ គឺមិនទាន់ដឹងនៅឡើយទេ។

សូមរំលឹកផងដែរថា ការឃោសនារបស់លោកខឹមវាសនា ថាមានលិចលង់ភពផែនដី ដោយអះអាងថា មានតែចំការម្រេចរបស់លោកនៅជិតភ្នំគូលែនទេ ដែលអាចឲ្យពលរដ្ឋចៀសផុតពីសេចក្តីស្លាប់បាន។ ការលើកឡើងរបស់លោកខឹមវាសនា នៅក្នុងបណ្ដាញសង្គមហ្វេសប៊ុក បែបនេះបានធ្វើឲ្យពលរដ្ឋទាំងក្នុងនិងក្រៅប្រទេស នាំគ្នាសម្រុកមករស់នៅក្នុងចំការម្រេចលោកខឹម វាសនា ប្រមាណជាជិត ២ម៉ឺននាក់ ហើយបច្ចុប្បន្ននេះពលរដ្ឋបានយល់ព្រមចាកចេញទៅវិញជិតអស់ហើយ នៅសល់តែជាងមួយពាន់នាក់តែប៉ុណ្ណោះ ដែលនៅក្រាញននៀលមិនព្រមចាកចេញ៕

ដោយ ៖ កុសល