ព្រះអង្គម្ចាស់ ចក្រាវុធ ប្រកាសការពារគណបក្សហ៊្វុនស៊ិនប៉ិច ឲ្យបានគង់វង្សជាអមតៈ

ព្រះអង្គម្ចាស់ នរោត្តម ចក្រាវុធ ដែលទើបត្រូវបានជ្រើសតាំង ជាព្រះប្រធានគណបក្សហ៊្វុនស៊ិនប៉ិច កាលពីពេលថ្មីៗនេះ បានប្រកាសការពារគណបក្សហ៊្វុនស៊ិនប៉ិច ឲ្យបានគង់វង្សជាអមតៈ។

ការប្រកាសនេះ គ្រាដែលព្រះអង្គម្ចាស់ នរោត្តម ចក្រាវុធ នៅថ្ងៃទី ១១ ខែកុម្ភៈ ឆ្នាំ ២០២២នេះ បានយាងជួបសំណេះ សំណាល សួរសុខទុក្ខ ថ្នាក់ដឹកនាំខេត្ត ក្រុង/ស្រុក ឃុំ/សង្កាត់ ជារចនាសម្ព័ន្ធ ពេលព្រឹក ក្នុងស្រុកព្រៃនប់ និងពេលរសៀល នៅទីស្នាក់ការគណបក្ស ក្រុងព្រះសីហនុ។

នៅក្នុងឱកាសនោះ ព្រះអង្គម្ចាស់ នរោត្តម ចក្រាវុធ បានថ្លែងនូវការកោតសរសើរ ចំពោះទឹកចិត្តដ៏អង់អាចក្លាហាន របស់សហជីវិន-សហជីវិនី ដែលបានចូលរួមយ៉ាងសកម្ម ជាមួយគណបក្សហ៊្វុនស៊ិនប៉ិច និងបានដង្ហែតាមសម្តេចក្រុមព្រះ ជារៀងរហូតមក។

ជាមួយគ្នានេះ ក្នុងឋានៈព្រះអង្គម្ចាស់ នរោត្តម ចក្រាវុធ ជាព្រះប្រធានគណបក្សហ៊្វុនស៊ិនប៉ិច បន្តពីព្រះបិតារបស់ព្រះអង្គ នឹងការពារគណបក្សហ៊្វុនស៊ិនប៉ិច ឲ្យបានគង់វង្សជាអមតៈ។ បន្ថែមពីលើនេះ ព្រះអង្គ ក៏បានបន្តអំពាវនាវ ឲ្យបានថ្នាក់ដឹកនាំក្នុងខេត្ត ត្រូវប្រមែលប្រមូលអ្នករាជានិយម អ្នកសីហនុនិយ​ម អ្នករណឫទ្ធិនិយម រួបរួមគ្នា សាមគ្គីគ្នា ដើម្បីគណ បក្សហ៊្វុនស៊ិនប៉ិច ទទួលបានការគាំទ្រសាជាថ្មី៕

អត្ថបទ៖ ឃួន សុភ័ក្រ