៨ថ្ងៃ គ.ជ.ប ទទួលស្គាល់ជាផ្លូវការគណបក្ស ១ និងកំពុងពិនិត្យ ១ទៀត សម្រាប់ការបោះឆ្នោតព្រឹទ្ធសភា

គណៈកម្មាធិការជាតិរៀបចំការបោះឆ្នោត (គ.ជ.ប) បានចេញសេចក្ដីប្រកាសព័ត៌មាន ស្ដីពី លទ្ធផលបណ្ដោះអាសន្នរយៈពេល ៨ថ្ងៃ នៃការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ សម្រាប់ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី ៥ ឆ្នាំ ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្ដីប្រកាសព័ត៌មាន នៅថ្ងៃទី ៥ ខែធ្នូ ឆ្នាំ ២០២៣នេះ បានឲ្យដឹងថា គិតត្រឹមថ្ងៃទី ៤ ខែធ្នូ ឆ្នាំ ២០២៣ វេលាម៉ោង ៥ និង ៣០នាទីល្ងាច គ.ជ.ប បានសម្រេចទទួលស្គាល់ជាផ្លូវការ លើពាក្យស្នើសុំចុះបញ្ជីរបស់គណបក្សនយោបាយចំនួន ១ និងកំពុងពិនិត្យលើពាក្យសុំចុះបញ្ជីចំនួន ១ ផ្សេងទៀត។

គណបក្សនយោបាយ ដែល គ.ជ.ប សម្រេចទទួលស្គាល់រួចហើយនោះ គឺគណបក្សប្រជាជនកម្ពុជា ដែលបានដាក់មណ្ឌលឈរឈ្មោះចំនួន ៨ភូមិភាគ និងមានបេក្ខជនសរុបចំនួន ១១៦រូប។ ចំណែកគណបក្សនយោបាយ ដែល គ.ជ.ប កំពុងពិនិត្យនោះ គឺគណបក្សឆន្ទៈខ្មែរ ដែលបានដាក់មណ្ឌលឈរឈ្មោះចំនួន ៨ភូមិភាគ ហើយក៏បានដាក់បេក្ខជនសរុបចំនួន ១១៦រូប ដែរ។

ការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ សម្រាប់ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី ៥ ឆ្នាំ ២០២៤ មានរយៈពេល ១៥ថ្ងៃ គឺចាប់ពីថ្ងៃទី ២៧ ខែវិច្ឆិកា ដល់ថ្ងៃទី ១១ ខែធ្នូ ឆ្នាំ ២០២៣។

យោងតាមប្រតិទិន នៃការបោះឆ្នោត គឺការបោះឆ្នោតជ្រើសតាំងសមាជិកព្រឹទ្ធសភា នីតិកាលទី ៥ នឹងប្រព្រឹត្តទៅនៅថ្ងៃអាទិត្យ ទី ២៥ ខែកុម្ភៈ ឆ្នាំ ២០២៤ខាងមុខនេះ៕