អ្នកនាំពាក្យ៖ ការចោទរាជរដ្ឋាភិបាលធ្វើទុក្ខបុកម្នេញសកម្មជននយោបាយ គ្រាន់តែជាលេសចង់ ទៅនៅប្រទេសទី៣  

ការចោទប្រកាន់​ និងមួលបង្កាច់មកលើរាជរដ្ឋាភិបាល ថា ធ្វើទុក្ខបុកម្នេញលើសកម្មជននយោបាយប្រឆាំង គឺគ្រាន់តែជា លេស ដើម្បីពួកគេអាចសុំសិទ្ធិទៅជ្រកកោននៅប្រទេសទី៣ប៉ុណ្ណោះ។ នេះជាការឆ្លើយតបរបស់ប្រធានអង្គភាពអ្នកនាំពាក្យរាជរដ្ឋាភិបាលកម្ពុជា លោក ប៉ែន បូណា ទៅកាន់ការលើកឡើងរបស់ក្រុមប្រឆាំង។ លោក ប៉ែន បូណា ថា នេះជារឿងហួសសម័យហើយ។

ការប្រតិកម្មតបពីសំណាក់អ្នកនាំពាក្យរាជរដ្ឋាភិបាលពេលនេះ ក្រោយសកម្មជននយោបាយប្រឆាំងចំនួន៣នាក់ ត្រូវបានអាជ្ញាធរថៃចាប់ខ្លួន កាលពីថ្ងៃទី២ ខែកុម្ភៈ ឆ្នាំ២០២៤។ ជុំវិញការចាប់ខ្លួនសកម្មជនទាំង៣នាក់នៅលើទឹកដីថៃនេះ ត្រូវបានមន្ត្រីបក្សប្រឆាំង​ និងក្រុមសង្គមស៊ីវិលមមួយចំនួន បែរជាចោទប្រកាន់មកលើរាជរដ្ឋាភិបាលកម្ពុជា ថា កំពុងតាមធ្វើទុក្ខបុកម្នេញ និងជាការទប់ស្កាត់កម្លាំងបាតុកម្មប្រឆាំងនឹងវត្តមានសម្ដេចធិបតី ហ៊ុន ម៉ាណែត ដែលគ្រោងបំពេញទស្សនកិច្ចនៅប្រទេសថៃ នៅថ្ងៃទី៧ ខែកុម្ភៈនេះ។

លោក ប៉ែន បូណា បានអះអាងថា ការខិតខំមួលបង្កាច់រាជរដ្ឋាភិបាល ពីបទធ្វើទុក្ខបុកម្នេញ គឺដើម្បីជាលេស​ គ្រាន់តែដើម្បីទៅរស់នៅប្រទេសទី៣ ហើយលោក ចាត់ទុកថា នេះគឺជារឿងដែលមិនអាចទៅរួចទៀតឡើយ ពីព្រោះប្រទេសទី៣ នោះ គេមិនចេះតែយកទេ។ ផ្ទុយទៅវិញ លោក ប៉ែន បូណា បានគូសរំលេចពីទិដ្ឋភាពនៅកម្ពុជា ជាប្រទេសដែលមានសុខសន្តិភាពពេញលេញ មានការអភិវឌ្ឍលើគ្រប់វិស័យ ជាពិសេសប្រជាពលរដ្ឋមានការរស់នៅសម្បូរសប្បាយ ប្រកបដោយសិទ្ធិសេរីភាព មិនដូចការចោទប្រកាន់របស់ក្រុមប្រឆាំងទាំងនោះឡើយ។

អ្នកនាំពាក្យរាជរដ្ឋាភិបាលកម្ពុជារូបនេះ បានគូសបញ្ជាក់បន្តថា ជាធម្មតានៅក្នុងប្រទេសនីមួយៗ តែងមានច្បាប់របស់ប្រទេសរៀងៗខ្លួន កាលណាបើបុគ្គលណាទៅរស់នៅប្រទេសគេដោយខុសច្បាប់​ ឬក៏ទៅនៅលើទឹកដីគេហើយ បុគ្គលនោះប្រព្រឹត្តអំពើខុសច្បាប់ណាមួយរបស់ប្រទេសគេ គឺអាជ្ញាធរនៃប្រទេសនោះ នឹងចាត់វិធានការជាធរមាន។

ដូច្នេះ លោក ថា ការចាប់ខ្លួនសកម្មជនបក្សប្រឆាំងនេះ គឺដោយសារតែបុគ្គលទាំងនោះ បានទៅរស់នៅដោយខុសច្បាប់នៅលើទឹកដីប្រទេសថៃ ជាហេតុដែលអាជ្ញាធរថៃ ត្រូវតែចាត់វិធានការតាមច្បាប់របស់ប្រទេសថៃ។ សកម្មជនទាំង៣នាក់ដែលជាជនភៀសខ្លួន ត្រូវអាជ្ញាធរថៃចាប់ខ្លួននោះ រួមមាន លោក គង់ រ៉ៃយ៉ា និងលោក ផន ផាន់ណា ជាអតីតសមាជិកគណបក្សភ្លើងទៀន និងម្នាក់ទៀតឈ្មោះ លឹម សុខា ជាអនុប្រធានគណកម្មការជនភៀសខ្លួនខ្មែរនៅបាងកក៕