សម្ដេចធិបតី ចំអកទៅកាន់ទណ្ឌិតសម រង្ស៊ី ថា «រដ្ឋាភិបាលគណបក្សប្រជាជនកម្ពុជា មិនមែនជារដ្ឋាភិបាលហ្វេសប៊ុកនោះទេ»

សម្ដេចធិបតី ហ៊ុន​ ម៉ាណែត ប្រមុខរាជរដ្ឋាភិបាល និងជាអនុប្រធានគណបក្សប្រជាជនកម្ពុជា​ បានចំអកទៅកាន់ទណ្ឌិត សម រង្ស៊ី និងបក្សពួកដែលបង្កើតរដ្ឋាភិបាលនិរទេសនៅបរទេស ថា រដ្ឋាភិបាលដឹកនាំដោយគណបក្សប្រជាជនកម្ពុជា មិនមែនជារដ្ឋាភិបាលហ្វេសប៊ុកនោះទេ។​ សម្ដេចធិបតី ថ្លែងចំអកទៅកាន់ទណ្ឌិត សម រង្ស៊ី និងបក្សពួកដូច្នេះ តាមរយៈកម្មវិធីប្រកាសខេត្តកំពង់ចាមបញ្ចប់ការវាស់វែងដីធ្លីមានលក្ខណៈជាប្រព័ន្ធ និងពិធីចែកបណ្ណកម្មសិទ្ធិដីធ្លី នាព្រឹកថ្ងៃទី២១ ខែធ្នូ ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្ដេចធិបតី ហ៊ុន ម៉ាណែត ចំអកដូច្នេះ បន្ទាប់ពីសម្ដេចបានសង្កេតឃើញថា ទណ្ឌិត សម រង្ស៊ី បានប្រកាសដោយខ្លួនឯងនៅលើទំព័រហ្វេសប៊ុកថាជានាយករដ្ឋមន្ត្រីកម្ពុជា តាំងតែពីឆ្នាំ២០១៣មក។

មុននឹងចំអកទៅកាន់ទណ្ឌិត សម រង្ស៊ី, នៅក្នុងពិធីប្រកាសខេត្តកំពង់ចាមបញ្ចប់ការវាស់វែងដីធ្លីមានលក្ខណៈជាប្រព័ន្ធ សម្ដេចធិបតី ក៏បានឡើងថា ការឈានទៅបញ្ចប់ និងដោះស្រាយ ជម្លោះ វិវាទ ដីធ្លី គឺធ្វើឡើងតាមវិធីសាស្ត្រក្បួនខ្នាតត្រឹមត្រូវ មិនដោះស្រាយតាមហ្វេសប៊ុកទេ ហើយរដ្ឋាភិបាលមិនដោះស្រាយតាមយន្តការស្រែកឡូឡានោះដែរ ពោលគឺដោះស្រាយតាមយន្តការពិត ក្រុមការងារពិត ទម្លាក់ថវិកា ដាក់គោលនយោបាយ ដាក់បច្ចេកវិទ្យាពិត វាស់វែងពិត ធ្វើបានពិត ចែកពិតជូនប្រជាពលរដ្ឋ មិនមែនចែកលើហ្វេសប៊ុកនោះទេ។​

ជាការចំអកទៅកាន់ទណ្ឌិត សម រង្ស៊ី និងក្រុមបង្កើតរដ្ឋាភិបាលនិរទេស សម្ដេចធិបតី ចំអកដូច្នេះ៖« រដ្ឋាភិបាលដឹកនាំដោយគណបក្សប្រជាជនកម្ពុជា មិនមែនជារដ្ឋាភិបាលតាមហ្វេសប៊ុកទេ យើងធ្វើអី ធ្វើពិតជាក់ស្ដែងលើដីជូនប្រជាពលរដ្ឋ ព្រោះឥឡូវមានគេបង្កើតរដ្ឋាភិបាលនិរទេស ឥឡូវប្រុងបង្កើតស្អីឯណាទៀត ហ្វេសប៊ុកទាំងអស់! ​មានអ្នកខ្លះហ្នឹងធ្វើនាយករដ្ឋមន្ត្រីហ្វេសប៊ុកតាំងពី២០១៣មក ប្រកួតជាមួយសម្ដេចតេជោ។ ឥឡូវធ្វើនៅលើហ្វេសប៊ុកទៀតចុះ ធ្វើចុះតាមហ្វេសប៊ុក! គណបក្សប្រជាជន អត់មានពេលនិយាយតាមហ្វេសប៊ុកទេ»។

ចំពោះការងារចុះបញ្ជីរដីធ្លី សម្ដេចធិបតី​ ហ៊ុន ម៉ាណែត បានឱ្យដឹងថា រយៈពេល១៦ខែមកនេះ រដ្ឋាភិបាលភិបាលបានបញ្ជូនមន្ត្រីជាង៥ពាន់នាក់ ដើម្បីជំរុញការដោះស្រាយជម្លោះដីធ្លី ជាមួយនឹងការបង្កើនថវិកាបន្ថែមទៀត ក្នុងគោលដៅដោះស្រាយបញ្ហាដីធ្លីរបស់ពលរដ្ឋឱ្យបានឆាប់រហ័ស៕

ដោយ៖ ង៉ិល ណារ៉ាត់