សម្ដេចតេជោ ព្រមានឱ្យមេក្រុមជ្រុលនិយម សិន្ធិលឹមថោងគុល ភ្លឺភ្នែកថា៖«ហ៊ុន សែន មិនទាន់អស់អំណាចនៅឡើយទេ»

រដ្ឋបុរសខ្លាំងនៅកម្ពុជា សម្ដេចតេជោ ហ៊ុន សែន នាយឧត្ដមសេនីយ៍ផុតលេខផ្កាយមាស៥ នៅថ្ងៃចន្ទ ទី១៦​​ ខែមិថុនា នេះ បានព្រមានខ្លាំងៗទៅកាន់មេក្រុមជ្រុលនិយម  សិទ្ធិលឹមថោងគុល ដែលយកខ្មែរធ្វើជាសត្រូវ ថា នៅកម្ពុជាសម្ដេច គឺមិនទាន់អស់អំណាចទេ ត្បិតបច្ចុប្បន្នបានចាកចេញពីតំណែងនាយករដ្ឋមន្ត្រីកម្ពុជាក៏ដោយ។ សម្ដេច ថែមទាំងប្រាប់ទៅកាន់លោក លឹមសិទ្ធិលឹមថោងគុល ត្រូវបើកភ្នែក ស្វែងយល់ឱ្យច្បាស់អំពីគោរពងារ «តេជោ» ដែលព្រះមហាក្សត្រព្រះរាជទានឱ្យ ព្រោះព្រះមហាក្សត្រ មិនមែនព្រះរាជទានឱ្យដោយចៃដន្យនោះទេ។

ថ្លែងពីវិមានព្រឹទ្ធសភា សម្ដេចតេជោ  ថ្លែងខ្លាំងយ៉ាងដូច្នេះ៖«សិន្ធិ លឹមថោងគុល លោកឯងមិនទាន់ស្គាល់ ហ៊ុន សែន ច្បាស់ទេ! ឥឡូវ ហ៊ុន សែន ដកខ្លួនចេញពីតំណែងនាយករដ្ឋមន្ត្រី ប៉ុន្តែ ហ៊ុន សែន ឈររឹងមាំ នៅក្នុងអំណាចនៅកម្ពុជា សុំអ្នកឯងកុំភាន់ច្រឡំ។ ហ៊ុន សែន មិនទាន់អស់អំណាចនៅឡើយទេ ហើយអ្នកឯងត្រូវស្គាល់គោរមងារ “តេជោ” ដែលព្រះមហាក្សត្រប្រោសព្រះរាជទាន។ អ្នកកុំចង់ព្រហើនជាមួយកម្ពុជា ហើយមើលស្រាលចំពោះកម្ពុជា»។

សម្ដេច ព្រមាន មេជ្រុលនិយមថៃ សិន្ធិ លឹមថោងគុលដូច្នេះ បន្ទាប់ពីបុគ្គលនេះ ប្រកាសយកកម្ពុជា ធ្វើជាសត្រូវ បញ្ឆេះកំហឹងជាតិសាសន៍ឱ្យជនជាតិថៃស្អប់ខ្មែរ។ នេះ មិនមែនជាលើកទី១ឡើយ ដែល សិន្ធិលឹមថោងគុល ធ្វើទង្វើបែបនេះ ដាក់កម្ពុជា ត្បិតកាលពីសង្គ្រាមក្នុងឆ្នាំ២០០៨ មេជ្រុលជ្រុលនិយមរូបនេះ ញុះញង់ឱ្យកងទ័ពថៃវាយប្រហារយកទឹកដីកម្ពុជា ឈ្លានពានយកឱ្យបានប្រាសាទអង្គរវត្ត។

ជាមួយគ្នា សម្ដេចតេជោ ហ៊ុន សែន ផ្ដាំផ្ញើទៅបុគ្គល ចតុផន ព្រំផាន  មេក្រុមអាវក្រហម និយាយស្ដីឱ្យសមរម្យបន្តិច ព្រោះតែទម្រាំមានជីវិតរស់រានដល់សព្វថៃ ហើយអាចបកខ្លួនមកវាយប្រហារកម្ពុជាវិញនាពេលនវ គឺដោយសារ សម្ដេច ធ្លាប់ផ្ដល់ឱ្យអាហារហូបចុក  រួមទាំងការស្នាក់នៅលើដីកម្ពុជានាពេលកន្លងទៅ។

សម្ដេចតេជោ ហ៊ុន សែន ផ្ដាំទៅកាន់ សិន្ធិលឹមថោងគុល និងក្រុមជ្រុលនិយមនៅថៃថា កម្ពុជា មិនមែនជាចេកដែលងាយស្រួលទទួលទានទេ និងចាត់ទុកថា ក្រុមជ្រុលនិយមនៅថៃកំពុងតែមើលមកកម្ពុជាក្នុងផ្លូវខុសហើយ។

ស្របពេលបញ្ហាព្រំដែននៅតែបន្តតានតឹង សម្ដេចតេជោ ហ៊ុន សែន បន្តអំពាវនាវដល់ជនរួមជាតិកុំឱ្យធ្វើ សកម្មភាពជ្រុលនិយម ដូចក្រុមរបស់ សិន្ធិលឹមថោងគុល យកប្រទេសផ្សេងធ្វើជាសត្រូវ៕

ដោយ​៖ ង៉ិល ណារ៉ាត់