នយោបាយ

សម្ដេចតេជោអំពាវនាវពលរដ្ឋកុំចូលអន្ទាក់សត្រូវដែលចង់ឱ្យកម្ពុជាមានបញ្ហាជាមួយអាមេរិក

បានផុស

១១ ខែ មុន

នៅ

ថ្ងៃចន្ទ ១៨ សីហា ២០២៥

ដោយ

ក្រុមឧត្តមប្រឹក្សាផ្ទាល់ព្រះមហាក្សត្រ និងជាប្រធានព្រឹទ្ធសភាកម្ពុជា សម្ដេចតេជោ ហ៊ុន សែន អំពាវនាវដល់ប្រជាពលរដ្ឋរក្សាភាពស្ងប់ស្ងាត់ និងពិចារណាឱ្យបានដឹតដល់ករណីដែលក្រុមហ៊ុនកូកាកូឡាផ្ដាច់កុងត្រាតារាចម្រៀងវណ្ណដា។ សម្ដេចតេជោថាសត្រូវកំពុងរុញឱ្យកម្ពុជាក្លាយជាសត្រូវជាមួយអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងការឆ្លើយតបកាលពីយប់កណ្ដាលអាធ្រាតឈានចូលថ្ងៃទី១៨ ខែសីហានេះ សម្ដេចតេជោ ហ៊ុន សែន បានសរសេរថា ថៃបានព្យាយាមវាយបំបាក់សេដ្ឋកិច្ចខ្មែរតាំងពីដំបូងរាប់ចាប់តាំងពីការគំរាមកាត់ផ្ដាច់អគ្គិសនី អ៊ិនធើណិត ឈប់លក់ប្រេង តែមិនអាចបំបាក់បានដោយកម្ពុជាសម្រេចចិត្តបានមុន។ ពេលនេះសត្រូវបានរុញឱ្យកម្ពុជាមានបញ្ហាជាមួយក្រុមហ៊ុនអាមេរិកម្ដងដែលធ្វើឱ្យក្រុមហ៊ុននេះមានបញ្ហាជាមួយតារាចម្រៀងវណ្ណដាកម្ពុជា។

សម្ដេចថា៖ «គេរុញយើងឲ្យធ្វើជាសត្រូវជាមួយអាមេរិកតែម្តងដែលរឿងនេះវាបង្កើតនូវបញ្ហាខាងការទូតសេដ្ឋកិច្ច ពាណិជ្ជកម្ម វិនិយោគរវាងកម្ពុជាជាមួយអាមេរិកតែម្តង។សូមកុំចូលអន្ទាក់របស់សត្រូវយើងឲ្យសោះ»។

នៅចុងសប្ដាហ៍នេះមហាជនបាននាំគ្នាផ្ទុះកំហឹងជាមួយក្រុមហ៊ុនកូកាកូឡាកម្ពុជាដែលបានដករូបតារាចម្រៀងវណ្ណដាចេញពីCOVER របស់ខ្លួន ដែលពួកគេយល់ថាការដកនេះបណ្ដាលមកពីលោកវណ្ណដាចេញបទចម្រៀង ១ សីហា ប្រឆាំងនឹងការឈ្លានពានពីថៃលើកម្ពុជា ហើយត្រូវបានប្រជាជនថៃនាំគ្នាធ្វើពិហិកាលើផលិតផលកូកាកូឡា។ ទោះជាយ៉ាងណាករណីនេះមិនទាន់មានការបញ្ជាក់យ៉ាងណាពីក្រុមហ៊ុននៅឡើយទេ។

សម្ដេចតេជោ ហ៊ុន សែន អំពាវនាវដល់ពលរដ្ឋរក្សាភាពស្ងប់ស្ងាត់ និងពិចារណាដោយសារតែការធ្វើពហិកាចំពោះក្រុមហ៊ុនកូកាកូឡា ដោយថាក្រុមហ៊ុននេះមានរោងចក្រនៅកម្ពុជាផ្ដល់ការងារដល់ពលរដ្ឋខ្មែររាប់ពាន់នាក់ និងបានបង់ពន្ធមកកម្ពុជាដែលជាការួមចំណែកមួយដល់កំណើនសេដ្ឋកិច្ចកម្ពុជា ហើយបើក្រុមហ៊ុននេះដកខ្លួននោះកម្ពុជាគឺជាអ្នកខាតបង់ហើយសត្រូវគឺជាអ្នកទទួលផល

សម្ដេចបន្ថែមថា៖ «ខ្ញុំមិនជំទាស់ទេប្រសិនបើកូកានេះផលិតនៅថៃបងប្អូនអាចឈប់ប្រើ បានតែបើកូកានេះផលិតនៅកម្ពុជាបងប្អូនពហិការមិនប្រើកម្ពុជាគឺជាអ្នកខាតបង់ទាំងការងារទាំងប្រាក់ចំណូលដោយផ្ទាល់និងដោយប្រយោលរបស់ប្រជាជននិងចំណូលរដ្ឋ»។