នយោបាយ

ប្រធានសភាស្នើអាមេរិកបន្តតាមដានបទឈប់បាញ់ខណៈដែលថៃនៅតែបន្តបំពាន

បានផុស

១០ ខែ មុន

នៅ

ថ្ងៃព្រហស្បតិ៍ ២៨ សីហា ២០២៥

ដោយ

ប្រធានសភាកម្ពុជា សម្ដេចសភាធិបតី ឃួន សុដារី បានស្នើដល់សមាជិកសភាអាមេរិកជួយផ្ដល់ព័ត៌មាននិងជំរុញដល់រដ្ឋាភិបាលអាមេរិកក្នុងការតាមដានការអនុវត្តបទឈប់បាញ់កម្ពុជា-ថៃ បន្ទាប់ពីថៃនៅតែបំពានជាបន្តបន្ទាប់។ ការស្នើនេះធ្វើឡើងក្នុងពេលដែលសម្ដេចប្រធានសភាជួបជាមួយគណប្រតិភូសភាអាមេរិកដឹកនាំដោយសមាជិកសភាបក្សសាធារណរដ្ឋលោកស្រី Beth Van Duyne នៅវិមានរដ្ឋសភាព្រឹកថ្ងៃទី២៨ ខែសីហា ឆ្នាំ២០២៥នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយករងខុទ្ទកាល័យសម្ដេចប្រធានសភាលោក ប៉ែន ប្រាកដ បានឱ្យអ្នកសារព័ត៌មានដឹងនៅព្រឹកថ្ងៃទី២៨ ខែសីហានេះថា ក្នុងជំនួបនេះសម្ដេចប្រធានសភាបានថ្លែងអំណរគុណដល់សហរដ្ឋអាមេរិកដែលបានអន្តរាគមន៍ទាន់ពេលវេលាបញ្ជប់នូវការឈ្លានពានពីថៃដែលនាំឱ្យមានបទឈប់បាញ់កាលពីថ្ងៃទី២៨ ខែកក្កដា កន្លងទៅ។ ជាមួយគ្នានេះសម្ដេចក៏បានស្នើឱ្យរដ្ឋាភិបាលអាមេរិកមានការតាមដានការអនុវត្តបទឈប់បាញ់នេះផងដែរ។

លោក ប៉ែន ប្រាកដ បានលើកឡើងថា៖ «នេះជាគឺសំណូមពរយ៉ាងទទូចនៅក្នុងជំនួប»។

សម្ដេចសភាធិបតីបានបញ្ជាក់ចំពោះមុខសមាជិកសភាអាមេរិកទាំងបក្សសាធារណរដ្ឋ និងប្រជាធិបតេយ្យថាកម្ពុជាមិនចង់បានសង្គ្រាមនោះទេ និងចង់រួមរស់ដោយសន្ដិភាពជាមួយប្រទេសជិតខាង។

តំណាងប្រតិភូសភាអាមេរិកលោកស្រី Beth Van Duyne បានជម្រាបសម្ដេចប្រធានរដ្ឋសភាថាការធ្វើដំណើរមកកម្ពុជានៅពេលនេះគឺដើម្បីមកពិនិត្យលើស្ថានភាពពិតជាក់ស្ដែងនៃជម្លោះប្រដាប់អាវុធកម្ពុជាថៃនិងការអនុវត្តបទឈប់បាញ់រវាងប្រទេសទាំងពីរ។

លោកស្រីក៏បានគូសបញ្ជាក់ថា មុនមកបំពេញទស្សនកិច្ចនៅកម្ពុជា លោកស្រីក៏បានបំពេញទស្សនកិច្ចនៅប្រទេសថៃផងដែរ។ តាមរយៈដំណើរទស្សនកិច្ចនេះ ឃើញថាប្រជាពលរដ្ឋប្រទេសទំាងពីរត្រូវការសន្តិភាព និងស្រឡាញ់សន្តិភាពដូចគ្នា។

បន្ទាប់ពីមានជម្លោះប្រដាប់អាវុធកម្ពុជា-ថៃចំនួន៥ថ្ងៃកាលពីចុងខែកក្កដា ប្រទេសទាំងពីរបានសម្រេចបានបទឈប់បាញ់មួយនៅយប់ថ្ងៃទី២៨ ខែកក្កដា ក្រោមការផ្ដួចផ្ដើមគំនិតពីសហរដ្ឋអាមេរិក និងសម្របសម្រួលដោយប្រទេសម៉ាឡេស៊ី ខណៈចិនជាអ្នកសង្កេតការណ៍។ ទោះជាយ៉ាងណាក្រោយបទឈប់បាញ់នេះថៃបានធ្វើការបំពានជាបន្តបន្ទាប់ដូចជាចូលមកចាប់ទាហានខ្មែរ ដើរល្បាតចូលដីខ្មែរ រាយបន្លាលួសចូលភូមិស្រុកពលរដ្ឋខ្មែរជាដើម ខណៈកម្ពុជាបានធ្វើការតវ៉ា និងអំពាវនាវឱ្យថៃបញ្ឈប់សកម្មភាពនេះជាបន្តបន្ទាប់៕