អាជីព
សិស្ស និស្សិតជិត ១ ៨០០ នាក់ ប្រឡងបញ្ចប់ការសិក្សាជំនាញបច្ចេកទេស ពីវិទ្យាស្ថានជាតិពហុបច្ចេកទេសកម្ពុជា
ចាប់ពីថ្ងៃទី២១ ដល់ថ្ងៃទី២៥ ខែវិច្ឆិកា ឆ្នាំ២០២៣នេះ មានសិស្សនិស្សិតចំនួន ១៧៨០នាក់ បានប្រឡងបញ្ចប់ការ សិក្សាពីវិទ្យាស្ថានជាតិពហុបច្ចេកទេសកម្ពុជា (NPIC) ក្នុងនោះមាននិស្សិតស្រីចំនួន ៣០៨នាក់។
ការប្រឡងបញ្ចប់ការសិក្សាឆ្នាំ២០២៣នេះ រួមមាននិស្សិតកម្រិតបរិញ្ញាបត្រជាន់ខ្ពស់បច្ចេកទេសចំនួន ១០៣នាក់ និស្សិតកម្រិតបរិញ្ញាបត្របច្ចេកទេស(Engineer) ចំនួន៧៨៣នាក់ និស្សិតកម្រិតសញ្ញាបត្រជាន់ខ្ពស់បច្ចេកទេស (Diploma) ចំនួន៦៦៥នាក់ និងសិស្សកម្រិតសញ្ញាបត្របច្ចេកទេស និងវិជ្ជាជីវៈ ចំនួន២២៩នាក់។
![](https://www.kampucheathmey.com/wp-content/uploads/2023/11/photo_2023-11-25_15-09-35-1024x768.jpg)
លោក ប៊ុន ភារិន នាយកវិទ្យាស្ថានជាតិពហុបច្ចេកទេសកម្ពុជា(NPIC) បានបញ្ជាក់ថា ការប្រឡងបញ្ចប់ការសិក្សាសម្រាប់ឆ្នាំ២០២៣នេះ គឺមានទាំងការប្រឡងទ្រឹស្តី ការការពារសារណា និងការបង្ហាញពីស្នាដៃរបស់សិស្សនិស្សិតជាក់ស្តែងតែម្តង។
ចំណែកគណៈកម្មការដែលជាអ្នកវាយតម្លៃក្នុងការប្រឡងនេះ មានការចូលរួមទាំងពីសាស្ត្រាចារ្យជំនាញនៃវិទ្យាស្ថាន NPIC រួមនិងអ្នកជំនាញលើវិស័យនានាមកពីខាងក្រៅ វិទ្យាស្ថានផងដែរ ដើម្បីធានាថាសិស្សនិស្សិតដែលបានបញ្ចប់ការសិក្សាគឺជាធនធានមនុស្ស ប្រកបដោយ ជំនាញ បច្ចេកទេស និងវិជ្ជាជីវៈអាចប្រកបការងារបាន។
![](https://www.kampucheathmey.com/wp-content/uploads/2023/11/photo_2023-11-25_14-57-01-1024x879.jpg)
លោកសាស្ត្រាចារ្យ ឈុំ អំណត់ ប្រធានដេប៉ាតឺម៉ង់សំណង់ស៊ីវិលនៃវិទ្យាស្ថាន NPIC មើលឃើញថា តាមរយៈការប្រឡងបញ្ចប់ការសិក្សាឆ្នាំនេះ បង្ហាញថាសិស្សនិស្សិតនៃវិទ្យាស្ថាន NPIC កាន់តែមានកម្រិតគុណភាពល្អ ទាំងចំណេះដឹងផ្នែកទ្រឹស្តី និងការអនុវត្តជំនាញផ្ទាល់។
លោកសាស្ត្រាចារ្យ បានបញ្ជាក់ថា សិស្ស និស្សិត ដែលបញ្ចប់ការសិក្សាផ្នែកសំណង់ស៊ីវិល ផ្នែកអគ្គិសនី ផ្នែកអេឡិចត្រូនិក មានឱកាសច្រើនក្នុងទីផ្សារ ការងារ ដោយសារមានគម្រោងសាងសង់សំណង់នានាជាច្រើនក្នុងប្រទេសកម្ពុជា ពីមួយឆ្នាំទៅមួយឆ្នាំ។
![](https://www.kampucheathmey.com/wp-content/uploads/2023/11/photo_2023-11-25_14-59-53-796x1024.jpg)
ចំណែក លោកបណ្ឌិតសាស្ត្រាចារ្យ ចេង ហ៊ឈង ប្រធានមហាវិទ្យាល័យអគ្គិសនី យល់ឃើញថា ក្រៅពី ការសិក្សា ជំនាញបច្ចេកទេសទាំងទ្រឹស្តី និងការអនុវត្តជាក់ស្តែងហើយនោះ ជំនាញទន់ដែល សំដៅ លើ សីលធម៌ល្អ ឥរិយាបទល្អ គឺពិតជាសំខាន់ណាស់សម្រាប់សិស្សនិស្សិតអាចក្លាយជាធនធានមនុស្ស ដ៏ល្អនៅ ពេលចេញបំពេញការងារ។ ដូចនេះ ទើបវិទ្យាស្ថាន NPIC បានបូកបញ្ចូលការសិក្សាជំនាញទន់នេះ សម្រាប់សិស្សនិស្សិតនៅពេលកំពុងសិក្សាជំនាញណាក៏ដោយ។
យុវជន សែម ម៉េងខេង ជានិស្សិតផ្នែកមេកានិករថយន្ត ដែលបានប្រឡងបញ្ចប់ការសិក្សា នៅ ឆ្នាំ២០២៣នេះ ជឿជាក់ថាជំនាញដែលខ្លួនបានរៀនចប់នេះ នឹងអាចបំពេញក្តីស្រមៃក្នុងការចូលរួមអភិវឌ្ឍន៍ វិស័យរថយន្តនៅកម្ពុជា។
ជាក់ស្តែង យុវជនរូបនេះ បានដាក់បង្ហាញស្នាដៃគម្រោងតម្លើងប្រព័ន្ធអគ្គិសនី រថយន្ត សម្រាប់ការប្រឡងបញ្ចប់ការសិក្សានេះ ដោយគម្រោងមួយនេះចំណាយពេលប្រមាណជា៦ខែ ដើម្បីបង្កើតចេញជារូបរាង ជាក់ស្តែង។
![](https://www.kampucheathmey.com/wp-content/uploads/2023/11/photo_2023-11-25_15-01-21-768x1024.jpg)
ទន្ទឹមនេះ យុវតី ពៅ ពុធថា ជានិស្សិតផ្នែកមេកានិកទូទៅ ដែលប្រឡងបញ្ចប់ការសិក្សាក្នុងឆ្នាំ២០២៣នេះដែរ មានគម្រោងថានឹងអាចយកជំនាញដែលខ្លួនបានរៀននេះ បើកជារោងជាងផ្នែកក្រឡឹងដោយខ្លួនឯង ដែល អាច ផ្គត់ផ្គង់តម្រូវការផ្នែករថយន្ត និងនៅតាមរោងចក្រនានា។
យុវតីរូបនេះ លើកទឹកចិត្តដល់យុវតីផ្សេងទៀត ចូលរៀនជំនាញមេកានិក រឺជំនាញបច្ចេកទេសផ្សេងទៀតដែលខ្លួនស្រឡាញ់ ដោយកុំគិតថាមនុស្សស្រីរៀន ជំនាញទាំងនោះមិនបានអី សំខាន់គឺការតាំងចិត្តរបស់យើង។
សូមបញ្ជាក់ថា វិទ្យាស្ថានជាតិពហុបច្ចេកទេសកម្ពុជា (NPIC) គឺជាគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈដ៏ធំមួយ ដែលបានបង្កើតឡើងក្នុងឆ្នាំ២០០៥ ស្ថិតនៅក្រោមក្រសួងការងារ និងបណ្តុះបណ្តាល វិជ្ជាជីវៈ។
![](https://www.kampucheathmey.com/wp-content/uploads/2023/11/photo_2023-11-25_15-09-27-1024x768.jpg)
ក្នុងឆ្នាំសិក្សា ២០២២-២០២៣ មានសិស្សនិស្សិតសរុបជាង ៦ ៦០០នាក់ កំពុងសិក្សា ជំនាញ បច្ចេកទេស និងវិជ្ជាជីវៈ ចាប់ពីថ្នាក់សញ្ញាបត្របច្ចេកទេសនិងវិជ្ជាជីវៈ ថ្នាក់បណ្តុះបណ្តាលវគ្គខ្លី ថ្នាក់ឧត្តម សិក្សា និងថ្នាក់ក្រោយឧត្តមសិក្សា លើជំនាញដូចជា វិស្វកម្មអគ្គិសនី វិទ្យាសាស្ត្រកុំព្យូទ័រ វិស្វកម្មមេកានិក វិទ្យាសាស្ត្រអុបទិក វិស្វកម្មសំណង់ស៊ីវិលនិងស្ថាបត្យកម្ម វិស្វកម្មអេឡិចត្រូនិកនិងទូរគមនាគមន៍ វិស្វកម្មមេកានិករថយន្ត ទេសចរណ៍និងបដិសណ្ឋារកិច្ច៕
![](https://www.kampucheathmey.com/wp-content/uploads/2023/11/photo_2023-11-25_15-09-26-1024x768.jpg)
![](https://www.kampucheathmey.com/wp-content/uploads/2023/11/photo_2023-11-25_15-09-32-1024x768.jpg)
![](https://www.kampucheathmey.com/wp-content/uploads/2023/11/photo_2023-11-25_15-09-33-768x1024.jpg)
-
សេដ្ឋកិច្ច១ សប្តាហ៍ ago
ការវិនិយោគរបស់ក្រុមហ៊ុនជប៉ុន កំពុងជួយរុញឱ្យកំណើនសេដ្ឋកិច្ចកម្ពុជាកាន់តែងើបឡើងបន្ថែមទៀត
-
KPT+១ សប្តាហ៍ ago
១០ ប្រទេស កំពូលគ្រោះថ្នាក់ខ្លាំង ចំពោះស្រ្តី
-
ព័ត៌មានជាតិ៥ ថ្ងៃ ago
អ្នកនាំពាក្យទទូចដល់អ្នកប្រើបណ្តាញសង្គមបញ្ឈប់ចែកចាយជាបន្ទាន់ និងលុបចេញរាល់មាតិកាដែលពាក់ព័ន្ធឃាតកម្មឃោរឃៅ
-
ព័ត៌មានជាតិ៧ ថ្ងៃ ago
ក.ប.ប រកឃើញថាឈ្មួញនាំចូលផ្លែទុរេនពីប្រទេសជិតខាង និងមានជ្រលក់ថ្នាំ ហើយលក់បន្លំថាជាទុរេនក្នុងស្រុក
-
ព័ត៌មានជាតិ៤ ថ្ងៃ ago
លោក ជួន ណារិន្ទ បញ្ជាឱ្យហៅគ្រូមន្តអាគមយកកាំភ្លើងពោះខ្លួនឯងមកសួរនាំ ទោះសាមីខ្លួនសុំទោសជាសាធារណៈ
-
ព័ត៌មានជាតិ៦ ថ្ងៃ ago
បុរសម្នាក់ ត្រូវសត្វថ្លែនខាំបណ្តាលឱ្យស្លាប់ ក្រោយបញ្ជូនទៅសង្គ្រោះនៅមណ្ឌលសុខភាព
-
ព័ត៌មានអន្ដរជាតិ៣ ថ្ងៃ ago
ព្យុះខ្សាច់សាហារ៉ាដ៏ធំ ហោះឆ្លងមហាសមុទ្រអាត្លង់ទិក ទៅវាយប្រហារអាមេរិក ចុងសប្តាហ៍នេះ
-
ព័ត៌មានជាតិ៧ ថ្ងៃ ago
ក្នុងឆ្នាំ២០២៤៖ ឧកញ៉ា អ្នកឧកញ៉ា ៤នាក់ ត្រូវដកហូតគោរមងារ ក្រោយរកស៊ីបោកប្រាស់ និងបាញ់ប្រហារពលរដ្ឋ