មុខរបរដឹកជញ្ជូនតាមអនឡាញ ក្លាយជាការងារពេញនិយមសម្រាប់យុវវ័យមួយចំនួន នាបច្ចុប្បន្ន

មុខរបរដឹកជញ្ជូន ម្ហូបអាហារ អីវ៉ាន់ និងសម្លៀកបំពាក់ផ្សេងៗ តាមអនឡាញ បានក្លាយទៅជាការងារដ៏ពេញនិយម សម្រាប់យុវវ័យមួយចំនួន ស្របពេលមនុស្សជាច្រើនក៏គាំទ្រសេវាកម្មដឹកជញ្ជូនតាមអនឡាញនេះដែរ ពិសេសក្នុងភូមិសាស្រ្ដរាជធានីភ្នំពេញ។ ជាមួយនោះ ក្រុមអ្នកដឹកជញ្ជូនតាមអនឡាញ ដែលភាគច្រើនគេសង្កេតឃើញថា សុទ្ធសឹងជាយុវវ័យ ក៏បានអះអាងថា ពួកគេអាចស្វែងរកប្រាក់ចំណូលប្រចាំថ្ងៃចេញពីមុខរបរមួយនេះបានយ៉ាងច្រើនគួរសមផងដែរ។

យុវជន ថៃ រាជ អ្នកដឹកជញ្ជូនតាមអនឡាញ បានប្រាប់ឱ្យ កម្ពុជាថ្មី ដឹងថា រូបគេបានជ្រើសរើសមុខរបរជាអ្នកដឹកជញ្ជូនតាមអនឡាញរយៈពេលជាង ១ ឆ្នាំ មកហើយ។ កត្តាធ្វើឱ្យយុវជនរូបនេះ ចាប់អារម្មណ៍ទៅលើការងារដឹកជញ្ជូនបែបនេះ ក៏ដោយសារចំណង់ចំណូលចិត្តរបស់ខ្លួននោះដែរ ខណៈមុខរបរដឹកជញ្ជូនតាមអនឡាញនេះ ធ្វើឱ្យ យុវជន ថៃ រាជ អាចស្វែងរកប្រាក់ចំណូលប្រចាំថ្ងៃ បានចន្លោះពី ៥ ម៉ឺនរៀល ទៅ ៦ ម៉ឺនរៀល ជារៀងរាល់ថ្ងៃ ផងដែរ។ យុវជនរូបនេះ បានបញ្ជាក់ទៀតថា បញ្ហាប្រឈមដែលជួបប្រទះក្នុងការបំពេញភារកិច្ចប្រចាំថ្ងៃនោះ គឺ គ្រោះថ្នាក់តាមដងផ្លូវ នៅពេលបើកបរមិនប្រុងប្រយ័ត្ន មិនគោរពច្បាប់ចរាចរណ៍ បើកលឿនហួសការកំណត់ និងពេលខ្លះ អាចជិះបញ្ចាស់ផ្លូវ ដើម្បីយកអីវ៉ាន់ ឬ ទំនិញប្រគល់ជូនអថិជនម្ដងៗ។ យុវជន ថៃ រាជ ចង់ឱ្យអ្នកដឹកជញ្ជូនទាំងអស់ គួរតែនាំគ្នាកែតម្រូវឡើងវិញ ដើម្បីកុំឱ្យកើតមានបញ្ហាគ្រោះថ្នាក់ចរាចរណ៍ ឬ ហានិភ័យផ្សេងៗ ទៀត ជាដើម…។

យ៉ាងណាមិញ យុវជន គង់ សម្បត្តិ ក៏បានប្រាប់ឱ្យ កម្ពុជាថ្មី ដឹងដូចគ្នាដែរថា មូលហេតុ​ដែលរូបគេចាប់យកមុខរបរដឹកជញ្ជូនតាមអនឡាញ ដោយសារការងារមួយនេះ មានសេរីភាព និងបានស្គាល់មនុស្សថ្មីៗ ជារៀងរាល់ថ្ងៃ។ ម្យ៉ាងទៀត យុវជន គង់ សម្បត្តិ បានអះអាងដែរថា គេអាចស្វែងរកប្រាក់ចំណូលចេញពីមុខរបរដឹកជញ្ជូននេះ បានចន្លោះពី ៥ ម៉ឺនរៀល ទៅ ៦ ម៉ឺនរៀល ក្នុងមួយថ្ងៃ។ យុវជន គង់ សម្បត្តិ បន្ថែមទៀតថា ការងារដឹកជញ្ជូនតាមអនឡាញនេះ មានលក្ខណៈងាយស្រួលក៏ពិតមែន ប៉ុន្តែក៏នាំមកនូវគ្រោះថ្នាក់ ឬ ហានិភ័យ ដែលកើតមានដោយយថាហេតុ ប្រសិនបើអ្នកដឹកជញ្ជូនទាំងអស់ មិនបានយកចិត្តទុកដាក់ក្នុងពេលបើកបរ​នៅតាមដងផ្លូវ ពិសេសក្នុងភូមិសាស្រ្ដរាជធានីភ្នំពេញនេះតែម្ដង។

មិនខុសគ្នាពីយុវជនទាំង ២ រូបខាងលើ លោក ឌុន រ៉ាវី អ្នកដឹកជញ្ជូនតាមអនឡាញ មានបទពិសោធន៍ជាង ៣ ឆ្នាំ មកហើយនោះ ក៏បានប្រាប់ឱ្យ កម្ពុជាថ្មី ដឹងថា លោកក៏ជាអ្នកដឹកជញ្ជូនតាមអនឡាញមួយរូបផងដែរ។ លោក ឌុក រ៉ាវី បន្ថែមថា លោកចាប់យកមុខរបរមួយនេះ តាំងពីពេលដែលពុំសូវមានក្រុមហ៊ុនដឹកជញ្ជូនតាមអនឡាញមកម្ល៉េះ ត្បិតការងារដឹកជញ្ជូន កាលនោះ ក៏សម្បូរអីវ៉ាន់ ឬ ម្ហូបអាហារ ផ្សេងៗ ដែលអាចឱ្យលោកស្វែងរកបានប្រាក់ចំណូលចន្លោះពី ៨ ម៉ឺនរៀល ទៅ ១០ ម៉ឺនរៀល ក្នុងមួយថ្ងៃ។ លោក ឌុន រ៉ាវី បន្ដថា សម្រាប់ពេលបច្ចុប្បន្ននេះ មុខរបរដឹកជញ្ជូនតាមអនឡាញនេះ ហាក់ធ្លាក់ចុះបន្តិច ដោយសារតែចំនួនអ្នកដឹកជញ្ជូនកើនឡើងខ្លាំង និងស្របពេលមានក្រុមហ៊ុនជាច្រើនទៀត​ បានចាប់យកសេវាកម្មដឹកជញ្ជូនជាមុខរបរជាបន្តបន្ទាប់ជារៀងរាល់ឆ្នាំ៕

អត្ថបទ ៖ សួស សិត