អាជ្ញាធរសង្កាត់ស្ទឹងមានជ័យទី២ ស្ថាបនាប្រព័ន្ធលូ​ប្រវែង១៥០០ម៉ែត្រ ដើម្បីរំដោះពីការជន់លិច

អាជ្ញាធរសង្កាត់ស្ទឹងមានជ័យទី២ នៃរដ្ឋបាលខណ្ឌមានជ័យមានជ័យ បាននិងកំពុងស្ថាបនាជួសជុលប្រព័ន្ធលូមួយខ្សែឆ្លងកាត់ភូមិចំនួនពីរដើម្បីរំដោះពីការជន់លិចដោយជំនន់ទឹកភ្លៀង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សេង វ៉ាន់ថា ចៅសង្កាត់រងទី១ នៃរដ្ឋបាលសង្កាត់ស្ទឹងមានជ័យទី២ បានប្រាប់ កម្ពុជាថ្មី នៅថ្ងៃទី២១តុលានេះថា គម្រោងស្ថាបនាប្រព័ន្ធលូនេះ ធ្វើឡើងក្រោមមូលនិធិអភិវឌ្ឍន៍របស់សាលាសង្កាត់ ឆ្នាំ២០២៥ ដែលមានប្រវែង ១៥០០ម៉ែត្រ មុខកាត់ ៦តឹក និងឆ្លងកាត់ភូមិចំនួនពីរ គឺភូមិឬស្សី និងភូមិដំណាក់ធំ១។

លោកចៅសង្កាត់រងទី១ បន្ថែមថា ការស្ថាបនាប្រព័ន្ធលូនាពេលនេះ ដោយសារប្រព័ន្ធលូចាស់នៅចំណុចនេះមានមុខកាត់តូច និងពុកផុយ និងមានរយៈពេលយូរឆ្នាំមកហើយ ទើបអាជ្ញាធរសង្កាត់សម្រេចធ្វើការស្ថាបនាជួសជុលឡើងវិញដើម្បីសម្រួលប្រព័ន្ធលូឲ្យហូរបានលឿនជាងមុន។

បើតាមលោកចៅសង្កាត់រងទី១ ក្រោយពីអាជ្ញាធរបើកការដ្ឋានស្ថាបនាប្រព័ន្ធលូនេះ ប្រជាពលរដ្ឋដែលរស់នៅតំបន់នោះមានការអបអរសាទរខ្លាំងដោយសារពួកគាត់ទន្ទឹងរង់ចាំប្រព័ន្ធលូនេះយូរមកហើយ ដោយពួកគាត់លើកឡើងថា កន្លងមកពេលមានភ្លៀងធ្លាក់មកម្ដងៗ ជន់លិច១ម៉ោង ទៅ២ម៉ោង ទើបទឹកហូរស្រកអស់ ណាមួយប្រព័ន្ធលូចាស់មានទំហំតូចនិងមានអត្រាប្រជាពលរដ្ឋប្រើប្រាស់ច្រើន។

ក្នុងនាមអាជ្ញាធរ លោកសំណូមពរដល់ប្រជាពលរដ្ឋដែលមានរុឺហ្គែលូនៅមុខផ្ទះសូមចូលរួមថែរក្សាចៀសវាយកសំរាមដាក់មុខលូដែលនាំឲ្យស្ទះទឹកហូរចូលលូមិនបានបង្កឲ្យទឹកដក់លើផ្លូវ៕

អត្ថបទ៖ នរា