ខណ្ឌរដ្ឋបាលជលផលកំពង់ចាម ចុះបង្ក្រាបបទល្មើសនេសាទ ២ករណីក្នុងស្រុកបាធាយ

ខណ្ឌរដ្ឋបាលជលផលកំពង់ចាម សហការជាមួយអាជ្ញាធរ និងកម្លាំងជំនាញមូលដ្ឋាន ចុះបង្ក្រាបបទល្មើសនេសាទ ២ករណី នៅក្នុងស្រុកបាធាយ និងបានដកហូតឧបករណ៍នេសាទខុសច្បាប់មួយចំនួន។

ប្រតិបត្តិការនេះ បានធ្វើឡើងកាលពីថ្ងៃទី០៣ ខែវិច្ឆិកា ឆ្នាំ២០២៥ ក្រោមការដឹកនាំដោយលោក ទឹម បូរក្ស អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ដោយមានការសម្របសម្រួល ពីព្រះរាជអាជ្ញា នៃអយ្យការអមសាលាដំបូងខេត្តកំពង់ចាម បានចំនួន ០២ករណី នៅក្នុងស្រុកបាធាយ។

មន្ត្រីជំនាញបានបញ្ជាក់ថា ការចុះប្រតិបត្តិការ និងបង្ក្រាបករណីខាងលើនេះ គឺបានអនុវត្តនៅចំណុចព្រែកអូរម៉ាល់ ឃុំបាធាយ ស្រុកបាធាយ ខេត្តកំពង់ចាម ដែលករណីទី១ ជំនាញបានរុះរើរបាំងផ្ចិតព្រែកចំនួន ០១កន្លែង ប្រវែង ១៥ម៉ែត្រ បង្គោលចម្រឹងចំនួន ៣៥ដើម និងករណីទី២ បានប្រមូលឧបករណ៍លូស្បៃមុងចំនួន ០៣មាត់ របាំងស្បៃមុងប្រវែង ៤៥ម៉ែត្រ បង្គោលចម្រឹងចំនួន ២៥ដើម និងចាក់លែងត្រីចម្រុះទម្ងន់ ០១គីឡូក្រាម ទៅក្នុងបឹងធម្មជាតិវិញ៕

អត្ថបទ​៖ ​ឡេក​ ចាន់ពេជ្រ