បុគ្គលិក​ផ្តល់​ប្រាក់កម្ចីក្រៅប្រព័ន្ធស្រស់សោភាម្នាក់ ត្រូវឃាត ក សម្លាប់រួចយកសពទៅកប់ដីបំបិទព័ស្ដុតាង

នារីស្រស់សោភាទើបតែមានវ័យ២២ឆ្នាំ ដែលបម្រើការងារជាបុគ្គលិក​ផ្តល់​ប្រាក់កម្ចីក្រៅប្រព័ន្ធម្នាក់ ត្រូវបានជនដៃដល់ជាឃាត ក សម្លាប់ រួចយកសពទៅកប់ក្នុងដី ដើម្បីបំបិទព័ស្ដុតាង ខណៈកម្លាំងសមត្ថកិច្ចកំពុងតាមចាប់ខ្លួនជនដៃដល់មកអនុវត្តច្បាប់។

ករណីឃាតកម្មលើបុគ្គលិក​ផ្តល់​ប្រាក់កម្ចីក្រៅប្រព័ន្ធនេះ ត្រូវបានសមត្ថកិច្ចរកឃើញសពជនរងគ្រោះនៅថ្ងៃទី១៤ ខែវិច្ឆិកា ឆ្នាំ២០២៥​ នៅចំណុចផ្ទះជនសង្ស័យឈ្មោះ ម៉ន សីហា ភេទប្រុស អាយុ២០ឆ្នាំ រស់នៅភូមិក្រូច ឃុំស្វាយភ្លើង ស្រុកតាំងគោក ខេត្តកំពង់ធំ។

តាមរបាយការណ៍របស់សមត្ថកិច្ច ជនរងគ្រោះឈ្មោះ ហ៊ឹម ទីណា ភេទស្រី អាយុ២២ឆ្នាំ មុខរបប បុគ្គលិកអង្គការ អង្ករគ្រួសារខ្មែរ រស់នៅភូមិឫស្សីលរ៍ ឃុំស្វាយភ្លើង ស្រុកតាំងគោក ខេត្តកំពង់ធំ។

តាមរបាយការណ៍ នៅវេលាម៉ោង១៥និង០០នាទី ថ្ងៃទី១៣ ខែវិច្ឆិកា ឆ្នាំ២០២៥ ជនរងគ្រោះបានបាត់ដំណឹងដោយឪពុកម្ដាយតេទូរស័ព្ទមិនចូល ពេលនោះឪពុកម្ដាយបានស្វែងរកតាមភូមិ និងបានប្ដឹងប៉ុស្តិ៍រដ្ឋបាលឃុំស្វាយភ្លើង ដើម្បីឱ្យជួយរក។ លុះដល់ម៉ោង១០និង០០នាទី ថ្ងៃទី១៤ ខែវិច្ឆិកា ឆ្នាំ២០២៥ ឪពុកជនរងគ្រោះបានមករកមើលនៅផ្ទះជនសង្ស័យឈ្មោះ ម៉ន សីហា ភេទប្រុស អាយុ២០ឆ្នាំ រស់នៅភូមិក្រូច ឃុំស្វាយភ្លើង ស្រុកតាំងគោក ស្រាប់តែឃើញស្នាមកាប់ដីដូចកប់ថ្មីៗ។ ពេលឃើញដូចនោះគាត់បានទៅប្ដឹងនគរបាលប៉ុស្ដិ៍ ដើម្បីជួយអន្តរាគមន៍ ទើបកម្លាំងប៉ុស្ដិ៍សហការជាមួយកម្លាំងនគរបាលជំនាញ ជីករកមើលក៏ឃើញសពជនរងគ្រោះពិតប្រាកដមែន។

ក្នុងប្រតិបត្តិការស្រាវជ្រាវ កម្លាំងសមត្ថកិច្ចបានរកឃើញ ម៉ូតូចំនួន០១គ្រឿង ម៉ាកហុងដាទ្រីម សេរី២០១៤ ពាក់ស្លាកលេខ កំពង់ធំ 1P 9873 ។ ខ្សែកផ្លាកទី០១ខ្សែរ ខ្សែជើងផ្លាកទីនចំនួន០២ខ្សែ និងទូរស័ព្ទដៃម៉ាក iPhone 11 Pro Max ០១គ្រឿង លេខ 096 3968464។

ក្នុងករណី កម្លាំងនគរបាលជំនាញកំពុងសហការគ្នា ដើម្បីស្រាវជ្រាវតាមចាប់ខ្លួនជនដៃដល់ជាឃាត ក យកមកផ្ដន្ទាទោសតាមផ្លុវច្បាប់៕