សភាពអ៊ូអរ​ឡើង​វិញ​ផ្សារបន្លែច្បារអំពៅចូលថ្ងៃ​នេះ​ ក្រោយឈប់សម្រាក​ភ្ជុំ​រួច

លោក សាន់ ប៊ុនណា ប្រធានគណៈកម្មការផ្សារបន្លែ (ផ្សារក្រោមច្បារអំពៅ) បានឲ្យដឹងថា នៅថ្ងៃទី ១៦ ខែតុលា នេះ បងប្អូន​អាជីវករផ្សារបន្លែបានមកលក់ដូរសឹងពេញផ្សារ ខណះអ្នកទិញសម្រុកមកទិញព្រោះការខកខានលក់រយះពេល ៣ ថ្ងៃដែលជាថ្ងៃបុណ្យភ្ជុំបិណ្ឌបង្ហើយ។

ក្នុងរយះពេល ៣ ថ្ងៃដែលបងប្អូនអាជីវករផ្សារខកខានលក់គឺធ្វើឲ្យម៉ូយភាគច្រើនរង់​ចាំមកទិញទំនិញ ដូច្នេះហើយទើបពេលបើកលក់ភ្លាម មានម៉ូយមកចូលទិញពេញផ្សារតែម្តង។

ចំណែកបងប្អូនអាជីវករវិញបាននិយាយថា ពួកគាត់បានផ្អាកលក់ ៣ ថ្ងៃព្រោះម៉ូយភាគច្រើនទៅបុណ្យភ្ជុំនៅតាមខេត្តដូច្នេះមានតែសម្រាកលក់ ៣ ថ្ងៃដែរហើយក៏ចេញទៅធ្វើបុណ្យផងដែរ។ ទោះជាមិនសូវមានលុយក៏ដោយ ប៉ុន្តែការធ្វើបុណ្យទានគឺត្រូវតែធ្វើហើយព្រោះជាទំនៀមទំលាប់ប្រពៃណីយខ្មែរ​ទៅហើយ។

ផ្សារបន្លែច្បារអំពៅមានទីតាំងស្ថិតនៅភូមិកណ្តាល សង្កាត់ច្បារអំពៅទី២ខណ្ឌច្បារអំពៅរាជធានីភ្នំពេញ៕

អត្ថបទ៖ នរា