រហូតមកដល់ថ្ងៃនេះ ​ជំនាញ​មិនទាន់​បាន​ចាត់​វិធានការ​ អ្នកលក់​សាច់សត្វព្រៃ​ខុសច្បាប់​នៅ​ឡើយទេ

លោកនាយខណ្ឌរដ្ឋបាលព្រៃឈើស្ទឹងត្រែងថា នឹងចាត់វិធានការទៅលើអ្នកលក់សាច់សត្វព្រៃខុសច្បាប់ នៅផ្សារសាមគ្គីស្ទឹងត្រែងរហូតមកដល់ថ្ងៃទី ១២ ខែមករាឆ្នាំ ២០២២ នៅតែលក់ដដែល។

នៅក្នុងកិច្ចសម្ភាសន៍ជាមួយលោក អន ចាន់សុជាតិ នាយខណ្ឌរដ្ឋបាលព្រៃឈើស្ទឹងត្រែងកាលពីថ្ងៃទី ១០ ធ្នូឆ្នាំ ២០២១​ កន្លងទៅ ក្នុងករណីអ្នកលក់ដូរសាច់សត្វព្រៃខុសច្បាប់ នៅផ្សារសាមគ្គីស្ទឹងត្រែង លោកថាកំពុងដាក់កម្លាំងចុះពិនិត្យមើល នឹងធ្វើការបង្ក្រាប តែរហូតមកដល់ពេលនេះ មិនទាន់ឃើញចំណាត់ការនៅឡើយ។

អាជីវករលក់ដូរក្នុងផ្សារស្ទឹងត្រែងបានលើកឡើងថា ការលក់ដូរសាច់សត្វព្រៃខុសច្បាប់នៅផ្សារស្ទឹងត្រែង ហាក់ដូចជាមិនមានមន្ត្រីពាក់ព័ន្ធ ជំនាញមិនបានយកចិត្តទុកដាក់ក្នុងការអភិរក្សធនធាន ដែលមានហើយដើម្បីឲ្យវាសម្បូរឡើងវិញនោះទេ ហើយពីមួយថ្ងៃទៅមួយខែ ពីមួយខែទៅមួយឆ្នាំ ធនធានទាំងនោះ វាបានបាត់បង់ជាបណ្ដើរៗ ទៅថ្ងៃអនាគត អាចនឹងបាត់បង់ទាំងស្រុងក៏អាចថាបាន។

ពួកគាត់បានបន្តលើកឡើងទៀតថា:យើងពិតជាឃើញការបង្ក្រាបរបស់មន្ត្រីជំនាញមែនតែការបង្ក្រាបនោះ ក្នុងមួយខែឬលើសពី ខែបង្ក្រាបម្តង ហើយការបង្ក្រាបមិញ ហាក់បីដូច ពុំមានកម្លាំងច្រើននោះទេ មានត្រឹមតែកម្លាំងពីរឬបីនាក់ ដែលមិនអាចធ្វើឲ្យពួករកស៊ីខុសច្បាប់ ញញើតនឹងខ្លាចឡើយ គ្រាន់តែមកបង្អើលចាប់សាច់សត្វតិចតួច បង្គ្រប់កិច្ចតែប៉ុណ្ណោះ ហើយក៏ត្រឡប់ទៅវិញបាត់។

កន្លែងលក់សត្វព្រៃមានប្រមាណ ៥ទៅ ៦ កន្លែង តែពួកគេដាក់លក់តិចតួច និងមានធុងក្លាស្សេដាក់លួចលាក់នៅឆ្ងាយពីខ្លួន ពេលដែលមានម៉ូយ ទើបគេយកសាច់នោះមកលក់។សាច់ដែលគេដាក់លក់នោះភាគច្រើនគេដាក់លក់មានសាច់ជ្រូកព្រៃ សាច់ឈ្លុស។ ក្រៅពីនោះក៏មានសាច់សត្វព្រៃ ដ៏កម្រៗផងដែរ ដូចជាទន្សោង សាច់ប្រើស អណ្ដើក កាំប្រម៉ា ត្រកួតជាដើម ដែលគេលួចលបលក់៕

អត្ថបទ៖ ងិនលីម