Connect with us

សន្តិសុខសង្គម

ឃាត់ខ្លួនបុរស ២នាក់ ចេញសែកស្អុយ ជាង ១០ ម៉ឺនដុល្លារ ហើយគេចវេះមិនចូលដោះស្រាយ

បានផុស

នៅ

ភ្នំពេញ៖ នគរបាលការិយាល័យព្រហ្មទណ្ឌកម្រិតធ្ងន់ នៃនាយកដ្ឋាននគរបាលព្រហ្មទណ្ឌក្រសួងមហាផ្ទៃ បានធ្វើការឃាត់ខ្លួនបុរសពីរនាក់ បញ្ជូនឡើងតុលាការ នៅព្រឹកថ្ងៃទី០៥ ខែកុម្ភៈ ឆ្នាំ២០២២នេះ តាមពាក្យបណ្ដឹងរបស់ជនរងគ្រោះពាក់ព័ន្ធការទូទាត់ថ្លៃប្រេង ដោយបានចេញសែកស្អុយចំនួនពីរសន្លឹក សរុបជាទឹកប្រាក់ជាង ១០ ម៉ឺនដុល្លារសហរដ្ឋអាមេរិក ហើយគេចវេះមិនចូលដោះស្រាយ។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នគរបាលបានឱ្យដឹងថា ជនសង្ស័យទាំង ២នាក់មានឈ្មោះ ទី១ ប៉ែន សុភាព ភេទប្រុស អាយុ ៣៨ឆ្នាំ ជនជាតិខ្មែរ មុខរបរ បុគ្គលិកក្រុមហ៊ុន។ ទី២ ឈ្មោះ ស៊ាង ថៃ ភេទប្រុស អាយុ ៣៨ឆ្នាំ ជនជាតិខ្មែរ មុខរបរ បុគ្គលិកក្រុមហ៊ុន។ បុរសទាំង ២ នាក់ត្រូវបានឃាត់ខ្លួនពាក់ព័ន្ធបទល្មើស “មិនបំពេញកាតព្វកិច្ចចំពោះឧបករណ៍ដែលអាចជួញដូរបាន”។

ប្រភពបន្តថា ជនសង្ស័យទាំងពីរត្រូវបានកម្លាំងនគរបាលជំនាញឃាត់ខ្លួន កាលពីថ្ងៃទី០៣ ខែមីនា ឆ្នាំ២០២២ នៅម្ដុំសង្កាត់ទន្លេបាសាក់ ខណ្ឌចំការមន រាជធានីភ្នំពេញ តាមពាក្យបណ្ដឹងរបស់ម្ចាស់បំណុល។

កាលពីថ្ងៃទី១៦ និងថ្ងៃទី៣០ ខែធ្នូ ឆ្នាំ២០២១ បុរសទាំងពីរនាក់ ដែលតំណាងឱ្យក្រុមហ៊ុន E-zone express បានធ្វើការទូទាត់ថ្លៃប្រាក់ទិញប្រេងតាមរយៈមូលប្បទានប័ត្រ (សែក) ចំនួនពីរសន្លឹក ដែលសរុបជាទឹកប្រាក់ជាង ១០ ម៉ឺនដុល្លារ។ ក្រោយពីបានចេញសែករួចមក ជនរងគ្រោះឃើញថាសែកទាំងពីរមិនមានសាច់ប្រាក់ ក្រោយមកដើមបណ្ដឹងបានព្យាយាមចរចាដោះស្រាយបំណុល តែមិនបានលទ្ធផលសោះ ហើយបុគ្គលទាំងពីរនាក់មានចេតនាគេចវេសមិនបំពេញកាតព្វកិច្ចចំពោះឧបករណ៍ដែលបានជួញដូរ ដែលធ្វើឱ្យប៉ះពាល់ផលប្រយោជន៍យ៉ាងធ្ងន់ធ្ងររបស់ក្រុមហ៊ុន ទើបដើមបណ្ដឹងបានប្ដឹងទៅសមត្ថកិច្ចតែម្ដង។

បច្ចប្បន្នជនសង្ស័យទាំង ២នាក់ កំពុងស្ថិតក្នុងដំណាក់កាលស៊ើបសួររបស់តំណាងអយ្យការនៅឡើយ៕

អត្ថបទ៖ មករា

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម